សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផ្ទះយុវជនដើម្បីមិត្តភាពកម្ពុជា-ចិន បានរៀបចំកម្មវិធីផ្លាស់ប្តូរសហគ្រិនវ័យក្មេងកម្ពុជា-ចិន ឆ្នាំ២០២៥ រយៈពេល១១ថ្ងៃ ចាប់ពីថ្ងៃទី ១៨ ដល់ថ្ងៃទី២៩ ខែឧសភា ដើម្បីភ្ជាប់ទំនាក់ទំនងរវាងអ្នកជំនាញ រួមទាំងសហគ្រិននៃប្រទេសទាំងពីរដើម្បីរួមគ្នាអភិវឌ្ឍ និងជំរុញការវិនិយោគប្រកបដោយសក្តានុពលទាំងពេលបច្ចុប្បន្ន និងអនាគត។ កម្មវិធីរឹតចំណងមិត្តភាពរវាងសហគ្រិននៃប្រទេសទាំងពីរនេះ មានគណៈប្រតិភូចំនួន ៤០រូប មកពី តំណាងពីសមាគមសិស្ស-និស្សិតអាហារូបករណ៍ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត) និងសហភាពសហព័ន្ធយុវជនកម្ពុជា (សសយក) រួមទាំងតំណាងពីសមាគមអាជីវកម្មដូចជា សមាគមឧកញ៉ាកម្ពុជា សមាគមសហគ្រិនស្ត្រីកម្ពុជា សមាគមសហគ្រិនវ័យក្មេងកម្ពុជា និងសមាគមអាជីវកម្មសំខាន់ៗផ្សេងទៀត ព្រមទាំងសហគ្រិន អ្នកជំនួញវ័យក្មេងជាច្រើនរូបទៀត។ គណប្រតិភូទាំងអស់ត្រូវបានដឹកនាំដោយផ្ទាល់ដោយ ឯកឧត្តម គឹម រិទ្ធី ប្រធានក្រុមប្រឹក្សាភិបាលនៃផ្ទះយុវជនដើម្បីមិត្តភាពកម្ពុជា-ចិន ទៅកាន់រដ្ឋធានីប៉េកាំង ក្រុងដាលាន និងក្រុងសិនជិន។
កម្មវិធីផ្លាស់ប្តូរសហគ្រិនវ័យក្មេងកម្ពុជា-ចិន ឆ្នាំ២០២៥ នេះរៀបចំឡើងក្នុងគោលបំណងពង្រឹងការផ្លាស់ប្តូរកិច្ចសហប្រតិបតិ្តការ ពង្រឹងមិត្តភាព ការផ្លាស់ប្តូរជាមួយក្រសួងនិងអ្នកជំនាញផ្នែកពាណិជ្ជកម្មចិនក្នុងការលើកកម្ពស់ការច្នៃប្រឌិត និងសហគ្រិនភាព ការអនុវត្តកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសកម្ពុជា និងប្រទេសចិន។ នេះគឺជាលើកទី១ហើយដែលផ្ទះយុវជនដើម្បីមិត្តភាពកម្ពុជា-ចិនរៀបចំ និងដឹកនាំគណៈប្រតិភូចូលរួមកម្មវិធីផ្លាស់ប្តូរសហគ្រិនវ័យក្មេងកម្ពុជា-ចិន នៅប្រទេសចិនដើម្បីស្វែងយល់ពីផ្នែកពាណិជ្ជកម្មរបស់ចិនក្នុងការលើកកម្ពស់ការច្នៃប្រឌិត និងសហគ្រិនភាព ការអនុវត្តកិច្ចសហប្រតិបត្តិការសេដ្ឋកិច្ច ពិសេសពាណិជ្ជកម្មរវាងប្រទេសកម្ពុជា និងប្រទេសចិន។
គួរបញ្ចាក់ផងដែរថា បច្ចុប្បន្នទំនាក់ទំនងចិន-កម្ពុជា បានវិវត្តន៍ទៅជា «ភាពជាដៃគូយុទ្ធសាស្ត្រគ្រប់ជ្រុងជ្រោយនៃកិច្ចសហប្រតិបត្តិការ» ដែលឈានដល់កម្រិតខ្ពស់ដែលមិនធ្លាប់មានពីមុនមក ក្រោមការដឹកនាំរបស់ថ្នាក់ដឹកនាំកំពូលនៃប្រទេសកម្ពុជាជាបន្តបន្ទាប់ចាប់ពីសម្តេចព្រះ នរោត្តម សីហនុ ព្រះបរមរតនកោដ្ឋ និងបន្តដល់សម្តេចអគ្គមហាសេនាបតីតេជោ ហ៊ុន សែន និងកំពុងបន្តដោយនាយករដ្ឋមន្រ្តីបច្ចុប្បន្ន គឺសម្តេចមហាបវរធិបតី ហ៊ុន ម៉ាណែត ដែលពេលនេះទំនាក់ទំនងកម្ពុជា-ចិន បានឈានដល់ចំណុចខ្ពស់បំផុតនៃភាពជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្តភាពដែកថែបថែមទៀត។
ចំណែកឯ ទិន្នន័យពាណិជ្ជកម្មរបស់អគ្គនាយកដ្ឋានគយ និងរដ្ឋាករកម្ពុជា បានបង្ហាញថា ក្នុងឆ្នាំ២០២៤ ទំហំពាណិជ្ជកម្មទ្វេភាគីរវាងកម្ពុជា និងចិន ឈានដល់ ១៥,១៨ ប៊ីលានដុល្លារ កើនឡើង ២៣,៨ ភាគរយ បើធៀបនឹងចំនួន ១២,២៦ ប៊ីលានដុល្លារ ក្នុងរយៈពេលដូចគ្នាកាលពីឆ្នាំមុន។ ក្នុងចំណោមការវិនិយោគផ្ទាល់ពីបរទេស (FDI) ចំនួន ៦,៩ ប៊ីលានដុល្លារកាលពីឆ្នាំមុន ការវិនិយោគមកពីប្រទេសចិន ស្ថិតនៅលំដាប់លេខរៀងទី១ ដែលមានទំហំទឹកប្រាក់ប្រមាណ ៣.៤២៣លានដុល្លារអាម៉េរិក ស្មើនឹង ៤៩,៨២% នៃទុនវិនិយោគសរុបនៅកម្ពុជា។
ផ្ទះយុវជនដើម្បីមិត្តភាពកម្ពុជា-ចិន ត្រូវបានបង្កើតឡើងជាផ្លូវការនៅថ្ងៃទី១១ ខែមករា ឆ្នាំ២០២៣ ជាអង្គការមិនរកប្រាក់ចំណេញសម្រាប់ ការពង្រឹង និងពង្រីកនូវទំនាក់ទំនងរវាងប្រជាជននឹងប្រជាជននៃប្រទេសទាំងពីរ(កម្ពុជា-ចិន)។ ផ.យ.ម.ក.ច ជាវេទិកាមួយដើម្បីផ្លាស់ប្តូរបទពិសោធន៍ និងទស្សនៈគ្នាទៅវិញទៅមកតាមរយៈការបណ្តុះបណ្តាល ជាពិសេសសម្រាប់យុវជន និងសហគ្រិន តាមរយៈការផ្លាស់ប្តូរចំណេះដឹង និងកម្មវិធីអភិវឌ្ឍន៍នានាសម្រាប់ឱកាសអាជីវកម្ម និងការយល់ដឹងគ្នាទៅវិញទៅមកអំពី វប្បធម៌ សង្គម នយោបាយ និងបច្ចេកវិទ្យា។
Account
Security
Favourite Content