បរទេស៖ យោងតាមប្រភពពី Oil Price បានរាយការណ៍ថា តម្លៃប្រេងបានធ្លាក់ចុះបន្ទាប់ពីទិន្នន័យសេដ្ឋកិច្ចបង្ហាញថា ការនាំចូលប្រេងរបស់ចិនកើនឡើងយឺតជាងការរំពឹងទុក ខណៈ​ដែលទិន្នន័យបង្ហាញពីតម្រូវការខ្លាំងរបស់សហរដ្ឋអាមេរិក និងជម្លោះនៅតំបន់ហ្គាហ្សា។

នៅក្នុងសប្ដាហ៍នេះ តម្លៃប្រេងឆៅម៉ាក Brent បានធ្លាក់ចុះ ០,៥៣ ភាគរយ ឬ ៨៥,៦៣ ដុល្លារក្នុងមួយបារ៉ែល ខណៈពេលដែលតម្លៃប្រេងឆៅម៉ាក WTI ធ្លាក់ចុះ ០,៤៧ ភាគរយ ឬ ៨២,៤៦ ដុល្លារក្នុងមួយបារ៉ែល។

យោងតាមទិន្នន័យផ្លូវការដែលបានចេញផ្សាយកាលពីថ្ងៃចន្ទ បានបង្ហាញថា ការលក់រាយនៅក្នុងប្រទេសចិនដែលជាប្រទេសនាំចូលប្រេងដ៏ធំបំផុតរបស់ពិភពលោកបានកើនឡើង ២ ភាគរយដែលជាការកើនឡើងយឺតបំផុតចាប់តាំងពីខែធ្នូ ឆ្នាំ២០២២។ ទិន្នន័យសេដ្ឋកិច្ចខ្សោយពីប្រទេសចិនបានធ្វើឲ្យអ្នកជួញដូរប្រេងមានក្ដីព្រួយបារម្ភចំពោះការធ្លាក់ចុះនៃតម្រូវការ។ ទោះជាយ៉ាងណាក្តី ការធ្លាក់ចុះនៃស្តុកប្រេងឆៅសម្រាប់ពាណិជ្ជកម្មរបស់សហរដ្ឋអាមេរិកបានឆ្លុះបញ្ចាំងពីការពង្រឹងតម្រូវការក្នុងស្រុក ហើយការប្រែប្រួលនៃតម្លៃប្រេងនៅមានកម្រិត ដោយមិនធ្លាក់ចុះច្រើននោះទេ។

កាលពីថ្ងៃអង្គារ៍កន្លងទៅនេះ ទិន្នន័យដែលបានចេញផ្សាយដោយវិទ្យាស្ថានប្រេងអាមេរិកបានបង្ហាញពីការថយចុះចំនួន ៤,៤ លានបារ៉ែលនៅក្នុងស្តុកប្រេងឆៅរបស់សហរដ្ឋអាមេរិក ខណៈដែលសប្តាហ៍មុនធ្លាក់ចុះ ៣,៤ លានបារ៉ែលនៅក្នុងស្តុក។ ប្រសិនបើរដ្ឋបាលព័ត៌មានថាមពល (EIA) បង្ហាញតួលេខផ្លូវការបញ្ជាក់ពីការធ្លាក់ចុះនៃស្តុកប្រេងសាំង និងប្រេងឆៅនោះ តម្លៃប្រេងត្រូវបានព្យាករណ៍ថានឹងកើនឡើងខ្ពស់វិញ។ មិនត្រឹមតែប៉ុណ្ណោះ ចំនួនពលរដ្ឋអាមេរិកដែលដាក់ពាក្យសុំអត្ថប្រយោជន៍ក្រោយអត់ការងារធ្វើបានកើនឡើងលើសពីការរំពឹងទុក ពោលគឺពី ២០ ០០០ នាក់ ទៅ ២៤៣ ០០០ នាក់ ខណៈដែលគេរំពឹងថា ធនាគារកណ្តាលអាម៉េរិកអាចនឹងពិចារណាពីការកាត់បន្ថយអត្រាការប្រាក់ឆាប់ៗនេះ ដែលអាចជំរុញឱ្យមានការកើនឡើងនៃការចំណាយលើប្រេង។ ទោះជាយ៉ាងណាក្តី ការកើនឡើងនៃការទាមទារអត្ថប្រយោជន៍ក្រោយគ្មានការងារធ្វើអាចជំរុញការធ្លាក់ចុះនៃសេដ្ឋកិច្ចដែលអាចកាត់បន្ថយតម្រូវការប្រេងឆៅ។

គួររំលឹកដែរថា ការឈ្លានពានរបស់អ៊ីស្រាអែលនៅតំបន់ហ្គាហ្សា និងជម្លោះដែលកំពុងបន្តនៅមជ្ឈិមបូព៌ា ភាគច្រើនជាកន្លែងស្តុកទុកប្រេងពិភពលោកនៅតែបន្តមានឥទ្ធិពលលើការប្រែប្រួលនៃតម្លៃប្រេង។ យន្តហោះចម្បាំងអ៊ីស្រាអែលបានកំណត់គោលដៅក្នុងសង្កាត់ Al-Manara នៃភាគខាងត្បូងតំបន់ហ្គាហ្សា និង​សង្កាត់ Tel al-Hawa ភាគ​និរតី​នៃ​តំបន់ហ្គាហ្សា។ ចាប់តាំងពីខែវិច្ឆិកាមក ក្រុមឧទ្ទាម Houthis បានកំណត់គោលដៅលើនាវានៅសមុទ្រក្រហម ដោយជំរុញឱ្យក្រុមហ៊ុននានាផ្លាស់ប្តូរទិសដៅបណ្តាលឱ្យមានពេលវេលាដឹកជញ្ជូនយូរ និងថ្លៃដើមខ្ពស់៕