សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភូមិ Waipula ដែលទីកន្លែងប្រមូលផ្តុំនៃជនជាតិដើមចិន Yi នៅក្នុងខេត្ត Yunnan និងជាទីកន្លែងដែលមានអត្រាពលរដ្ឋក្រីក្របំផុតកាលពី៥ឆ្នាំមុន ខណៈដែលកាលពីឆ្នាំ២០១៧ ពលរដ្ឋស្ទើរតែ ១ ភាគ ៣ ដែលស្ថិតនៅក្រោមបន្ទាត់នៃភាពក្រីក្រជាច្រើនបានបង្ខំចិត្តនាំគ្នាធ្វើចំណាកស្រុកដោយសង្ឃឹមថាអាចស្វែងរកមុខរបររកស៊ី និងធ្វើការយកប្រាក់ចំណូលបានល្អប្រសើរ។
ទោះបីជាយ៉ាងណាក្តី ក្រោយមានកម្មវិធីមួយដែលបានរៀបចំឡើងដោយអង្គការសហប្រជាជាតិផ្តោតលើស្ត្រី សហការជាមួយនឹងអជ្ញាធរក្នុងស្រុកដើម្បីបង្កើតបានជាគម្រោងបែបច្នៃប្រឌិតមួយ បង្កើតក្រុមសហគ្រិនជាស្ត្រីដែលរស់នៅក្នុងភូមិក្នុងការទាញយកអត្ថប្រយោជន៍ពីធនធាន និងកេរតំណែលដូនតាជនជាតិ Yi ដែលមានស្រាប់នៅក្នុងភូមិទៅជាប្រាក់ចំណូលដែលមាននិរន្តភាពបំផុតចំពោះពួកគេវិញ។
នៅក្នុងដំណាក់កាលដំបូង សហគ្រិនជាស្ត្រីបាននាំគ្នាចាប់ផ្តើមកែលំអហេដ្ឋារចនាសម្ព័ន្ធផ្លូវថ្នល់ក្នុងភូមិ រួមទាំងស្ពាន និងការបំភ្លឺដោយអគ្គិសនីនៅពេលយប់ជាមួយនឹងអំពូលសូឡាជាដើម។ បន្ទាប់មកក្រុមស្ត្រីជាសហគ្រិនទាំងនោះក៏បានចាប់ផ្តើមទទួលយកការបណ្តុះបណ្តាលផ្នែកវិស័យទេសចរណ៍ ក៏ដូចជាការធ្វើកសិកម្មប្រកបដោយនិរន្តភាព ហើយឈានទៅដល់ការបង្កើតមជ្ឈមណ្ឌលតាំងពិពណ៍ដែលចាប់យកវប្បធម៍ និងវត្ថុអនុស្សាវរីយ៍បែបជនជាតិដើមរបស់ខ្លួនមួយកន្លែង។
បន្តិចៗម្តង ប្រាក់ចំណូលក៏ចាប់ផ្តើមហូរចូលក្នុងសេដ្ឋកិច្ចរបស់ភូមិ Waipula ទាំងការផ្គត់ផ្គង់ផលិតកសិកម្មទៅឲ្យសេវាកម្មបម្រើសេវាកម្មទេសចរណ៍ ដូចជា សណ្ឋាគារ ផ្ទះសំណាក់ ភោជនីយដ្ឋាន និងតាមរយៈការផ្តល់សេវាកម្មទេសចរណ៍ផ្សេងទៀត ព្រមទាំងការលក់វត្ថុអនុស្សាវរីយ៍ធ្វើពីដៃជាច្រើនប្រភេទ។
គួរឲ្យដឹងដែរថា ត្រឹមដំណាក់កាលដំបូងនៃផែនការមេក្នុងគម្រោងប៉ុណ្ណោះ ភូមិដ៏ក្រីក្រមួយនេះបានកែប្រែមុខមាត់ទៅជាភូមិដែលមានអត្រាក្រីក្រស្ទើរស្មើសូន្យក្នុងរយៈពេលត្រឹមតែ៣ឆ្នាំប៉ុណ្ណោះហើយថែមទាំងអាចជួយផ្តល់ការងារជូនពលរដ្ឋចំណាកស្រុកផ្សេងទៀត ទាំងការងារពេញម៉ោង និងការងារក្រៅម៉ោងទៀតផងដែរ។
ក្រុមសហគ្រិនជាស្ត្រីរបស់ភូមិ Waipula បានទទួលការកោតសរសើរយ៉ាងខ្លាំងពីសំណាក់ក្រុមអង្គការអន្តរជាតិ និងមជ្ឈដ្ឋានជុំវិញរបស់ពួកគេ និងត្រូវបានគេចាត់ទុកថាជាអ្នកនាំមុខគេដ៏សំខាន់មួយនៅក្នុងកិច្ចការងារអភិវឌ្ឍគោលដៅអេកូទេសចរណ៍របស់ប្រទេសចិន ស្របទៅនឹងពាក្យស្លោកបុរាណរបស់ចិនមួយឃ្លាដែលនិយាយថា «ក្នុងនាមជាស្ត្រីម្នាក់ អាចជះឥទ្ធិពលដល់វាសនា និងអនាគតកូនចៅរបស់ពួកគេដល់ទៅ៣ជំនាន់»៕
Account
Security
Favourite Content