ភ្នំពេញ៖ ក្រុមហ៊ុនចិនដ៏ធំមួយបានបង្ហាញពីបំណងចង់វិនិយោគលើកសិផលខ្មែរ ដូចជា ទុរេន ដូងស្រស់ និងស្វាយចន្ទី ដើម្បីនាំចេញទៅកាន់ទីផ្សារប្រទេសចិន និងទីផ្សារប្រទេសផ្សេងៗ។ ការបង្ហាញពីឆន្ទៈវិនិយោគនៅកម្ពុជានេះ បានកើតឡើងនៅពេលតំណាងក្រុមហ៊ុន Zhengzhou Chen’s Sun Fruits and Vegetables International Trade Co.,Ltd បានជួបពិភាក្សាជាមួយឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីរសៀលថ្ងៃទី០៩ ខែមករា​ ឆ្នាំ២០២៥​ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

ក្នុងឱកាសនៃជំនួប ឯកឧត្តមរដ្ឋមន្ត្រី បានសម្តែងនូវការស្វាគមដែលក្រុមហ៊ុនមានគោលបំណងចង់វិនិយោគនូវកសិផលកម្ពុជា​ ដើម្បីនាំចេញទៅកាន់ទីផ្សារប្រទេស​ចិន​ និងទីផ្សារប្រទេសផ្សេងៗ។

ឯកឧត្តម ​បានលើកឡើងថា៖

«កម្ពុជាក្រៅពីទុរេន ដូងស្រស់និងស្វាយចន្ទី ​នៅមានកសិផលសក្តានុពលជាច្រើនទៀតរួមមាន​ ផ្លែស្វាយ​ ផ្លែមៀន​ និង ចេកពងមាន់​ដែលមានរសជាតិឆ្ងាញ់​និងគុណភាពល្អ​ជាពិសេសកម្ពុជាមាននីតិវិធីនៃការនាំចេញច្បាស់លាស់ទៅកាន់ប្រទេសចិន​ ប្រការសំខាន់គឺទាមទារការវិនិយោគលើការ​វេចខ្ចប់​ កែច្នៃ​ និង អាចនាំចេញទៅកាន់ទីផ្សារអន្តរជាតិ»។

ឯកឧត្តមរដ្ឋមន្ត្រី​បានបញ្ជាក់បន្ថែមថា៖​កម្ពុជាស្វាគមនូវរាល់វិនិយោគិន​ដែលមានបំណងចង់វិនិយោគលើការកែច្នៃ​និងធ្វើពាណិជ្ជកម្ម​​នាំចេញ​ ដោយអាចសហការធ្វើការដាំដុះជាមួយប្រជាកសិករ​ កំណត់ស្តង់ដាបច្ចេកទេសច្បាស់លាស់​ មានកិច្ចសន្យាផលិតកម្មត្រឹមត្រូវ​ និងអាចទទួលទិញត្រលប់ក្នុងតម្លៃចរចា​ ដោយមិនប្រកួតប្រជែងលើការដាំដុះជាមួយប្រជាកសិករឡើយ។

ទន្ទឹមនឹងនេះ ឯកឧត្តមរដ្ឋមន្ត្រី​ បានផ្តល់ការណែនាំដល់ភាគីក្រុមហ៊ុនត្រូវធ្វើការកំណត់ស្តង់ដា​នៃកសិផលកម្ពុជាទៅកាន់ទីផ្សារប្រទេសចិន​ និងការធ្វើទីផ្សារផលិតផល​ដើម្បីឱ្យអ្នកប្រើប្រាស់មានការទទួលស្គាល់​ ដែលជាកត្តាចាំបាច់​ ជំរុញឱ្យផលិតផលលក់បានក្នុងតម្លៃថ្លៃ​និងមានតម្លៃបន្ថែមខ្ពស់​ ហើយកម្ពុជាមានគោលបំណងប្រកួតប្រជែងលើផលិតផលដែលមានគុណភាពល្អប្រណិត​ និងមានរសជាតិឆ្ងាញ់​ ដោយមិនប្រកួតប្រជែងបរិមាណ។

ក្នុងឱកាសនេះដែរ​ ឯកឧត្តមរដ្ឋមន្ត្រី​ បានលើកទឹកចិត្តដល់ភាគីក្រុមហ៊ុន​សហការជាមួយក្រសួងកសិកម្ម​ ក្នុងការចុះពិនិត្យទីតាំង​ និងគុណភាពកសិផលកម្ពុជាដូចបានរៀបរាប់ខាងលើ​ដើម្បីទទួលបានព័ត៌មានគ្រប់ជ្រុងជ្រោយ​ពេញលេញ​និងមានភាពច្បាស់​លាស់​ក្នុងការវិនិយោគ​និងជូនពរដល់ក្រុមហ៊ុនទទួលបានលទ្ធផលជោគជ័យ​ ព្រមទាំងអាចនាំចេញនូវកសិផលកម្ពុជាទៅកាន់ទីផ្សារអន្តរជាតិបានពិតប្រាកដ។

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានលើកឡើងថា ៖ ក្នុងរយៈពេលមួយទសវត្សរ៍ចុងក្រោយនេះ រំហូរវិនិយោគចិនមកកម្ពុជាមានកំណើនខ្ពស់ជារៀងរាល់ឆ្នាំហើយក្នុងរយៈពេលប្រមាណជិត៨ខែ ដើមឆ្នាំ២០២៤ ការវិនិយោគចិនបានជាប់ចំណាត់ថ្នាក់លេខ១ក្នុងទំហំវិនិយោគប្រមាណ៥៣%នៃប្រភពវិនិយោគទុនសរុប។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍នាពេលកន្លងមកថា៖ កម្ពុជា ជាប្រទេសដែលមានសក្តានុពលខ្ពស់លើវិស័យកសិកម្ម ដូច្នេះនេះគឺជាឱកាសសម្រាប់អ្នកវិនិយោគបរទេសមកបណ្តាក់ទុន ដោយរាប់តាំងពីការដាំដុះ ប្រមូលទិញ និងការកែច្នៃ សម្រាប់ផ្គត់ផ្គង់ទីផ្សារក្នុងតំបន់ ក៏ដូចជានៅលើទីផ្សារអន្តរជាតិផងដែរ។

គួរជម្រាបផងដែរថា៖ ថ្មីៗនេះក្រុមហ៊ុន DOMI Biotechnology Co., Ltd. របស់ចិន ដែលមានជំនាញកែច្នៃផ្លែឈើស្រស់ ជាពិសេស ផ្លែដូង និងទុរេន ដែលបច្ចុប្បន្នមានទីតាំងនិងកំពុងដំណើរការនៅប្រទេស​ថៃ ក៏បានបង្ហាញពីគោលបំណងរបស់ខ្លួនក្នុងការស្វែងយល់បន្ថែមពីឱកាសបណ្តាក់ទុនបង្កើតរោងចក្រកែច្នៃផ្លែឈើស្រស់នៅកម្ពុជាសម្រាប់នាំចេញទៅប្រទេសចិន សហរដ្ឋអាមេរិក អូស្ត្រាលី មជ្ឈិមបូព៌ា និងអ៊ីតាលី៕