បរទេស ៖ យោងតាមប្រភពព័ត៌មានពីរ៉យទ័របានរាយការណ៍ថា សហភាពអឺរ៉ុបបានអនុម័តទណ្ឌកម្មជុំទី ១៤ ប្រឆាំងនឹងរុស្ស៊ីជុំវិញជម្លោះអ៊ុយក្រែនកាលពីថ្ងៃចន្ទកន្លងទៅនេះ។ ទន្ទឹមនឹងនេះ វិធានការថ្មីនេះបានកំណត់គោលដៅលើវិស័យដែលមានតម្លៃសម្រាប់សេដ្ឋកិច្ចរុស្ស៊ី ដូចជា ថាមពល ហិរញ្ញវត្ថុ និងពាណិជ្ជកម្ម។ លើសពីនេះ អឺរ៉ុបកំពុងព្យាយាមរារាំងទីក្រុងម៉ូស្គូ និងដៃគូពាណិជ្ជកម្មរបស់ខ្លួនពីការគេចវេសទណ្ឌកម្មរបស់សហភាពអឺរ៉ុបផងដែរ។

សហភាពអឺរ៉ុបបានកំណត់គោលដៅឧស្ម័នធម្មជាតិរាវ (LNG) របស់រុស្ស៊ីជាលើកដំបូង រួមមានប្រតិបត្តិការផ្ទុកឡើងវិញ ការផ្ទេរពីកប៉ាល់មួយទៅកប៉ាល់មួយទៀត និងការដឹកជញ្ជូនតាមកប៉ាល់ក្នុងគោលបំណងនាំចេញទៅកាន់ប្រទេសទី៣ តាមរយៈសហភាពអឺរ៉ុបត្រូវបានហាមឃាត់។

ក្នុងចំណោមវិធានការផ្សេងទៀត គឺការទប់ស្កាត់លើការនាំចេញទំនិញដែលសហភាពអឺរ៉ុបជឿថារួមចំណែកដល់ការលើកកម្ពស់សមត្ថភាពឧស្សាហកម្មរបស់រុស្ស៊ី ដូចជា សារធាតុគីមី រ៉ែម៉ង់ហ្គាណែស សមាសធាតុកម្រ ប្លាស្ទិក គ្រឿងចក្រ ម៉ូនីទ័រ និងឧបករណ៍អគ្គិសនីជាដើម។ មិនត្រឹមតែប៉ុណ្ណោះ សហភាពអឺរ៉ុបក៏បានរឹតបន្តឹងការនាំចេញរបស់ប្រទេសទី ៣ ដូចជា ចិន កាហ្សាក់ស្ថាន កៀហ្ស៊ីស៊ីស្ថាន តួកគី និងអារ៉ាប់រួម ជុំវិញការផ្គត់ផ្គង់ទំនិញ និងបច្ចេកវិទ្យាទៅកាន់ប្រទេសរុស្ស៊ី។ បន្ថែមពីនេះ អេល្យូមរបស់រុស្ស៊ី ដែលមានសារៈសំខាន់សម្រាប់ប្រតិបត្តិការឧស្សាហកម្មជាច្រើនដូចជា ការផលិតឧបករណ៍អេឡិចត្រូនិក ខ្សែកាបអុបទិក និង semiconductors ក៏ត្រូវបានហាមឃាត់ដូចគ្នាសម្រាប់ការនាំចូលផងដែរ។

ចំពោះវិស័យហិរញ្ញវត្ថុ ក្រុមប្រឹក្សាសហភាពអឺរ៉ុបហាមឃាត់ប្រព័ន្ធធនាគាររបស់រុស្ស៊ីដែលមានមុខងារស្រដៀងនឹង SWIFT ។ ប្រព័ន្ធផ្ញើសារអន្តរធនាគារ (SPFS) ត្រូវបានបង្កើតឡើងដោយធនាគារកណ្តាលរុស្ស៊ីបន្ទាប់ពីប្រទេសនេះត្រូវបានកាត់ផ្តាច់ពី SWIFT ដែលជាផ្នែកនៃទណ្ឌកម្មពីមុន។ ការរឹតបន្តឹងនេះត្រូវបានកំណត់គោលដៅលើបុគ្គល និងអង្គភាពចំនួន ១១៦ ដែលមានជាប់ពាក់ព័ន្ធក្នុងស្ថានភាពទាក់ទងនឹងអ៊ុយក្រែន។

ជាការឆ្លើយតប ទីក្រុង​ម៉ូស្គូ​ចាត់​ទុក​ទណ្ឌកម្ម​នេះ​ថា​ជា​ការ​ខុស​ច្បាប់។ ប្រធានាធិបតីរុស្ស៊ី លោក Vladimir Putin បាននិយាយថា ប្រទេសលោកខាងលិចកំពុងព្យាយាមធ្វើឱ្យសេដ្ឋកិច្ចរុស្ស៊ីធ្លាក់ចុះ និងធ្វើឱ្យមានការកើនឡើងនៃភាពតានតឹងផ្នែកសង្គម និងនយោបាយនៅក្នុងប្រទេសបើទោះបីជាការប៉ុនប៉ងរបស់ពួកគេគ្មានប្រយោជន៍ក៏ដោយ។ ជាការឆ្លើយតបទៅនឹងទណ្ឌកម្មកំណត់គោលដៅលើឧស្ម័នធម្មជាតិរាវ (LNG) របស់រុស្ស៊ី លោក Dmitry Peskov អ្នកនាំពាក្យវិមានក្រឹមឡាំង និយាយថា ប្រទេសលោកខាងលិចកំពុងដាក់សម្ពាធលើខ្លួនឯង ហើយរុស្ស៊ី​នឹង​ព្យាយាម​កាត់​បន្ថយ​ផលប៉ះពាល់ និង​ការពារ​ផល​ប្រយោជន៍​ជាតិ​របស់​ខ្លួន៕