ភ្នំពេញ ៖ អ្នកជំនាញនៅក្នុងវិស័យអចលនទ្រព្យបានអះអាងថា បើទោះជាបច្ចុប្បន្ននេះ វិស័យអចលនទ្រព្យ ក៏ដូចជាសំណង់នៅកម្ពុជាមានកំណើនយឺតក៏ដោយ ប៉ុន្តែ​សម្រាប់ទីផ្សារទិញ-លក់ ក៏ដូចជាការអភិវឌ្ឍគម្រោងថ្មីដែលមានតម្លៃមធ្យម និងក្រោមមធ្យមនៅក្នុងតំបន់អភិឌ្ឍន៍មួយចំនួននៅតែមានស្ថានភាពល្អប្រសើរនៅឡើយ។

លោកឧកញ៉ា នួន រិទ្ធី ប្រធានក្រុមប្រឹក្សាភិបាលក្រុមហ៊ុន Khmer Foundation Appraisal (KFA) បានមានប្រសាសន៍ថា នៅក្នុងត្រីមាសទី២ ដើមឆ្នាំ២០២៥នេះ គេសង្កេតឃើញថា វិស័យអចលនទ្រព្យ ហាក់មានភាពប្រសើរជាងដើមឆ្នាំ២០២៤ ពិសេសស្ថានភាពអលចនទ្រព្យនៅតំបន់អភិវឌ្ឍន៍ថ្មី ដូចជាក្រុងប៉ោយប៉ែត ក្រុងបាវិត និងតំបន់ព្រលានយន្តហោះថ្មី ស្ថិតនៅភាគខាងត្បូងរាជធានីភ្នំពេញ ហាក់មានសន្ទុះងើបឡើងវិញគួរឱ្យកត់សម្គាល់។ 

លោកឧកញ៉ា នួន រិទ្ធី បានបញ្ជាក់ថា ៖

« អ្វីដែលនៅតែមានភាពវិជ្ជមានគឺស្ថិតនៅតំបន់អភិវឌ្ឍន៍ថ្មីៗ ស្របទៅនឹងការពង្រីកការអភិវឌ្ឍរបស់រាជរដ្ឋាភិបាល ដូចជា តំបន់ព្រំដែន តំបន់អភិវឌ្ឍន៍ថ្មី ដែលមានការតភ្ជាប់គ្នា។ ជាក់ស្ដែងនៅតំបន់ប៉ែកខាងកើតរាជធានី តំបន់ប៉ែកខាងលិចដែលកំពុងមានសកម្មភាពអភិវឌ្ឍទាំងហេដ្ឋារចនាសម្ព័ន្ធពីរដ្ឋាភិបាល និងវិស័យឯកជនទៅលើវិស័យលំនៅឋាន ដែលធ្វើឱ្យតម្លៃដីនៅតំបន់ទាំងនោះមានចរន្តល្អ»។

ទោះជាយ៉ាងនេះក្តី លោកឧកញ៉ាបានលើកឡើងថា បុរីលំនៅដ្ឋានដែលតម្លៃមធ្យម ឬក្រោមមធ្យម និងអគារសហកម្មសិទ្ធិមួយចំនួន នៅក្នុងក្រុងភ្នំពេញ និងក្រុងព្រះសីហនុជាដើម ហាក់​មានសភាពទ្រឹង ដោយសារការផ្គត់ផ្គង់លើសពីតម្រូវការរបស់អតិថិជន និងមានការលក់បញ្ចុះតម្លៃច្រើនមិនធ្លាប់មាន ចន្លោះពី១០ ទៅ ១៥ភាគរយ ដែលជាឱកាសសម្រាប់អ្នកមានធនធានបញ្ចេញសាច់ប្រាក់ដើម្បីធ្វើការវិនិយោគរកប្រាក់ចំណេញទៅថ្ងៃអនាគត។    

ក្រៅពីទីផ្សារលំនៅឋាន ការកសាងហេដ្ឋារចនាសម្ព័ន្ឋ ដូចជា ស្ពាន ថ្នល់ នៅតាមខ្សែបន្ទាត់ព្រំដែននៃភូមិភាគឦសាន្ត បានធ្វើឱ្យចរន្តនៃការទិញ-លក់ដីធ្លីនៅតំបន់នោះមានភាពល្អប្រសើរ ជាពិសេសដីកសិកម្មនៅតំបន់ខាងលិច និងខាងកើតទីរួមខេត្តក្រចេះតែម្តង ដែលមានតម្លៃចាប់ពី ៤០០០ដុល្លារ ទៅដល់៨០០០ដុល្លារក្នុងមួយហិកតា ឬអាចខ្ពស់ជាងនេះបន្តិចអាស្រ័យទីតាំង និងស្ថានភាពដី។

ស្រដៀងគ្នានេះ លោកឧកញ៉ា ឃាង ពុទ្ធី ប្រធានក្រុមប្រឹក្សា​ភិបាល​សមាគម​អ្នកជំនាញ​អចលនទ្រព្យ​កម្ពុជា មានប្រសាសន៍ថា បើក្រឡេកមើលស្ថានភាពជាក់ស្តែងឃើញថា ខេត្តកណ្តាល ខេត្តតាកែវ និងតំបន់ជាយក្រុងភ្នំពេញភាគខាងត្បូង ជាពិសេស ផ្លូវ៦០ម៉ែត្រ ឆ្ពោះទៅតំបន់ព្រលានយន្តហោះថ្មី នៅមានសក្តានុពលល្អ ហើយទីតាំងសំខាន់មួយទៀតគឺក្រុងបាវិត ដែលកំពុងមានសកម្មភាពអភិវឌ្ឍគួរឱ្យកត់សម្គាល់ក្រោយការសាងសង់ផ្លូវល្បឿនលឿនភ្ជាប់ពីក្រុងភ្នំពេញ ទៅបាវិត ហើយតំបន់មួយទៀតគឺក្រុងប៉ោយប៉ែត។

លោកឧកញ៉ាបានបញ្ជាក់ថា ៖

«ជាក់ស្ដែងនៅពេលនេះ ទីផ្សារលំនៅឋានដែលមានតម្លៃមធ្យម និងលើមធ្យម ជាពិសេស បន្ទប់ខុនដូរនៅក្នុងក្រុងភ្នំ​ពេញគឺមានការផ្គត់ផ្គង់លើសតម្រូវការរួចទៅហើយ ដោយ គម្រោងភាគច្រើនសាងសង់ហើយលក់​មិនទាន់អស់ ដែលត្រូវការពេលវេលាមួយរយៈថែមទៀត។ ពីមុនផ្ទះចាប់ផ្តើមបុកគ្រឹះ គេទៅកក់អស់ៗ តែឥឡូវសង់ហើយលក់មិនទាន់អស់ទៅវិញ ហើយត្រូវការពេលមួយរយៈខ្លីទៀត ដើម្បីឱ្យ​ប្រ​ជា​ជនទិញផ្ទះនោះឱ្យអស់សិន ចាំសាងសង់បន្តទៀត»។

លោក អ៊ុង លុយណា អគ្គនាយកនៃអគ្គនាយកដ្ឋានគោលនយោបាយ នៃក្រសួងសេដ្ឋកិច្ច និងហិរញ្ញវត្ថុ បានលើកឡើងក្នុងវេទិការសាធារណៈស្តីពីការគ្រប់គ្រងម៉ាក្រូសេដ្ឋកិច្ច និងច្បាប់ថវិកាជាតិឆ្នាំ២០២៥នេះ ដោយព្យាករថា វិស័យអចលនទ្រព្យក្នុងឆ្នាំ២០២៥នេះនឹងមានសន្ទុះក្នុងរង្វង់ ២.៦% និងវិស័យសំណង់មានសន្ទុះក្នុងរង្វង់២.៥%។ កំណើនក្នុងកម្រិតទាបក្នុងវិស័យទាំងពីរនេះ ត្រូវបានក្រសួងរកឃើញថា ដោយសារសកម្មភាពសាងសង់ និងការទិញ-លក់មានតម្លៃទាប ចំណែកលំហូរចូលនៃវិនិយោគិនពីបរទេសនៅមានកម្រិតតិចតួចនៅឡើយ៕ វិន ឈុនហ៊ាត