បើទោះបីជាស្ថិតនៅក្នុងស្ថានភាពដែលពិភពលោកកំពុងជួបវិបត្តិ ប៉ុន្តែដោយសារតែបរិបថនៃឧស្សាហកម្ម និងបច្ចេកវិទ្យាជឿនលឿននាពេលបច្ចុប្បន្ន ចំពោះការប្រកបមុខរបរអាជីវកម្មមួយចំនួនហាក់មិនមានភាពរាំងស្ទះទាំងស្រុងនោះទេ ឲ្យតែម្ចាស់អាជីវកម្មមានភាពបត់បែន និងរត់តាមបរិបថថ្មីនៃទីផ្សារបែបបច្ចេកវិទ្យាជំនួសវិញ ពីព្រោះថាការប្រកួតប្រជែងកំពុងមានភាពមុតស្រួចខ្លាំងទាំងបញ្ហាតម្លៃថ្លៃដើម ការច្នៃប្រឌិត ជាពិសេសការផ្សព្វផ្សាយ។

តើលោកអ្នកដឹងទេថា សម្រាប់ឆ្នាំ២០២៥ខាងមុខនេះ ទំនោរទីផ្សារចម្រុះនឹងក្លាយទៅជាយ៉ាងណា ហើយចំពោះអ្នកដែលចង់ចាប់ផ្តើមអាជីវកម្មថ្មីគួរតែពិចារណាទៅលើផលិតផល ឬសេវាកម្មបែបណា? ខាងក្រោមនេះ គឺជាការណែនាំដែលត្រូវបានធ្វើឡើងដោយបណ្តាញផ្សព្វផ្សាយព័ត៌មានដ៏ល្បីឈ្មោះ The Forbes ក្រោយពីបានឆ្លងកាត់ការសិក្សា និងស្រាវជ្រាវពីសំណាក់ក្រុមអ្នកជំនាញនាសេដ្ឋកិច្ចនាពេលកន្លងមកនេះ។

​Forbes បានបង្ហាញពីភាពជឿថា អាជីវកម្មមួយចំនួនដែលបានបង្ហាញជូននៅខាងក្រោមនេះគឺជាប្រភេទអាជីវកម្មដែលចំណាយដើមទុនតិច ប៉ុន្តែមានឱកាសទទួលបានប្រាក់ចំណូលខ្ពស់ ដោយសារតែវាមានតម្រូវការខ្លាំងក្នុងទីផ្សារ និងមានសក្តានុពលល្អដែលអាចរីកចម្រើនបន្ថែមទៀតនាពេលអនាគត។

សង្វាក់ផលិតកម្មជាមួយនឹងផលិតផលប្រកបដោយនិរន្តភាព (Sustainable Product Line)៖ ការប្រើប្រាស់ផលិតផលប្រចាំថ្ងៃរបស់មនុស្សនៅទូទាំងពិភពលោកនាពេលបច្ចុប្បន្ន គឺមានកំណើនកាន់តែច្រើនឡើង ជាពិសេសការពិចារណាក្នុងការងាកមកជ្រើសរើស និងប្រើប្រាស់ផលិតទាំងឡាយណាដែលផ្តល់ប៉ះពាល់ដល់បរិស្ថាន (eco-friendly) ដូច្នេះ រាល់ផលិតផលដែលមានគុណប្រយោជន៍ និងមិនបង្ករផលប៉ះពាល់ដល់សង្គម និងបរិស្ថាននឹងមានតម្រូវការទីផ្សារខ្ពស់ជាងគេបំផុតគិតចាប់ពីឆ្នាំក្រោយតទៅ ដោយវត្ថុប្រើប្រាស់ទាំងនោះចាប់រាប់តាំងពីសាប៊ូដុះខ្លួន សាប៊ូកក់សក់ រហូតទៅដល់ម៉ូតសម្លៀកបំពាកកែច្នៃឡើងវិញ ព្រមទាំងឧបករណ៍សំអាត និងដាក់តាមខ្លួនដែលផលិតឡើងពីវត្ថុធាតុដើមដែលអាចកែច្នៃឡើងវិញបាន។ គួរចងចាំថា ផលិតផលដែលអាចមានតម្រូវការច្រើនជាប្រភេទផលិតផលដែលផលិត និងកែច្នៃដោយដៃ ដែលមិនចាំបាច់ចំណាយថ្លៃដើមខ្ពស់ ដែលតម្រូវឱ្យមានការឆ្លងកាត់ខ្សែចង្វាក់ផលិតកម្មក្នុងវិស័យឧស្សាហកម្មដំណើរការដោយគ្រឿងចក្រនោះទេ។

អាជីវកម្មផ្តល់សេវាកម្មហ្វឹកហាត់លំហាត់ប្រាណសម្រាប់សុខភាពផ្លុវកាយ និងផ្លូវចិត្ត (Digital Health and Wellness Coaching)៖ បច្ចុប្បន្ននេះ ឧស្សាហកម្មផលិតផល និងសេវាកម្មសម្រាប់សុខភាពបានងាកមករកដំណើរការប្រព្រឹត្តទៅតាមឌីជីថលវិញ ដូច្នេះចំពោះអ្នកដែលមានជំនាញខាងនេះស្រាប់វាពិតជាមានភាពងាយស្រួលមែនទែនដោយគ្រាន់តែអ្នកមានឧបករណ៍ជំនួយមួយចំនួនក្នុងការផលិតជាវិដេអូ និងផ្សព្វផ្សាយនៅលើបណ្តាញសង្គម នោះអ្នកក៏អាចទាញរកចំណូលបានមកវិញដោយគ្រាន់តែចាប់ផ្តើមវាពីផ្ទះរបស់អ្នកប៉ុណ្ណោះ។ ការផ្ដល់សេវាកម្មបែបនេះ វាងាយស្រួលទាំងការចាប់ផ្តើមអាចជ្រើសរើសពេលវេលាធ្វើអាជីវកម្មដោយសេរី និងចំណាយថ្លៃដើមតិចបំផុត ប៉ុន្តែទទួលបានចំណូលវិញខ្ពស់លើសការរំពឹងទុក។

អាជីវកម្មផ្តល់សេវាកម្មផលិតមាតិកាដោយប្រើប្រាស់បច្ចេកវិទ្យា AI (AI-Powered Content Creation Services)៖ ការផ្តល់សេវាកម្មផលិតមាតិកាដែលដំណើរការដោយបច្ចេកវិទ្យា AI អាចសម្រួលកិច្ចការបានយ៉ាងច្រើនសម្រាប់ក្រុមហ៊ុន។ សេវាកម្មនេះអាចរួមបញ្ចូលទាំងការសរសេរចម្លងអត្ថបទ ការកែសម្រួលវីដេអូ និងសេវាកម្មរចនាក្រាហ្វិកដែលប្រើបញ្ញាសិប្បនិម្មិត AI ប្រកបដោយគុណភាពខ្ពស់ និងមានដំណើរការលឿនជាងមុន។

អាជីវកម្មផ្តល់ប្រឹក្សាផ្នែកសន្តិសុខអនឡាញពីចម្ងាយ (Remote Cybersecurity Consulting)៖ អាជីវកម្មកាន់តែច្រើននឹងប្ដូរឥរិយាបថពីការជួបដោយផ្ទាល់ ទៅជាប្រតិបត្តិការតាមអនឡាញ ដូច្នេះពួកគេមិនអាចខ្វះបានឡើយនូវបច្ចេកវិទ្យាដែលអាចធានាបាននូវសន្តិសុខចំពោះប្រព័ន្ធប្រតិបត្តិការអាជីវកម្មរបស់ពួកគេ។ ការផ្តល់សេវាកម្មគ្រប់គ្រង និងការពារអាជីវកម្មអនឡាញ ឬសន្តិសុខអនឡាញនេះ គឺជាអាជីវកម្មដែលមានតម្រូវការកាន់តែខ្ពស់ និងកើនឡើងជារៀងរាល់ឆ្នាំ។ សេវាកម្មដែលអាចផ្តល់ឲ្យមានច្រើនប្រភេទ ប៉ុន្តែចំពោះសេវាកម្មសំខាន់ៗដែលចាំបាច់រួមមានដូចជា ការគ្រប់គ្រងសុវត្ថិភាពអ៊ីនធឺណិត និងការវាយតម្លៃ ឬហានិភ័យទៅលើកិច្ចការពារទិន្នន័យ និងការប្រឹក្សាផ្លូវច្បាប់ទាក់ទងទៅនឹងការត្រួតពិនិត្យ ការគំរាមកំហែងនានា និងការឆ្លើយតបឧប្បត្តិហេតុផ្សេងៗ។

អាជីវកម្មផ្តល់សេវាកម្មសម្របសម្រួល និងរៀបចំព្រឹត្តិការណ៍នានាតាមបណ្តាញអ៊ិនធឺណេត (Virtual Event Planning and Coordination)៖ នៅក្នុងស្ថានភាពដែលពិភពលោកមានអ្នកធ្វើការងារពីចម្ងាយកាន់តែច្រើន ដូច្នេះការចូលរួមក្នុងព្រឹត្តិការណ៍នានាតាមអនឡាញក៏មានការកើនឡើងគួរឲ្យកត់សំគាល់ដូចគ្នា។ កិច្ចការងារនេះវាបានបង្កើតបានទៅជាឱកាសសម្រាប់អ្នកដែលមានការយល់ដឹងច្បាស់អំពីវិធីសាស្ត្ររៀបចំ និងសម្របសម្រួល ធ្វើផែនការសម្រាប់ព្រឹត្តិការណ៍នានាតាមអនឡាញ ដូចជា ការប្រជុំ ការតាំងពិព៍រណ៍ផលិតផល ការប្រកាសពីកិច្ចដំណើរការអាជីវកម្មនានា ព្រមទាំងព្រឹត្តិការណ៍ជំនួបអាជីវកម្ម ឬជំនួបកាទូតជាដើម។

និយាយជារួម ស្ទើរគ្រប់ប្រភេទអាជីវកម្មដូចបានរៀបរាប់ខាងលើនេះសុទ្ធតែមានឱកាសអាចរកប្រាក់ចំណូលបានទាំងប្រចាំខែ ឬប្រចាំឆ្នាំ យ៉ាងងាយស្រួល ប៉ុន្តែវាក៏ទាមទារឱ្យមានការកសាងបណ្តាញដ៏គួរឲ្យទុកចិត្ត និងមានប្រសិទ្ធភាពជាមួយនឹងម្ចាស់អាជីវកម្ម ក៏ដូចជាបុគ្គលដែលមានសក្តានុពលពាក់ព័ន្ធទាំងអស់ផងដែរ៕