សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី Al Jazeera បានរាយការណ៍ថា សហភាពអឺរ៉ុបបានដកទណ្ឌកម្មសេដ្ឋកិច្ចលើប្រទេសស៊ីរី ក្នុងគោលបំណងជួយឱ្យប្រទេសនេះមានលទ្ធភាពក្នុងការស្ដារសេដ្ឋកិច្ចឡើងវិញ។
ការដកទណ្ឌកម្មរបស់សហភាពអឺរ៉ុបកើតឡើងបន្ទាប់ពីសហរដ្ឋអាម៉េរិកប្រកាសដកទណ្ឌកម្មលើស៊ីរីកាលពីសប្តាហ៍មុន ខណៈដែលប្រធានាធិបតីសហរដ្ឋអាម៉េរិក លោក Donald Trump បាននិយាយនៅក្នុងប្រទេសអារ៉ាប៊ីសាអូឌីតកាលពីសប្តាហ៍មុនថា លោកនឹងបញ្ជាឱ្យបញ្ឈប់ការដាក់ទណ្ឌកម្មប្រឆាំងនឹងស៊ីរី ដើម្បីផ្តល់ឱកាសឱ្យពួកគេស្តារប្រទេសឡើងវិញ ហើយលោកសង្ឃឹមថា រដ្ឋាភិបាលថ្មីរបស់ស៊ីរីនឹងទទួលបានជោគជ័យក្នុងការធ្វើឱ្យប្រទេសមានស្ថិរភាព និងរក្សាសន្តិភាពឡើងវិញ។
លោក Kaja Kallas ប្រធានគោលនយោបាយការបរទេសនៃសហភាពអឺរ៉ុបបានលើកឡើងថា តំបន់អឺរ៉ុបចង់ជួយពលរដ្ឋស៊ីរីកសាងប្រទេសថ្មីដែលមានលក្ខណៈរួមបញ្ចូលគ្នា និងមានសន្តិភាពឡើងវិញ បន្ទាប់ពីដួលរលំរបបមេដឹកនាំចាស់ Bashar al-Assad ឬ របបអាល់អាសាដ។ សហភាពអឺរ៉ុបតែងតែឈរនៅខាងពលរដ្ឋស៊ីរីក្នុងរយៈពេល ១៤ ឆ្នាំចុងក្រោយនេះ ហើយពួកគេនឹងបន្តធ្វើបែបនេះតទៀត។
កាលពីថ្ងៃអង្គារ៍ រដ្ឋមន្ត្រីការបរទេសស៊ីរី លោក Assad al-Shaibani បានថ្លែងអំណរគុណដល់សហភាពអឺរ៉ុប ដោយនិយាយថា ការសម្រេចចិត្តនេះនឹងជំរុញសន្តិសុខ និងស្ថិរភាពរបស់ប្រទេសស៊ីរី។ ទន្ទឹមនឹងនេះ អ្នកវិភាគលើកឡើងថា កិច្ចព្រមព្រៀងដកទណ្ឌកម្មពីស៊ីរី គឺជាការផ្លាស់ដូរដ៏សំខាន់ ហើយវាគឺជាលើកដំបូងដែលសហភាពអឺរ៉ុបទទួលស្គាល់អំណាចដែលកំពុងគ្រប់គ្រងនៅក្នុងប្រទេសស៊ីរី។ គេសង្ឃឹមថា ការទទួលស្គាល់នេះគឺជាផ្លូវត្រួសត្រាយសម្រាប់ការបង្កើតស្ថិរភាពហិរញ្ញវត្ថុ និងលើកកម្ពស់ជីវភាពរស់នៅរបស់ពលរដ្ឋស៊ីរី ដោយសារការដាក់ទណ្ឌកម្មលើស៊ីរីពាក់ព័ន្ធនឹងវិស័យដឹកជញ្ជូន ថាមពល និងធនាគារតាំងពីឆ្នាំ២០១២ និង ២០១៣ ។
ឥឡូវនេះ មេដឹកនាំថ្មីរបស់ស៊ីរី Ahmed al-Sharaa បានជំរុញឱ្យលោកខាងលិចបន្ធូរបន្ថយការរឹតបន្តឹង ដើម្បីជួយស៊ីរីឱ្យងើបឡើងវិញពីសង្គ្រាមស៊ីវិល និងការគ្រប់គ្រងរបបផ្តាច់ការអស់រយៈពេលជាច្រើនឆ្នាំ។ អ្នកការទូតសហភាពអឺរ៉ុបបានលើកឡើងថា លទ្ធផលនៃកិច្ចព្រមព្រៀងគួរដកទណ្ឌកម្មដែលកាត់ធនាគារស៊ីរីចេញពីប្រព័ន្ធពិភពលោក និងការបង្កកទ្រព្យសម្បត្តិធនាគារកណ្តាល។ យ៉ាងណាមិញ សហភាពអឺរ៉ុបមានបំណងដាក់ទណ្ឌកម្មលើបុគ្គលថ្មីៗពាក់ព័ន្ធនឹងការវាយប្រហារយ៉ាងសាហាវទៅលើជនជាតិភាគតិច Alawite។ បន្ថែមពីនេះ វិធានការផ្សេងទៀតដែលធ្លាប់រឹតបន្តឹងក្នុងរបបអាល់អាសាដ និងការហាមឃាត់ការលក់អាវុធដែលប្រើប្រាស់សម្រាប់គាបសង្កត់ជនស៊ីវិល នឹងត្រូវបានរឹតបន្តឹងដដែល។ ក្រុមមន្ត្រីការទូតអឺរ៉ុប បានបញ្ជាក់ដែរថា ទណ្ឌកម្ម ឬ វិធានការទាំងនោះអាចត្រូវបានដាក់ឡើងវិញ ប្រសិនបើមេដឹកនាំថ្មីរបស់ស៊ីរីបំពានលើការសន្យាគោរពសិទ្ធិជនជាតិភាគតិច និងឆ្ពោះទៅរកលទ្ធិប្រជាធិបតេយ្យ។
រដ្ឋមន្ត្រីការបរទេសអាល្លឺម៉ង់ លោក Johann Wadephul បាននិយាយនៅក្នុងសេចក្តីថ្លែងការណ៍មួយថា សហភាពអឺរ៉ុបចង់ចាប់ផ្តើមថ្មីជាមួយប្រទេសស៊ីរី ហើយក៏រំពឹងថានឹងមានគោលនយោបាយរួមបញ្ចូលនៅក្នុងប្រទេសដែលរួមបញ្ចូលទាំងក្រុមប្រជាជន និងក្រុមសាសនាទាំងអស់។ វាពិតជាសំខាន់ណាស់ដែលប្រទេសស៊ីរីអាចរួបរួមបានបែបនេះ៕
Account
Security
Favourite Content