ដូចដែលយើងបានដឹងរួចមកហើយថា ក្រុមមនុស្សវ័យកណ្តាល ឬ Millennials ​ដែលកើតនៅចន្លោះឆ្នាំ១៩៨១ និងឆ្នាំ១៩៩៦ គឺជាក្រុមមនុស្សចំណែកធំបំផុតនៃចំនួនប្រជាជនពិភពលោក ហើយមានលក្ខណៈខុសប្លែកពីក្រុមមនុស្សជំនាន់ផ្សេងៗទៀតទាំងទំនោរចិត្ត និងរបៀបនៃការធ្វើការ។

យ៉ាងណាក៏ដោយ បើទោះជាមានលក្ខណៈខុសគ្នាតិចតួចជាមួយនឹងក្រុមមនុស្សវ័យក្មេង ឬ Generation Z ដែលកើតនៅចន្លោះឆ្នាំ១៩៩៧ ដល់ ឆ្នាំ២០១២ ក្ដី ប៉ុន្តែក្រុមទាំង២អាចនិយាយបានថា ជាក្រុមមនុស្សដែលមិនអាចខ្វះបានឡើយសម្រាប់ការអភិវឌ្ឍពិភពលោកប្រកបដោយចីរភាព Sustainable Development Goals (SDGs) ក្នុងសម័យកាលបច្ចុប្បន្ននេះ។

គោលដៅអភិវឌ្ឍន៍ប្រកបដោយចីរភាព ឬ SDG គឺជាការអំពាវនាវឱ្យពិភពលោកក្នុងការចូលរួមធ្វើសកម្មភាពជាសាកលដើម្បីបញ្ចប់ភាពក្រីក្រ ការពារបរិស្ថាន និងអាកាសធាតុរបស់ផែនដី ហើយធានាថាមនុស្សនៅគ្រប់ទីកន្លែងអាចទទួលបានសន្តិភាព និងវិបុលភាព។ ដូច្នេះប្រសិនបើអ្នកស្ថិតនៅក្នុងជំនាន់ក្រុមមនុស្សទាំងពីរនេះតើអ្នកត្រូវមានទំនួលខុសត្រូវ និងទាមទារនូវលក្ខណៈសម្បត្តិអ្វីខ្លះដើម្បីចូល​រួមកិច្ចការងារដ៏មានសារៈសំខាន់មួយនេះ?

ចំណុចសំខាន់មួយដែលការអភិវឌ្ឍប្រកបដោយចីរភាព SDG ពិតជាត្រូវការក្រុមមនុស្សទាំងពីរប្រភេទនេះគឺជាទំនោរនៃការប្រើប្រាស់ដ៏មានលក្ខណៈពិសេសខុសពីគេ ហើយវាកឺជាកូនសោរដ៏ចំបាច់ក្នុងការឈានទៅសម្រេចបាននូវគោលដៅនៃការអភិវឌ្ឍនេះដែរ។ ប៉ុន្តែសម្រាប់ក្រុមមនុស្សដែលជាក្រុម Millennialsក្តី Gen Z វិញពួកគេក៏ត្រូវការចំណេះដឹង និងជំនាញ និងទំនួលខុសត្រូវមួយចំនួនដែរដើម្បីអាចក្លាយទៅជាចំណែកដ៏សំខាន់ក្នងគោលដៅនៃ SDG ដែលក្នុងនោះរួមមានទាំងចំណេះដឹងផ្នែកសង្គម ឬមសិកាសង្គមត្រូវមានចំណេះដឹងជាមូលដ្ឋានលើបច្ចេកវិទ្យាដែលមិនគួរមើលរំលង។ ក្រៅពីនោះពួកគេត្រូវចាំបាច់យល់ពីអ្វីទៅជាការរស់នៅបែបចម្រុះជាតិសាស ហើយប្រកបដោយសុទិដ្ឋិនិយម និងអាចទទួលយកបទពិសោធន៍ និងយល់ដឹងអំពីការចំណាយប្រកបដោយសីលធម៌បន្ថែមពីលើចំណេះដឹង និងការអប់រំដែលមានស្រាប់ផង។

ជាចំណុចចុងក្រោយដែលពួកគេត្រូវមាននោះគឺជាការចេះថែរក្សាសុខភាពឲ្យបានល្អទាំងផ្លូវការផ្លូវចិត្ត ក៏ដូចជាសុខភាពហិរញ្ញវត្ថុផ្ទាល់ខ្លួនផងបើមិនដូច្នេះទេកិច្ចការងារចូលរួមទាំងឡាយនៅក្នុងសង្គមក៏មិនមានប្រសិទ្ធភាពការស្វែងយល់ពីចំណេះដឹងនានា និងការទទួលយកបទពិសោធន៍ និងការអប់រំថ្មីៗក៏មិនអាចធ្វើឡើងទៅបាននោះដែរ។

គួរឲ្យដឹងដែរថា ក្រុមមនុស្ស Millennial ដែលជាក្រុមមនុស្សកើតនៅចន្លោះឆ្នាំ១៩៨១ ដល់ឆ្នាំ១៩៩៦ មានចំនួនសរុបដល់ទៅ ២១,៦៧ភាគរយនៃពលរដ្ឋពិភពលោកខណៈដែលក្រុម Gen Z មានចំណែកដល់ទៅ​ ២០,៨៨ភាគរយ។ នេះបើយោងតាមតួលេខចុងក្រោយដែលធ្វើឡើងដោយ The Statista សម្រាប់ឆ្នាំ២០២២ កន្លងមកនេះ៕