ភ្នំពេញ ៖ ក្រសួងចំនួន៣ បាន និងកំពុងសហការគ្នាស្វែងរកដំណោះស្រាយចំពោះបញ្ហាការខ្វះទឹកស្អាត ការគ្រប់គ្រងទឹក និងគ្រោះរាំងស្ងួតដែលកំពុងកើតមាននៅតាមតំបន់មួយចំនួនក្នុងប្រទេសកម្ពុជា ស្របពេលអាកាសធាតុកំពុងតែក្តៅខ្លាំង។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ រួមជាមួយ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និង ឯកឧត្តម ឆាយ រិទ្ធីសែន រដ្ឋមន្ត្រីក្រសួងអភិវឌ្ឍន៍ជនបទ បានប្រជុំពិភាក្សាដោះស្រាយបញ្ហាកង្វះទឹកស្អាត ដែលបានក្លាយជាបញ្ហាប្រឈមនៅតំបន់មួយចំនួនដោយសារភាពរាំងស្ងួតបន្តអូសបន្លាយ។ កិច្ចប្រជុំបានធ្វើឡើងនៅក្នុងសប្តាហ៍នេះ ដោយផ្តោតលើអន្តរាគមន៍បន្ទាន់ ដើម្បីដោះស្រាយបញ្ហាខ្វះទឹកដែលកំពុងញាំញីតំបន់មួយចំនួន ក៏ដូចជាស្វែងរកដំណោះស្រាយរយៈពេលវែង។

ឯកឧត្តម ថោ ជេដ្ឋា បានលើកឡើងថា ស្ថានភាពឆ្នាំនេះធ្ងន់ធ្ងរជាងឆ្នាំកន្លងទៅ ដោយសារភាពរាំងស្ងួតបន្តអូសបន្លាយ និងសីតុណ្ហភាពក្តៅហួតហែងខ្លាំង បង្កដោយបាតុភូតអែលនីណូជាសាកល។ ស្ថានភាពនេះ រួមផ្សំនឹងការសម្រុកធ្វើស្រែប្រាំងច្រើនដង និងការអនុវត្តប្រពលវប្បកម្មបានដាក់សម្ពាធមកលើធនធានទឹក។ ទោះជាយ៉ាងណាក៏ដោយ ឯកឧត្តមបានបង្ហាញសុទិដ្ឋិនិយមចំពោះវិស័យធនធានទឹករបស់កម្ពុជា ដោយលើកឡើងពីគម្រោងសាងសង់ ស្តារ និងពង្រីកអាងស្តុកទឹក និងប្រឡាយទឹកដែលកំពុងអនុវត្ត និងគម្រោងអនាគត រួមមានទាំងអាងស្តុកទឹកខ្នាតធំរហូតដល់ស្រះទឹក ដែលនឹងពង្រឹងវិស័យធនធានទឹក និងសមត្ថភាពការពារទឹកជំនន់របស់កម្ពុជានៅក្នុងឆ្នាំខាងមុខ។

កន្លងមក ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានណែនាំនូវវិធានការជាដំណោះស្រាយ ហើយបាន និងកំពុងតាមដាន និងវាយតម្លៃស្ថានភាពប្រឈមរបស់ប្រតិបត្តិករទឹកស្អាតទូទាំងប្រទេស ព្រមទាំងបានផ្តល់បច្ចុប្បន្នភាពសំខាន់ៗដល់ក្រសួងពាក់ព័ន្ធ ដើម្បីជំរុញកិច្ចសហការដោះស្រាយបញ្ហាទឹកស្អាតនៅតំបន់ដែលប្រភពទឹកបានរីងស្ងួត។

ឯកឧត្តម ហែម វណ្ណឌី បានគូសបញ្ជាក់ពីភាពបន្ទាន់នៃអន្តរាគមន៍ និងបានស្នើក្រសួង-ស្ថាប័នពាក់ព័ន្ធអនុវត្តអភិក្រម “ជីវភាពនៃតួអង្គតែមួយ” ដោយ រួមគិត រួមធ្វើ និងរួមដោះស្រាយ ក្នុងនាមរដ្ឋាភិបាលតែមួយ។ ឯកឧត្តម បានស្នើក្រសួងធនធានទឹក ផ្តល់អាទិភាពដល់ការផ្គត់ផ្គង់ទឹកឆៅសម្រាប់ការផលិតទឹកស្អាតនៅក្នុងគម្រោងរបស់ក្រសួង ស្របតាមគោលនយោបាយជាតិលើវិស័យធនធានទឹកនៅក្នុងព្រះរាជាណាចក្រកម្ពុជា ។ ឯកឧត្តមក៏បានស្នើឱ្យមានការចែករំលែកទិន្នន័យសំខាន់ៗ ដូចជា ទិន្នន័យប្រភពទឹក​ ប្រឡាយ តំបន់សេវាទឹកស្អាត ទីតាំងអណ្តូង ស្រះទឹកជនបទ និងទិន្នន័យនគរូបនីយកម្មជាដើមសម្រាប់ការអនុវត្តអន្តរា​គ​ម​ន៍បានឆាប់រហ័ស និងមានប្រសិទ្ធភាព។

ទន្ទឹមនឹងនេះ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានស្នើក្រសួងទាំង ៣ ចុះអនុស្សារណៈនៃការយោគយល់គ្នា ដើម្បីអនុវត្តកិច្ចសម្របសម្រួលក្នុងការរៀបចំ បែងចែក និងធ្វើផែនការកែលម្អការគ្រប់គ្រងទឹក ដើម្បីបំពេញទាំងតម្រូវការបន្ទាន់ និងរយៈពេលវែង។

នៅក្នុងកិច្ចប្រជុំរួម ក្រសួងទាំង ៣ បានប្តេជ្ញាពង្រឹងកិច្ចសហប្រតិបត្តិការ និងប្រើអនុស្សារណៈនៃការយោគយល់គ្នានេះ ជាក្របខ័ណ្ឌរួមសម្រាប់ការអនុវត្តការគ្រប់គ្រងទឹកប្រកបដោយប្រសិទ្ធភាព សំដៅការពារសុខុមាលភាពរបស់ប្រជាពលរដ្ឋ និងពង្រឹងខឿនសេដ្ឋកិច្ចកម្ពុជា៕