បរទេស ៖​ យោងតាមប្រភពពី Axios បានរាយការណ៍ថា ទឹក​ប្រៃ​ដែល​ហូរចូល​ទន្លេ​មីស៊ីស៊ីពីកំពុង​គំរាម​កំហែង​ដល់​ការ​ផ្គត់​ផ្គង់​ទឹក​ស្អាត​ក្នុង​ទីក្រុង New Orleans ជា​លើក​ដំបូង​ក្នុង​រយៈ​ពេល​ជាង ៣០ ឆ្នាំកន្លងមកនេះ។

កាលពីចុងខែកញ្ញាកន្លងទៅនេះ ការផ្គត់ផ្គង់ទឹកគ្មានសុវត្ថិភាពសម្រាប់មនុស្សជាង ១,២ លាននាក់ក្នុងការទទួលទាន ឬ ប្រើប្រាស់ បានបង្កផលប៉ះពាល់ដល់មនុស្ស និងសត្វ ហើយអាចធ្វើឱ្យខូចដល់ដំណាំ។ លើសពីនេះ វាបង្កឲ្យមានសារធាតុច្រេះ ដែលអាចបំផ្លាញបំពង់បង្ហូរទឹក និងឧបករណ៍ប្រើប្រាស់ផងដែរ ខណៈដែលហេដ្ឋារចនាសម្ព័ន្ធទឹកនៅ New Orleans ភាគច្រើនគឺជាបំពង់ដែក និង សំណ។ មន្ត្រីសុខាភិបាលជាន់ខ្ពស់របស់រដ្ឋ Louisiana កំពុងព្រួយបារម្ភអំពីជាតិអំបិលដែលអាចបណ្តាលឲ្យសារធាតុច្រេះចូលទៅក្នុងការផ្គត់ផ្គង់ទឹកសាប។

ទន្ទឹមនឹងនោះ គ្រោះរាំងស្ងួតបានកើតឡើងនៅទូទាំងជ្រលងទន្លេមីស៊ីស៊ីពី មានន័យថា ទឹកប្រៃពីឈូងសមុទ្រម៉ិកស៊ិកបានហូរចូលក្នុងទន្លេ ដោយគំរាមកំហែងការផ្គត់ផ្គង់ទឹកស្អាតនៅក្នុងទីក្រុង New Orleans និងសហគមន៍កាតូលិកចំនួនពីរនៅក្បែរនោះ។ បញ្ហានេះបង្កផលប៉ះពាល់ដល់មនុស្សជាច្រើន ដោយសារក្រុងជាច្រើននៅភាគអាគ្នេយ៍នៃរដ្ឋ Louisiana រួមទាំងទីក្រុង New Orleans ទាញយកទឹកមកប្រើប្រាស់ពីទន្លេ។

កងវិស្វកម្មនៃកងទ័ពជើងគោកសហរដ្ឋអាមេរិករំពឹងថា ការហូរចូលនៃទឹកប្រៃនឹងទៅដល់ទីក្រុង New Orleans ត្រឹមថ្ងៃទី ២២ ខែតុលា ហើយមន្ត្រីកំពុងធ្វើការលើផែនការកាត់បន្ថយការរំខានពីទឹកប្រៃ។ មិនត្រឹមតែប៉ុណ្ណោះ ម៉ាស៊ីន osmosis ដែលជារបៀបបន្សុតទឹកតាមប្រៀបបញ្ច្រាសកកំពុងត្រូវបានដំឡើងនៅ Plaquemines Parish ភាគអាគ្នេយ៍នៃទីក្រុង New Orleans ហើយម៉ាស៊ីនពីរទៀតកំពុងត្រូវបានរៀបចំផងដែរ។ យ៉ាងណាមិញ ម៉ាស៊ីនប៉ុន្មានគ្រឿងទាំងនេះមិនអាចផលិតទឹកបានគ្រប់គ្រាន់ដើម្បីបំពេញតម្រូវការនៅក្នុងរថភ្លើងក្រោមដីនោះទេ។

​កាល​ពី​សប្តាហ៍​មុន ​ប្រធានាធិបតីអាមេរិក លោក Joe Biden បាន​ប្រកាស​ស្ថានភាព​នេះ​ជា​ភាព​អាសន្ន​ជាតិ​។ លោកប្រធានាធិបតី បាននិយាយផងដែរថា ប្រសិនបើមានការបំពុល ស្ថានភាពនេះនឹងមានរយៈពេលជាច្រើនសប្តាហ៍ ឬ ច្រើនខែមុនពេលទឹកសាបត្រឡប់មកវិញ លុះត្រាតែមានភ្លៀងធ្លាក់ខ្លាំង។ កាលពីថ្ងៃសុក្រកន្លងទៅនេះ លោក John Bel Edwards ដែលជាអភិបាលរដ្ឋ Louisiana បានអនុម័តផែនការសម្រាប់តំបន់ Jefferson Parish ដែលរួមមានជាយក្រុងខាងលិច និងភាគខាងត្បូងនៃទីក្រុង New Orleans ដើម្បីសាងសង់បំពង់បង្ហូរទឹកបន្ថែមទៀត។ ការសាងសង់អាចចាប់ផ្តើមនៅសប្តាហ៍នេះ ប៉ុន្តែមិនទាន់មានព័ត៌មានលម្អិតអំពីគម្រោងនេះនៅឡើយទេ៕