ប៉េកាំង ៖ ចិន នៅតែជាប្រធានបទដ៏សំខាន់របស់ក្រុមអ្នកឃ្លាំមើលការវិវឌ្ឍន៍គ្រឿងសព្វាវុធរបស់ពិភពលោក ហើយជៀសមិនផុតនោះទេអំពីផែនការសំងាត់នៃការផលិត និងអភិវឌ្ឍសព្វាវុធថ្មីៗ ទំនើបៗ ប៉ុន្តែក្នុងនោះអ្វីដែលគួរឲ្យគ្រប់គ្នាតាមដានជាងគេបំផុតនោះគឺជាយន្តហោះចម្បាំងជំនាន់ទី៦ Sixth-Gernation Fighter។

ទោះបីជាមិនបានប្រកាសជាសាធារណៈ និងលាក់បាំងរហូតមកក្តី ប៉ុន្តែផែនការអភិវឌ្ឍយន្តហោះចម្បាំងជំនាន់ទី៦នេះបានធ្វើឲ្យពិភពលោកដឹងកាន់តែច្បាស់តាំងតែពីឆ្នាំ២០១៩មកម្ល៉េះនៅពេលដែលវាត្រូវបានបែកធ្លាយនៅក្នុងបណ្តាញសង្គមចិន WeChat ដោយក្រុមហ៊ុនសាជីវកម្មឧស្សាហកម្មអាកាសចរណ៍នៃប្រទេសចិន​ Aviation Industry Corporation of China (AVIC)។

នៅក្នុងបទសំភាសមួយជាមួយនឹងក្រុមអ្នកកាសែត ប្រធានផ្នែកឌីសាញនៃក្រុមហ៊ុន ​Chengdu Aerospace Corp., ជាបុត្រសម្ព័ន្ធរបស់សាជីវកម្ម AVIC លោក Wang Haifeng បាននិយាយថា ការងារស្រាវជ្រាវដើម្បីអភិវឌ្ឍយន្តហោះចម្បាំងជំនាន់ថ្មីរបស់ចិនបានត្រៀមរួចហើយ និងធ្វើយ៉ាងណាដើម្បីអាចយកវាមកប្រើប្រាស់ក្នុងកិច្ចការងារការពារដែនអាកាសនិងដែនទឹករបស់ចិននៅត្រឹមឆ្នាំ២០៣៥។

កាលពីឆ្នាំនោះ លោក Wang ក៏បានលើកឡើងដែរអំពីមុខងារសំខាន់ៗរបស់យន្តហោះចម្បាំងជំនាន់ថ្មីដែលមានទាំងជម្រើសគ្មានពីឡុតបើក និងមានពីឡុតបើក មុខងារដែលមានបំពាក់បច្ចេកវិទ្យាឆ្លាតវ៉ៃ AI ក៏ដូចជាការបង្កើនប្រសិទ្ធភាពនៃបច្ចេកវិទ្យា sensor ឲ្យបានកាន់តែធំនៅគ្រប់មុំទៀតផង។

នៅក្នុងឆ្នាំ២០២២ មេបញ្ជាការទ័ពអាកាសអាមេរិកបានអះអាងថា កិច្ចខិតខំរបស់ចិនកំពុងស្ថិតនៅក្នុងដំណើរការរួចទៅហើយ។ បន្ថែមលើសពីនេះ លោក Rick Joe ដែលជាអ្នកតាមដានព័ត៌មានរបស់សព្វាវុធមហាយក្សចិនក៏បានបង្ហាញពីភាពជឿជាក់ថា ទាំងកិច្ចការងារឯកសារការឌីសាញរបស់ក្រុមការងារ AVIC សម្រាប់យន្តហោះចម្បាំងជំនាន់ទី៦នឹងក្លាយទៅជាការពិតក្នុងពេលឆាប់ៗនេះ ហើយមិនត្រឹមតែប៉ុណ្ណោះលោកក៏បានតាមដានឃើញតាមប្រព័ន្ធផ្កាយរណបអំពីទីតាំង និងរូបរាងខ្លះៗរបស់វាផងដែរ ដែលកំពុងស្ថិតនៅក្រោមការធ្វើការនៅឯមូលដ្ឋានស្រាវជ្រាវអវកាស Chengdu Aerospace កាលពីខែតុលាឆ្នាំ២០២១ ហើយយន្តហោះនេះទំនងជាបានហោះហើរសាកល្បងខ្លះមកហើយដែរ។

យ៉ាងណាក៏ដោយ ទោះបីជាមិនអាចបញ្ជាក់ និងស្រាវជ្រាវរកបានព័ត៌មានលំអិតបន្ថែមអំពីបច្ចេកវិទ្យាយន្តហោះជំនាន់ថ្មីនេះ ប៉ុន្តែលោក Joe បានកំណត់ឈ្មោះយន្តហោះចម្បាំងនេះអាចនឹងមានឈ្មោះថា J-XD បើនិយាយអំពីបច្ចេកវិទ្យាម៉ាស៊ីនវិញ មកទល់ពេលនេះលោកអាចប៉ាន់ស្មានថាមិនទាន់មានកម្រិតដល់យន្តហោះចម្បាំងទំនើបបំផុតរបស់អាមេរិកនៅឡើយទេ។

ប្រសិនបើអ្វីៗដើររលូនទៅតាមផែនការមែននោះគេជឿជាក់ថា យន្តហោះចម្បាំងជំនាន់ទី៦នេះនឹងត្រូវការចាំបាច់ពេលវេលា៥ឆ្នាំក្នុងការធ្វើតេស្តហោះហើរសាកល្បងជាផ្លូវការលើកដំបូងមុនឆ្នាំ២០៣៥ ដែលបានកំណត់ ហើយមានន័យថារូបរាង និងបច្ចេកវិទ្យាទាំងអស់នឹងអាចផលិតរួចរាល់នៅត្រឹមឆ្នា២០២៨យ៉ាងយូរ។

គួរឲ្យដឹងដែរថា បច្ចុប្បន្នយន្តហោះចម្បាំង J-20 គឺជាម៉ូដេលយន្តហោះចម្បាំងជំនាន់ទី៥របស់ប្រទេសចិន និងត្រូវបានអភិវឌ្ឍ ផលិតដោយ PLAAF ដែលវាត្រូវបានដាក់ឲ្យធ្វើការហោះហើរជាលើកដំបូងតាំងតែពីឆ្នាំ២០១១មកម្ល៉េះ ហើយអាចបង្ហាញខ្លួនជាផ្លូវការកាលពីឆ្នា២០១៦ ដែលយន្តហោះប្រភេទនេះអាចមានតម្លៃប្រមាណជា១០០ទៅ១២០លានដុល្លារក្នុងមួយគ្រឿង៕