អគ្គលេខាធិការដ្ឋានគណៈកម្មាធិការសេដ្ឋកិច្ច និង ធុរកិច្ចឌីជីថល សូមជម្រាបជូនសាធារណជនមេត្តាជ្រាបថា៖ នារសៀលថ្ងៃ សុក្រ ទី ២៤ ខែ តុលា ឆ្នាំ ២០២៥, នៅសណ្ឋាគារ អ៊ុកវូដ ព្រេមៀរ ភ្នំពេញ​ អគ្គ-លេខាធិការដ្ឋានគណៈកម្មាធិការសេដ្ឋកិច្ច និង ធុរកិច្ចឌីជីថល (គ.ស.ធ.ឌ.) បានសហការគ្នាជាមួយសម្ព័ន្ធសមាគមសហគ្រាសធុនតូច និង មធ្យមកម្ពុជា (FASMEC), សមាគមសហគ្រិនវ័យក្មេងកម្ពុជា (YEAC), និង សមាគមសហគ្រិនស្រ្តីកម្ពុជា (CWEA)  បានរៀបចំពិធីប្រគល់វិញ្ញាបនបត្របញ្ចប់វគ្គបណ្តុះបណ្តាលស្តីពី“ការអភិវឌ្ឍធុរកិច្ច៖ ការចាប់យកជំនាញឌីជីថលសម្រាប់សហគ្រាសនៅកម្ពុជា” ដែលប្រព្រឹត្តទៅក្រោមអធិបតីភាពរបស់ ឯកឧត្តមបណ្ឌិត​​ តាំង ងួនលី  អគ្គលេខាធិការរង នៃអគ្គលេខាធិការដ្ឋាន គ.ស.ធ.ឌ. តំណាងដ៏ខ្ពង់ខ្ពស់របស់ ឯកឧត្តមបណ្ឌិត គង់ ម៉ារី រដ្ឋលេខាធិការនៃក្រសួងសេដ្ឋកិច្ច និង ហិរញ្ញវត្ថុ និង ជាអគ្គ-លេខាធិការនៃអគ្គលេខាធិការដ្ឋាន គ.ស.ធ.ឌ.។

វគ្គបណ្តុះបណ្តាលនេះ ជាសកម្មភាពមួយដ៏សំខាន់ ក្រោមអនុស្សរណៈយោគយល់គ្នារវាងភាគីទាំងបួន ក្នុងការជំរុញការចាប់យកឌីជីថលរបស់ធុរកិច្ចនៅកម្ពុជា ហើយ​ត្រូវបានរៀបចំឡើងក្នុងគោលបំណង (១) អភិវឌ្ឍចំណេះដឹង សមត្ថភាព និង យុទ្ធសាស្រ្តក្នុងការពង្រីកទីផ្សារអាជីវកម្ម (២) បំពាក់នូវចំណេះដឹងថ្មីៗពាក់ព័ន្ធនឹងធុរកិច្ចឌីជីថល ប្រព័ន្ធបច្ចេកវិទ្យាហិរញ្ញវត្ថុ ការទូទាត់ប្រាក់តាមប្រព័ន្ធអេឡិចត្រូនិក និង​ សុវត្ថិភាពឌីជីថលសម្រាប់អាជីវកម្ម  និង (៣) បង្កើតឱកាសក្នុងការកសាងបណ្តាញទំនាក់ទំនង និង ការចូលរួមក្នុងប្រព័ន្ធអេកូឡូស៊ីធុរកិច្ចឌីជីថលនៅកម្ពុជា។

កម្មវិធីទទួលវិញ្ញាបនបត្របញ្ចប់វគ្គបណ្តុះបណ្តាលនេះ បានចាប់ផ្តើមដោយមតិស្វាគមន៍របស់​ ឧកញ៉ា​ ឈិន កេន អគ្គលេខាធិការ នៃសម្ព័ន្ធសមាគមសហគ្រាសធុនតូច និង មធ្យមកម្ពុជា (FASMEC) និង សុន្ទរកថារាយការណ៍ដោយ លោកជំទាវ ផល ម៉ារីណា អគ្គលេខាធិការរងនៃអគ្គលេខាធិការដ្ឋាន គ.ស.ធ.ឌ.។ ឯក-ឧត្តមបណ្ឌិត​​ តាំង ងួនលី   បានថ្លែងសុន្ទរកថាបិទ ដោយបានគូសរំលេចពីសារៈសំខាន់នៃការប្រើប្រាស់ដំណោះស្រាយឌីជីថលសម្រាប់សម្រួលដល់ប្រតិបត្តិការអាជីវកម្ម ហើយបានលើកទឹកចិត្តដល់សិក្ខាកាមដែលបានបញ្ចប់វគ្គបណ្ដុះបណ្ដាល គួរចាប់យកដំណោះស្រាយឌីជីថលដើម្បីប្រើប្រាស់ក្នុងប្រតិបត្តិការអាជីវកម្មប្រចាំថ្ងៃ ក្រោយវគ្គបណ្ដុះបណ្ដាល ដោយអាចទទួលបានការគាំទ្រតាមកម្មវិធីផ្សេងៗរបស់ស្ថាប័ននៃរាជរដ្ឋាភិបាល រួមមាន ក្រសួងប្រៃសណីយ៍ និង ទូរគមនាគមន៍, ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍, មជ្ឈមណ្ឌលបណ្ដុះធុរកិច្ចថ្មី “តេជោ”, មូលនិធិអភិវឌ្ឍន៍ជំនាញ ជាដើម។ ឯកឧត្តមបណ្ឌិត​​ ក៏បានលើកឡើងពីតួនាទីយ៉ាងស្រួចស្រាល់របស់វិស័យឯកជន ក្នុងការជំរុញកំណើនសេដ្ឋកិច្ចជាតិ។ ស្ថិតក្នុងបរិការណ៍នៃភាពមិនប្រាកដប្រជារបស់សកលលោក, វិស័យឯកជនរឹតតែមានសារៈសំខាន់ខ្ពស់ ក្នុងការរួមចំណែកដល់សេដ្ឋ-កិច្ចជាតិ តាមរយៈការពង្រឹងសមត្ថភាពឌីជីថល ដើម្បីពន្លឿនការលូតលាស់អាជីវកម្មរបស់ខ្លួន។

គួរបញ្ជាក់ផងដែរថា កម្មវិធីនេះនឹងមិនអាចប្រព្រឹត្តទៅបានរលូននោះទេ បើមិនមានការចូលរួមយ៉ាងស្វិតស្វាញពីគ្រប់តួអង្គពាក់ព័ន្ធរួមមាន អគ្គលេខាធិការដ្ឋាន គ.ស.ធ.ឌ., សម្ព័ន្ធសមាគមសហគ្រាសធុនតូច និង មធ្យម (FASMEC), សមាគមសហគ្រិនវ័យក្មេងកម្ពុជា (YEAC), សមាគមសហគ្រិនស្រ្តីកម្ពុជា (CWEA), គ្រូបង្គោល និង សិក្ខាកាមគ្រប់រូប។ កម្មវិធីនេះបានទទួលពាក្យដាក់ស្នើចូលរួមសរុបចំនួន ១៦៦ នាក់, ក្នុងនោះមានសិក្ខាកាមប្រមាណ  ៧៤%  នៃសិក្ខាកាមសរុប គឺមកពីទីក្រុងភ្នំពេញ និង ប្រមាណ  ២៦%  ​មកពីបណ្តាខេត្តផ្សេងៗ។​  ស្របតាមលក្ខខណ្ឌ​ និង​ គោលការណ៍ដែលបានកំណត់, ក្រុមការងារនៃអគ្គ-លេខាធិការដ្ឋាន គ.ស.ធ.ឌ. បានសម្រិតសម្រាំងជ្រើសរើសសិក្ខាកាម​ចំនួន ១០០​ នាក់ ដែលចែកចេញជាពីរក្រុម ដែល ក្រុមទី ១ មាន ៥០ នាក់ ចាប់ផ្ដើមពីថ្ងៃទី ២៣ ខែ កក្កដា ឆ្នាំ ២០២៥ និង ក្រុមទី ២ មាន ៥០ នាក់ ចាប់ផ្ដើមពីថ្ងៃទី​ ៣ ខែ កញ្ញា ឆ្នាំ ២០២៥។

ជាលទ្ធផល កម្មវិធីទទួលវិញ្ញាបនបត្របញ្ចប់វគ្គបណ្តុះបណ្តាលនេះ បានបញ្ចប់ដោយជោគជ័យ និង​តាមការរំពឹងទុក ស្ថិតក្រោមបរិយាកាសរីករាយ និង​ ស្និទ្ធស្នាល។  សម្រាប់ព័ត៌មានអំពីកម្មវិធីពាក់ព័ន្ធនឹងការចាប់យកឌីជីថលរបស់ធុរកិច្ចនៅកម្ពុជានាពេលខាងមុខ សូមសាធារណជនទាំងអស់មេត្តាតាមដានលើគេហទំព័រ និង គ្រប់បណ្ដាញសង្គមរបស់អគ្គលេខាធិការដ្ឋាន គ.ស.ធ.ឌ.​ និង/ឬ សម្ព័ន្ធសមាគមសហ-គ្រាសធុនតូច និង មធ្យម (FASMEC), សមាគមសហគ្រិនវ័យក្មេងកម្ពុជា (YEAC), និង សមាគមសហគ្រិនស្រ្តីកម្ពុជា (CWEA)៕