កំពង់ធំ ៖ លម៉ើ ជាប្រភេទផ្លែឈើម្យ៉ាងដែលមានពណ៌លឿងស្រស់ រសជាតិផ្អែមឆ្ងាញ់ មិនថាជាផ្លែស្រស់ ឬច្នៃជាដំណាប់លម៉ើនោះទេ ហើយមានតម្លៃគួរសម ប៉ុន្តែថ្មីៗនេះ មានផលិតផលមួយប្រភេទដែលផលិតឡើងនៅក្នុងស្រុកជាប្រភេទស្រាដែលកែច្នៃ និងបិតចេញពីផ្លែលម៉ើស្រស់ៗ មានរសជាតិឆ្ងាញ់ប្លែក និងកំពុងទទួលបានចំណាប់អារម្មណ៍ច្រើនពីសំណាក់អតិថិជនជាតិ និងអន្តរជាតិគួរឱ្យកត់សម្គាល់។

ស្រាលម៉ើ S D F ជាយីហោសិប្បកម្មផលិតស្រាដែលច្នៃចេញពីផ្លែលម៉ើស្រស់ៗ មានទីតាំងនៅភូមិសាលាឃុំ ឃុំទ្រៀល ស្រុកតាំងគោក ខេត្តកំពង់ធំ ដែលបានចាប់ផ្ដើមស្រាវជ្រាវ និងផលិតនៅឆ្នាំ២០២១ និងចេញលក់ជាផ្លូវការនៅចុងឆ្នាំ២០២២ ជាផលិតស្រាក្នុងស្រុកមួយប្រភេទមានរសជាតិឆ្ងាញ់ ប្លែក ពិសេសមានអត្ថប្រយោជន៍ច្រើនចំពោះសុខភាពអ្នកទទួលទាន។

អ្នកស្រី ឆុង សោភា ម្ចាស់សិប្បកម្មផលិតស្រាលម៉ើ S D F បានប្រាប់ AMS ឱ្យដឹងថា ក្រុមគ្រួសាររបស់អ្នកស្រីបានចាប់ផ្ដើមដាំដើមលម៉ើនៅឆ្នាំ២០២០ និងទិញលម៉ើពីប្រភេទដើម្បីសិក្សារស្រាវជ្រាវផលិតនៅឆ្នាំ២០២១ ដោយមានស្វាមីដែលបានទៅរៀនបច្ចេកទេសក្នុងការផលិតនៅបរទេស។

អ្នកស្រីបញ្ជាក់ថា ៖

“មូលហេតុដែលពួកខ្ញុំដាំដើមលម៉ើ ដោយសារគិតថា លម៉ើ ជាផ្លែឈើដែលមានតម្លៃ មានអាយុវែង ទទួលផលបានយូរឆ្នាំ។ ប៉ុន្តែក្រោយពេលពិចារណាទៅលើការប្រមូលទិន្នផលដែលមានចំការជាច្រើនក៏ប្រមូលទិន្នផលដូចគ្នា ដែលអាចធ្វើឱ្យលម៉ើធ្លាក់ថ្លៃនោះ ក៏រិះរកវិធីសាស្ត្រថ្មីដើម្បីធ្វើយ៉ាងណាអាចរក្សាតម្លៃបាន ដោយច្នៃផ្លែលម៉ើធ្វើជាផលិតផលថ្មីដូចជា ស្ករលម៉ើ ទឹកលម៉ើ និងកាហ្វេគ្រាប់លម៉ើ ដូចដែលបណ្តាប្រទេសមួយចំនួនបានអនុវត្តនោះ ទើបពួកយើងនឹកឃើញផលិតផល ស្រាលម៉ើ ដែលកាន់តែទុកយូរ កាន់តែមានគុណភាព មានរសជាតិឆ្ងាញ់។”

អ្នកស្រីបន្តថា ៖

“ចំពោះស្រាលម៉ើ បច្ចុប្បន្ននេះមាន ២រសជាតិ គឺ រសជាតិដើម និងរសជាតិស្នេហ៍គ្រាដំបូង ដែលមានកម្រិតអាល់កុល ១២ភាគរយ ចំណុះ ៣៧៥ មីលីលីត្រ និងមានតម្លៃ ២៥ ០០០រៀលក្នុងមួយដប។ សម្រាប់ការផលិតដំបូង​ សិប្បកម្មបានចេញលក់ប្រមាណ ៣០០០ ដប និងមានក្នុងស្តុកប្រមាណ ១ម៉ឺនដបផងដែរ។”

អ្នកស្រីបានប្រាប់ឱ្យដឹងថា សម្រាប់ចំណុចពិសេស គឺស្រាលម៉ើជាប្រភេទស្រាប៉ូវកម្លាំង ជួយសុខភាព ជួយអាការៈស្ពឹកស្រពន់ ឈឺឆ្អឹងឆ្អែង ជួយឱ្យមានថាមពល ជួយដុតខ្លាញ់ ពិសេសគឺពុំមានសារធាតុមេតាណុលដែលជាសារធាតុពុល ពេលអ្នកទទួលទានហើយគេងលក់ស្រួល និងមិនធ្វើទុក (ក្នុងករណីទទួលទានមិនលើសកម្រិត)។ 

ពាក់ព័ន្ធនឹងដំណាក់កាលនៃការផលិតវិញ ម្ចាស់សិប្បកម្មខាងលើរៀបរាប់ថា គឺមានចែកចេញជា ២ គឺដំណាក់កាលផលិត និងដំណាក់បន្ទំ ដែលការបន្ទំនេះផងដែរ ទុកកាន់តែយូរកាន់តែល្អ ហើយបើរាប់ចាប់ពីការផលិតរហូតដល់អាចច្រកដបបាន គឺត្រូវប្រើរយៈពេលប្រមាណ ៣ខែទើបទទួលបានផលិតសម្រេច ខណៈដែលផ្លែលម៉ើ ១គីឡូក្រាមអាចចម្រាញ់បានស្រា ១លីត្រ។

ដោយឡែក វត្ថុធាតុដើមក្នុងការផលិតស្រាលម៉ើ រួមមាន ផ្លែលម៉ើស្រស់ ទឹកឃ្មុំ និងតំបែរ ដែលជាវត្ថុធាតុដើមក្នុងស្រុក លើកលែងតែតំបែរដែលជាទំនិញនាំចូល។ ចំពោះការផ្គត់ផ្គង់ផ្លែលម៉ើ អ្នកស្រី សោភា បានអះអាងថា មិនមានបញ្ហាខ្វះខាតនោះឡើយដោយសារមានចំការលម៉ើធំៗទាក់ទងមកសហការច្រើន ពោលគឺឱ្យតែស្រាមានទីផ្សារគឺមិនខ្វះវត្ថុធាតុដើមនោះឡើយ។ 

អ្នកស្រីបន្តថា ៖

“ចំពោះទំហំនៃការផលិត យើងត្រូវគិតជាឆ្នាំតែម្ដងដោយសារវត្ថុធាតុដើមជាគោលគឺផ្លែលម៉ើ យើងអាចប្រមូលទិញបានតែ ៣ខែប៉ុណ្ណោះក្នុងមួយឆ្នាំ ពោលគឺចន្លោះខែមិថុនា ដល់ខែកញ្ញា ដែលយើងត្រូវប្រមូលផលលម៉ើផ្ទាល់ខ្លួនប្រមាណ ៥០ភាគរយ និងសម្រុកទិញស្តុកទុកប្រមាណ ៥០ភាគរយផ្សេងទៀតសម្រាប់ត្រៀមផលិត។”

គួរបញ្ជាក់ដែរថា អ្នកស្រី សោភា និងគ្រួសារបានចាប់ផ្ដើមផលិតនៅឆ្នាំ២០២១ គឺផលិតបរិមាណតិចៗត្រឹមកែវ ១០លីត្រ ដើម្បីសាកល្បងរករសជាតិមួយដែលជាទីចូលចិត្តរបស់បងប្អូនខ្មែរ ហើយដើមទុនភាគច្រើនគឺចំណាយលើការដាំលម៉ើ និងចំណាយចម្បងផ្សេងទៀតគឺការទិញសម្ភារផលិតស្រាដែលត្រូវនាំចូល ទើបអាចផលិតស្រាដែលមានគុណភាពអាចប្រកួតប្រជែងបាន។

ជាចុងក្រោយ អ្នកស្រី សោភា ក៏បានបង្ហាញពីគម្រោងនាពេលអនាគតផងដែរ ដោយអ្នកស្រីចង់ពង្រីកការផ្គត់ផ្គង់ឱ្យបានគ្រប់ខេត្តក្រុង និងនៅតាមផ្សារទំនើបនានា ធ្វើយ៉ាងណាឱ្យប្រជាជនខ្មែរអាចទទួលទាននូវផលិតផលស្រាក្នុងស្រុកដែលមានគុណភាព និងគុណប្រយោជន៍ខ្ពស់ចំពោះសុខភាព ក៏ដូចជាជួយជំរុញ និងគាំទ្រផលិតផលខ្មែរផងដែរ៕