បរទេស៖ យោងតាមប្រភពព័ត៌មានពីរ៉យទ័រ បានរាយការណ៍ថា ទីផ្សារប្តូរប្រាក់រុស្ស៊ី Moscow Exchange (MOEX) បានផ្អាកការជួញដូរជាប្រាក់ដុល្លារ និងប្រាក់អឺរ៉ូ ដោយសាររតនាគារសហរដ្ឋអាមេរិកបង្ហាញពីទណ្ឌកម្មថ្មីមកលើប្រទេសនេះ។

ការផ្អាកពាណិជ្ជកម្មប្រាក់ដុល្លារ និងប្រាក់អឺរ៉ូនៅលើវេទិកានេះកំពុងរីកដុះដាលនាពេលថ្មីៗនេះ និងបានចូលជាធរមានកាលពីថ្ងៃព្រហស្បតិ៍ សប្ដាហ៍កន្លងទៅនេះ។ MOEX បានរាយការណ៍ថា វេទិកានេះទទួលបានការចុះឈ្មោះសកម្មភាពវិនិយោគឯកជនក្នុងចំនួនខ្ពស់នៅកាលពីខែកុម្ភៈ ជាមួយនឹងបុគ្គលសរុបចំនួន ៤,១ លាននាក់ធ្វើប្រតិបត្តិការនៅលើវេទិកានេះ។ កាល​ពី​ខែ​មុន ទំហំ​ពាណិជ្ជកម្ម​សរុប​នៅ​ទូទាំង​ទីផ្សារ​របស់​វេទិកា​នេះ​មាន​តម្លៃ ១២៦,៧ ទ្រី​លាន​រូប៊ល (១,៤ ទ្រី​លាន​ដុល្លារ) បើ​ធៀប​នឹង ៩៤,២ ទ្រីលានរូប៊ល (១ ទ្រី​លាន​ដុល្លារ) ក្នុង​អំឡុង​ពេល​ដូច​គ្នា​កាល​ពី​ឆ្នាំ​មុន។

MOEX ទទួលស្គាល់ដែរថា ការផ្អាកនេះប៉ះពាល់ដល់ការជួញដូរជាមួយបរទេសសម្រាប់លោហធាតុ ការជួញដូរភាគហ៊ុន និងការជួញដូរប្រាក់នៅលើទីផ្សារពាណិជ្ជកម្មដ៏ធំបំផុតរបស់ប្រទេសរុស្ស៊ី។ យ៉ាងណាមិញ ការជួញដូរប្រាក់នៅតែបន្តដូចធម្មតាលើកលែងតែប្រាក់ដុល្លារ និងអឺរ៉ូ ខណៈដែលធនាគារកណ្តាលរបស់រុស្ស៊ីបានពន្យល់លម្អិតអំពីបញ្ហានេះថា ប្រតិបត្តិការជាប្រាក់ដុល្លារអាមេរិក និងប្រាក់អឺរ៉ូនឹងបន្តនៅតាមបញ្ជរប្តូរប្រាក់។ ដើម្បីកំណត់អត្រាប្តូរប្រាក់ ធនាគារកណ្តាលរុស្ស៊ីនឹងប្រើប្រាស់កំណត់ត្រាធនាគារ និងព័ត៌មានពីវេទិកាពាណិជ្ជកម្មតាមបញ្ជរឌីជីថល។

នៅព្រឹកថ្ងៃពុធនេះ រតនាគារសហរដ្ឋអាមេរិកបានដាក់ចេញនូវវិធានការថ្មីនៃការរឹតបន្តឹងប្រឆាំងនឹងប្រទេសរុស្ស៊ី ដោយផ្តោតលើហេដ្ឋារចនាសម្ព័ន្ធហិរញ្ញវត្ថុមូលដ្ឋានរបស់ប្រទេស។ រដ្ឋមន្ត្រីក្រសួងរតនាគារអាមេរិក លោកស្រី Janet Yellen បានអះអាងថា ប្រទេសរុស្ស៊ីបានផ្លាស់ប្តូរទាំងស្រុងទៅជាសង្គ្រាមសេដ្ឋកិច្ច ហើយរុស្ស៊ីកំពុងនៅឆ្ងាយពីប្រព័ន្ធហិរញ្ញវត្ថុអន្តរជាតិ។ វិធានការនាពេលបច្ចុប្បន្ននេះកំពុងកំណត់គោលដៅលើប្រភពចុងក្រោយនៃទំនិញ និងគ្រឿងសម្ភារៈអន្តរជាតិ រួមទាំងការពឹងផ្អែកលើការផ្គត់ផ្គង់សំខាន់ៗពីប្រទេសទីបី។

ទន្ទឹមនឹងនេះ ធនាគារកណ្តាលរុស្ស៊ីបានប្រកាសថា អត្រាប្តូរប្រាក់រូប៊ល និងប្រាក់យ័ននឹងកំណត់ទិសដៅសម្រាប់ជួញដូរជាមួយរូបិយប័ណ្ណផ្សេងទៀតនៅលើទីផ្សារប្តូរប្រាក់ម៉ូស្គូ (MOEX)។ អត្រាប្តូរប្រាក់រូប៊ល និងប្រាក់យ័ននឹងក្លាយជាចំណុចយោងសម្រាប់អ្នកចូលរួមក្នុងទីផ្សារ ខណៈដែលប្រាក់យ័នមានចំណែកនៅក្នុងការជួញដូរនៅទីក្រុងមូស្គូ ៥៤ ភាគរយក្នុងខែឧសភា។ ដូច្នេះហើយ ​ប្រាក់​យ័ន​បាន​ក្លាយ​ជា​រូបិយប័ណ្ណ​សំខាន់​ក្នុង​ការ​ជួញដូរ​ប្តូរ​ប្រាក់នៅលើទីផ្សាររុស្ស៊ី​រួច​ទៅ​ហើយ​។

គួរឲ្យបញ្ជាក់ដែរថា ភាគហ៊ុននៃប្រាក់ដុល្លារនិងប្រាក់អឺរ៉ូនៅក្នុងទីផ្សាររុស្ស៊ីបានធ្លាក់ចុះជាប់គ្នាក្នុងរយៈពេលពីរឆ្នាំចុងក្រោយនេះ ដែលជាលទ្ធផលនៃការប្តូរទិសនៃលំហូរពាណិជ្ជកម្មទៅកាន់បូព៌ា និងការផ្លាស់ប្តូររូបិយប័ណ្ណនៃការទូទាត់ទៅជាប្រាក់រូប៊ល ឬ ប្រាក់យ័នចិន។ ប្រទេសរុស្ស៊ីបានចាប់ផ្តើមចៀសឆ្ងាយពី ប្រាក់ដុល្លារ និងប្រាក់អឺរ៉ូក្នុងពាណិជ្ជកម្មបរទេស ចំពេលមានការដាក់ទណ្ឌកម្មរបស់លោកខាងលិចជុំវិញជម្លោះអ៊ុយក្រែន។ ចាប់តាំងពីពេលនោះមក រុស្ស៊ីបានកាត់បន្ថយយ៉ាងខ្លាំងនូវចំនួនគណនីធនាគារ រួមទាំងប្រតិបត្តិការរវាងក្រុមហ៊ុន និងស្ថាប័នហិរញ្ញវត្ថុដែលពាក់ព័ន្ធនឹងរូបិយប័ណ្ណលោកខាងលិច។