បរទេស ៖ ក្រុមអ្នកវិទ្យាសាស្ត្រមួយក្រុមបានឈានទៅដល់ការរកឃើញវិធីសាស្ត្រដ៏គួរឲ្យមានមោទនភាពបំផុតដែលជឿជាក់ថាអាចបញ្ឈប់វឌ្ឍនាការវ័យរបស់មនុស្សក្រោយបញ្ចប់ការសិក្សាស្រាវជ្រាវ និងសាកល្បងដោយជោគជ័យទៅលើសត្វកណ្តុរនៅក្នុងមន្ទីរពិសោធ។

ក្នុងអំឡុងពេលសាកល្បងទៅលើសត្វកណ្តុរ ក្រុមអ្នកវិទ្យាសាស្ត្រដែលដឹកនាំដោយសាលា Duke-NUS Medical School នៅសិង្ហបុរី និងសាលា Imperial College London ​នៅអង់គ្លេសបានរកឃើញថា ការរារាំងនូវប្រូតេអ៊ីនម្យ៉ាងដែលគេបានស្គាល់ឈ្មោះថា Interleukin-11 (IL-11) និងអាចធ្វើឲ្យសត្វកណ្តុរបង្កើនអាយុកាល និងការពារលក្ខខណ្ឌវិវត្តទៅនៃអាយុកាលរបស់ពួកវា។

ក្រុមការងារបានរកឃើញថា ជាមួយនឹងអាយុកាលសរីរាង្គរបស់រាងកាយ ថនិកសត្វទាំងអស់អាចផលិត IL-11 បន្ថែមដោយខ្លួនឯងបាន ហើយជាលទ្ធផលវាបានបង្កើនសារជាតិខ្លាញ់នៅក្នុងខ្លួនធ្វើឲ្យមានការចុះខ្សោយនៃសាច់ដុំ ព្រមទាំងធ្វើឲ្យជ្រុះរោមដែលប្រឈមមុខទៅនឹងជំងឺមហារីកទៀតផង។

ក្នុងអំឡុងពេលសាកល្បង ហ្វូងកណ្តុរវ័យកណ្តាលត្រូវបានចាក់ថ្នាំដែលប្រើប្រាស់សារធាតុប្រឆាំងដើម្បីទប់ស្កាត់ការរីកលូតលាស់នៃប្រូតេអ៊ីន IL-11 ហើយជាលទ្ធផលគេសង្កេតឃើញថាអាយុកាលរបស់សត្វកណ្តុរមានការកើនឡើងដល់ទៅ ២៥ភាគរយ។ ជាមួយគ្នានេះ គេមើលឃើញទៀតថា សត្វដែលបានចាក់ថ្នាំ និងព្យាបាលគឺមានសុខភាពល្អ និងស្វាហាប់ជាងសត្វដែលមិនបានទទួលការព្យាបាល។

អ្នកស្រាវជ្រាវ Anissa A. Widjaja មកពីសាលាវេជ្ជសាស្ត្រ Duke-NUS បានថ្លែងថា ៖​

«ទោះបីជាការងាររបស់យើងត្រូវបានធ្វើឡើងទៅលើសត្វកណ្តុរក៏ដោយ យើងសង្ឃឹមថាការរកឃើញទាំងនេះនឹងពាក់ព័ន្ធយ៉ាងខ្លាំងចំពោះសុខភាពមនុស្ស ដោយសារយើងបានឃើញផលប៉ះពាល់ស្រដៀងគ្នានៅក្នុងការសិក្សាអំពីកោសិកា និងជាលិការបស់មនុស្សធៀបទៅនឹងសត្វកណ្តុរ»។

លោកបានបន្តថា ៖

«គោលបំណងរបស់យើងគឺនៅថ្ងៃណាមួយ ការព្យាបាលប្រឆាំងនឹង IL-11 នឹងត្រូវបានប្រើប្រាស់យ៉ាងទូលំទូលាយតាមដែលអាចធ្វើទៅបាន ដើម្បីឱ្យមនុស្សទូទាំងពិភពលោកអាចរស់នៅប្រកបដោយសុខភាពបានល្អ និងយូរអង្វែង»។

គួរឲ្យដឹងដែរថា ៖ កាលពីថ្មីៗនេះ អ្នកវិទ្យាសាស្ត្រនៅក្នុងប្រទេសរុស្ស៊ីក៏បានទទួលលទ្ធផលគួរជាទីគាប់ចិត្តផងដែរទៅលើកិច្ចការពារជំងឺមហារីក។ រដ្ឋមន្ត្រីក្រសួងសុខាភិបាលរបស់រុស្ស៊ីលោក Mikhail Murashko បានបង្ហាញកាលពីខែមុនថា អ្នកស្រាវជ្រាវកំពុងបញ្ចប់ការសាកល្បងមុនចាប់ផ្តើមផលិតវ៉ាក់សាំងប្រឆាំងនឹងជំងឺនេះ៕