សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រជាពលរដ្ឋកម្ពុជានឹងមានជម្រើសបន្ថែមលើសេវាឥណទានដោយគ្មានការប្រាក់ ដែលអាចជួយលើកកម្ពស់ជីវភាពកាន់តែប្រសើរតាមរយៈសេវាឥណទានថ្មីមួយមានឈ្មោះថា BNPL ( Buy Now Pay Later ) ។ តាមរយៈជម្រើសសេវាកម្មថ្មីនេះរំពឹងថា នឹងជួយសម្រួលដល់ជីវភាពប្រជាពលរដ្ឋកម្ពុជា និងជួយជំរុញចរន្តសកម្មភាពសេដ្ឋកិច្ចកាន់តែប្រសើរ ដោយសេវាឥណទានមួយនេះមានលក្ខណៈស្រដៀងគ្នាទៅនឹងសេវាកម្មបង់រំលស់ដែរ ប៉ុន្តែមិនគិតការប្រាក់ពីអតិថិជន ពោក គឺគិតតែសោហ៊ុយឥណទាន ១ភាគរយប៉ុណ្ណោះ ។
លោកស្រីសុខ សោភា គណៈប្រធាននាយិកាប្រតិបត្តិការធនាគារអេស៊ីលីដា ភីអិលស៊ី នៅក្នុងពិធីចុះហត្ថលេខា សហការជាដៃគូជាមួយ ក្រុមហ៊ុន Daikin Airconditioning កាលពីថ្ងៃទី១៣ ខែមីនា ឆ្នាំ២០២៥ បានមានប្រសាសន៍ថា សេវាកម្មសម្រាប់ទិញទំនិញ ឬសេវាប្រើប្រាស់ ហើយធ្វើការទូទាត់សងធនាគារនៅពេលក្រោយ (BNPL) របស់ធនាគារអេស៊ីលីដា ត្រូវបានរចនាឡើងដើម្បីផ្ដល់ជូនអតិថិជននូវជម្រើស ហិរញ្ញវត្ថុកាន់តែប្រសើរ អាចបត់បែនបាន ដោយអនុញ្ញាតឱ្យអតិថិជនទិញទំនិញ និងសេវាកម្មតាមរយៈធនាគារអេស៊ីស៊ូភើអេបបានភ្លាមៗ ដោយប្រព័ន្ធនឹងធ្វើការអនុម័តប្រាក់កម្ចីដោយស្វ័យប្រវត្តិ ហើយអតិថិជនអាចទទួលបានទំនិញភ្លាមៗ ហើយធ្វើការទូទាត់សងត្រលប់មកធនាគារនៅពេលក្រោយ ។
លោកស្រីបន្តថា ភាពជាដៃគូនេះ ឆ្លុះបញ្ចាំងពីការប្ដេជ្ញាចិត្តរបស់ស្ថាប័នទាំងពីរក្នុងការផ្ដល់ជូននូវដំណោះស្រាយហិរញ្ញវត្ថុប្រកបដោយនវានុវត្តន៍ ដើម្បីបំពេញតម្រូវការដែលកំពុងរីកចម្រើនរបស់អតិថិជននៃស្ថាប័នទាំងពីរ រួមទាំងបណ្ដាញចែកចាយរបស់ក្រុមហ៊ុន Daikin ទាំងអស់ ។ អតិថិជនខ្លះគាត់ត្រូវការសម្ភារៈប្រើប្រាស់ចាំបាច់ប្រចាំថ្ងៃ ប៉ុន្តែគាត់មិនមានលុយទិញទាំងដុល ដូច្នេះគាត់អាចប្រើប្រាស់សេវាកម្ម BNPL ដែលអាចឱ្យគាត់ទទួលយកសម្ភារៈទៅប្រើប្រាស់ រួចហើយបង់មកធនាគារវិញជាប្រចាំខែ ដោយធនាគារជាអ្នកចេញលុយថ្លៃទំនិញនោះជូនគាត់ទាំងអស់ ។
លោកស្រីបន្ថែមថា សម្រាប់កិច្ចសហការជាមួយក្រុមហ៊ុន Daikin ធនាគារអេស៊ីលីដា នឹងផ្ដល់កម្ចីរហូតដល់៤លានរៀល ឬប្រមាណ១ពាន់ដុល្លារសហរដ្ឋអាមេរិក ហើយបើសិនជាអតិថិជនមានតម្រូវការលើសពីនេះ ធនាគារនឹងធ្វើជូនពួកគាត់ ។
លោក មីន សុខខេង នាយកផ្នែកលក់នៃក្រុមហ៊ុន Daikin Airconditioning ( Cambodia ) បានមានប្រសាសន៍ឱ្យដឹងថា កិច្ចសហការជាមួយធនាគារអេស៊ីលីដា អាចឱ្យអតិថិជន ឬប្រជាពលរដ្ឋបានប្រើប្រាស់នូវផលិតផលម៉ាស៊ីនត្រជាក់ដែលមានគុណភាពល្អ ដោយមិនចាំបាច់ចំណាយលុយទិញមុន ឬទាំងដុលឡើយ ។ ប្រជាពលរដ្ឋដែលប្រើប្រាស់សេវាកម្ម ទិញមុនទូទាត់ជាក្រោយ ឬ BNPL អាចមកទិញម៉ាស៊ីនត្រជាក់យកទៅប្រើប្រាស់ រួចហើយចាំបង់លុយប្រចាំខែទៅធនាគារអេស៊ីលីដាវិញដោយមិនគិតការប្រាក់ ។ នេះគឺជាលក្ខណៈពិសេសដែលនឹងជួយដល់ប្រជាពលរដ្ឋក្នុងប្រទេសកម្ពុជាបានច្រើន ៕
Account
Security
Favourite Content