សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រសួងទេសចរណ៍បានបន្តផ្សព្វផ្សាយ និងណែនាំបណ្ដុះបណ្ដាលដល់អាជីវកម្មលក់ម្ហូបអាហារតាមដងផ្លូវ (Street Food Vendor) សម្រាប់ព្រឹត្តិការណ៍អាស៊ានប៉ារ៉ាហ្គេមលើកទី១២ និងយុទ្ធនាការ«ឆ្នាំទស្សនាកម្ពុជា២០២៣» ដោយមានការចូលរួមពីរដ្ឋបាលរាជធានី-ខេត្ត មន្ទីរទេសចរណ៍ អង្គភាពពាក់ព័ន្ធ ប្រតិបត្តិករទេសចរណ៍ និងអ្នកលក់ដូរតាមដងផ្លូវ បន្ទាប់ពីបញ្ចប់ព្រឹត្តិការណ៍ស៊ីហ្គេមលើកទី៣២ នាពេលថ្មីៗនេះ ។
ក្នុងឱកាសចុះផ្សព្វផ្សាយ និងបណ្ដុះបណ្ដាល ក្រសួងទេសចរណ៍បានស្នើដល់ប្រតិបត្តិករទេសចរណ៍ និងអ្នកលក់ដូរតាមដងផ្លូវ ដូចតទៅ៖
* រៀបចំសោភ័ណភាព អាជីវកម្មរបស់ខ្លួន ដោយឆ្លុះបង្ហាញពីលក្ខណៈវប្បធម៌ ទំនៀមទម្លាប់ប្រពៃណីជាតិខ្មែរ។
* ចូលរួមរក្សានូវសណ្តាប់ធ្នាប់យកចិត្តទុកដាក់ខ្ពស់លើអនាម័យម្ហូបអាហារដែលដាក់លក់ដូរជាប្រចាំ ក៏ដូចជាសម្រាប់ព្រឹត្តិការណ៍អាស៊ានប៉ារ៉ាហ្គេមលើកទី១២ ឆ្នាំ២០២៣នេះ។
* មានដាក់តាំងបញ្ជីរាយនាមសេវាកម្មជា៣ភាសា រួមមាន ភាសាខ្មែរ ភាសាអង់គ្លេស និងភាសាទីបីណាមួយ និងស្របតាមខ្លឹមសារប្រកាសលេខ ០៥២ ប្រក. ចុះថ្ងៃទី២៣ ខែមីនា ឆ្នាំ២០១៧ របស់ក្រសួងទេសចរណ៍។
* ម្ចាស់ ឬអ្នកគ្រប់គ្រងអាជីវកម្មទេសចរណ៍ មិនត្រូវតម្លើងថ្លៃសេវាកម្មរបស់ខ្លួន ឬដោយពុំមានហេតុផលច្បាស់លាស់។
* និងចូលរួមអនុវត្តតាមសារាចរណែនាំលេខ ០០៥ ស្ដីពីការពង្រឹងគុណសេវាកម្មទេសចរណ៍ បដិសណ្ឋារកិច្ចល្អ ដើម្បីអបអរការរៀបចំព្រឹត្តិការណ៍អាស៊ានប៉ារ៉ាហ្គេមលើកទី១២ នៅកម្ពុជា។
ទន្ទឹមនឹងនេះ ក្រសួងទេសចរណ៍ ក៏បានចែកជូនអាវក្រណាត់សម្រាប់ពាក់ការពារ និងរក្សាអនាម័យពេលចម្អិនម្ហូប ដល់អ្នកលក់ដូរតាមដងផ្លូវ ដែលបានចូលរួមវគ្គបណ្តុះបណ្តាល និងជូនទៅមន្ទីរទេសចរណ៍សម្រាប់ចែកជូន បន្ដចំនួន២៥០អាវក្នុងមួយគោលដៅផងដែរ។
លោក គឹម សេរីរ័ត្ន អគ្គលេខាធិការរង គ.ជ.វ.ទ និងជាប្រធាននាយកដ្ឋាន គ្រប់គ្រងសវាកម្មស្នាក់នៅទេសចរណ៍ និងម្ហូបអាហារ បានបញ្ជាក់ថា កម្មវិធីពង្រឹងសេវាកម្ម សម្រាប់វិស័យទេសចរណ៍ និងអ្នកប្រកបអាជីវកម្មលក់ដូរតាមដងផ្លូវ ដើម្បីឆ្ពោះទៅព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ហើយកម្មវត្ថុសំខាន់នៃកម្មវិធីយើងនេះ គឺធ្វើយ៉ាងណា ដើម្បីរំលឹកមូលដ្ឋានអាជីវកម្ម ឱ្យយកចិត្តទុកដាក់សេវាកម្ម ឱ្យពីបញ្ហាអនាម័យ សោភ័ណភាព និងជាពិសេសលើសពីនេះ គឺសុវត្ថិភាព និងទំនុកចិត្តសម្រាប់ភ្ញៀវទេសចរ និងបង្ហាញការត្រៀមខ្លួននៅក្នុងស៊ីហ្គេម និងអាស៊ានប៉ារ៉ាហ្គេម ដោយស្នើឱ្យមានរៀបចំឯកសណ្ឋានឱ្យបានត្រឹមត្រូវ បង្ហាញពីវិជ្ជាជីវៈរបស់ខ្លួន និងការគិតគូរបញ្ហាតម្លៃ ឱ្យរក្សាតម្លៃឱ្យបានសមរម្យ។
កម្មវិធីនេះគឺបានផ្សព្វផ្សាយទៅដល់រាជធានី ខេត្ត មន្ទីរទេសចរណ៍ អង្គភាពពាក់ព័ន្ធ ប្រតិបត្តិករទេសចរណ៍ និងអ្នកលក់ដូរតាមដងផ្លូវ បងប្អូនអាជីវករ ប្រកបរបរលក់ម្ហូបអាហារ ផ្សេងៗតាមដងផ្លូវ ដោយយើងនឹងផ្សព្វផ្សាយ និងណែនាំបន្ថែម ឱ្យគាត់បានយល់ និងយកចិត្តដាក់ខ្ពស់ សម្រាប់ភ្ញៀវ ដែលមកទស្សនា និងប្រើប្រាស់ចំណីអាហារតាមដងផ្លូវនេះ ខណៈពេលដែលមានកំណើនតម្រូវការ មានកំណើនភ្ញៀវនៅក្នុងព្រឹត្តការណ៍ស៊ីហ្គេម និងអាស៊ានប៉ារ៉ាហ្គេម ៕
Account
Security
Favourite Content