ភ្នំពេញ ៖ អ្នកជំនាញបានលើកឡើងថា ដើម្បីអាចឈរជើងបានរឹងមាំ និងយូរអង្វែងក្នុងទីផ្សារ សហគ្រាសធុនមីក្រូ តូច និងមធ្យម (MSMEs) ក៏ដូចជា សហគ្រាសធុនតូច និងមធ្យម (SMEs) គឺត្រូវការធាតុផ្សំសំខាន់ៗចំនួន២ នោះក្នុងរួមមានផែនការអាជីវកម្ម និងផែនការហិរញ្ញវត្ថុ។ ការដែលមានផែនការអាជីវកម្ម និងផែនការហិរញ្ញវត្ថុច្បាស់លាស់ នោះគឺវាបង្កភាពងាយស្រួលក្នុងការប្រមូលទុន ឬប្រើប្រាស់ទុនពីគ្រឹះស្ថានធនាគារ និងហិរញ្ញវត្ថុដើម្បីជំរុញប្រតិបត្តិការហិរញ្ញវត្ថុអាជីវកម្ម។

លោក​ កែវ ឡង់ឌី សហស្ថាបនិក និងជាអគ្គនាយកអភិវឌ្ឍន៍ធុរកិច្ចនៃហាងឯកទេសទំនិញកុមារ បេប៊ីអោតឡេត បានលើកឡើងថា ដើម្បីកៀគរទុន និងត្រូវការទុនបន្ថែមនោះមិនថា MSMEs និងSMEsនោះទេ គឺត្រូវការផែនការអាជីវកម្ម និងផែនការហិរញ្ញវត្ថុច្បាស់លាស់។ ឧទាហរណ៍ នៅពេលមានផែនការអាជីវកម្មច្បាស់លាស់ ហើយអាជីវកម្មមានភាពរឹងមាំ នោះគឺងាយស្រួលក្នុងការកៀគរទុនដើម្បីជំរុញប្រតិបត្តិការអាជីវកម្ម។

លោក កែវ ឡង់ឌី បានបន្ថែមថា អាជីវកម្មដែលរឹងមាំក៏តែត្រូវមានផែនការហិរញ្ញវត្ថុត្រឹមត្រូវ និងច្បាស់លាស់ បើពុំដូច្នោះទេ ទោះជីវកម្មរឹងមាំប៉ុណ្ណា ក៏មិនអាចឈរជើងបានយូរនោះទេដែរ។ មុំទាំងពីរដែលមានសារៈសំខាន់សម្រាប់អាជីវកម្មនីមួយៗ គឺផែនការអាជីវកម្ម និងផែនការហិរញ្ញវត្ថុ។ទន្ទឹមនេះ អាជីវកម្មដែលរឹងមាំក៏តែត្រូវមានផែនការហិរញ្ញវត្ថុត្រឹមត្រូវ និងច្បាស់លាស់ បើពុំដូច្នោះទេ ទោះជីវកម្មរឹងមាំប៉ុណ្ណា ក៏មិនអាចឈរជើងបានយូរនោះទេដែរ។ មុំទាំងពីរដែលមានសារៈសំខាន់សម្រាប់អាជីវកម្មនីមួយៗ គឺផែនការអាជីវកម្ម និងផែនការហិរញ្ញវត្ថុ។

លោកបញ្ជាក់ថា ៖

«ជារួម ផែនការអាជីវកម្មពិតជាមានសារៈសំខាន់ខ្លាំងណាស់ ព្រោះវាប្រៀបបានទៅនឹងមគ្គទេសក៍តម្រង់ផ្លូវដល់គ្រប់ម្ចាស់អាជីវកម្មទាំងអស់ ហើយម្ចាស់អាជីវកម្មក៏អាចប្រើវាដើម្បីស្នើសុំដើមទុនពីអ្នកវិនិយោគឬម្ចាស់ភាគហ៊ុនស្នើសុំការសហការពីអ្នកផ្គត់ផ្គង់ និងទាក់ទាញអតិថិជនសក្តានុពលថែមទៀតផង។ ទន្ទឹមនេះ ការមានផែនការហិរញ្ញវត្ថុគឺជាឧបករណ៍ដ៏ល្អសម្រាប់ការគ្រប់គ្រងហិរញ្ញវត្ថុ និងសម្រេចបានលទ្ធផលកាន់តែមានប្រសិទ្ធភាពទាន់ពេលវេលា។ ជាងនេះទៅទៀត វាអនុញ្ញាតឱ្យបុគ្គល ឬស្ថាប័នមានអារម្មណ៍ជ្រាបច្បាស់អំពីដំណើរការនៃការឈានដល់គោលដៅរបស់ពួកគេ ដូច្នេះហើយបណ្តុះទំនុកចិត្តលើអនាគតរបស់ពួកគេ និងអនាគតរបស់កូនៗរបស់ពួកគេ»។ 

ដោយឡែក មានសំណួរលើកឡើងថា តើហេតុអ្វីបានជា MSMEs និងSMEs) ពិបាកក្នុងការទទួលបានប្រភពទុនកម្ចីពីគ្រឹះស្ថានធនាគារ និងហិរញ្ញវត្ថុ អំឡុងពេលវិបត្តិសេដ្ឋកិច្ចសកល ?

លោក ឌុក សារ៉ាក់ នាយកនៃនាយកដ្ឋានសេវាហិរញ្ញវត្ថុសហគមន៍ Maybank បានថែ្លងថា ពីខាងធនាគារ គឺផ្តល់ប្រឹក្សាដល់ម្ចាស់ MSMEs និងSMEs ថាតើគួរយកបំណុលថែម ឬមិនគួរយកបំណុល ប៉ុន្តែវិស័យធនគារត្រូវផ្តល់ប្រឹក្សាច្បាស់លាស់ណាស់ ដើម្បីប្រើប្រាស់កម្ចីទៅត្រូវចំគោលដៅ និងមិនឱ្យអង្គភាពរបស់គាត់ធ្លាក់ចូលវិបត្តិហិរញ្ញវត្ថុ ដោយសារការខ្ចីបុលបន្ថែម។

លោកបានបន្តថា ៖

«នៅពេលដែលយើងដឹងថា គាត់កំពុងមានបញ្ហា ហើយអ្នកខ្លះជួយផ្តល់កម្ចីឱ្យពួកគាត់ដើម្បីទៅទូទាត់លើកម្ចីមួយទៀត ដើម្បីរក្សាបានប្រវត្តិឥណទានល្អ។ ការណ៍នេះអាចធ្វើឱ្យជួបបញ្ហាកាន់តែធ្ងន់ធ្ងរជាងមុន។ ក្នុងន័យនេះ MSMEs និងSMEs ដែលកំពុងមានបញ្ហាផ្នែកហិរញ្ញវត្ថុ នឹងត្រូវបន្ថែមបន្ទុកទៅលើបំណុលកាន់តែច្រើន។ សម្រាប់ដំណោះស្រាយរយៈពេលវែង ធនាគារមិនអាចផ្តល់កម្ចីបន្ថែមដល់ពួកគាត់ទេ ហើយត្រង់ចំណុចនេះ វាអាចបង្កើនបំណុលកាន់តែច្រើនដល់ពួកគាត់»។

លោក ឌុក សារ៉ាក់ បានឱ្យដឹងថា ក្នុងកំឡុងពេលមានបញ្ហា ឧទាហរណ៍ ដូចកាលសម័យវិបត្តិកូវីដ-១៩ MSME ជួបបញ្ហាធ្លាក់ចំណូលដែលបង្កការរាំងស្ទះដល់លទ្ធភាពសង នាពេលនោះដំណោះស្រាយដ៏ល្អនោះគឺការរៀបចំឥណទានឡើងវិញ ដើម្បីសម្រាលបន្ទុកដល់កូនបំណុល។

លោកបានលើកឡើងថា ជាធម្មតា គ្រឹះស្ថានធនាគារ​ និងហិរញ្ញវត្ថ នៅតែផ្តល់កម្ចីដល់ MSMEs និងSMEs ដើម្បីជាទុនសម្រាប់ជំរុញប្រតិបត្តិការអាជីវកម្ម ប៉ុន្តែគ្រឹះស្ថានធនាគារ និងហិរញ្ញវត្ថុត្រូវពិនិត្យ នឹងសិក្សាទៅលើស្ថានភាពជាស្តែងរបស់អង្គភាព ពិភាក្សា និងផ្តល់ប្រឹក្សាឱ្យអតិថិជនលើការរៀបចំហិរញ្ញវត្ថុ។ អ្វីជាចំណុចសំខាន់នោះ នៅពេលពួកគាត់ជូបបញ្ហា គ្រឹះស្ថានធនាគារ​ និងហិរញ្ញវត្ថ មិនផ្តល់បន្ទុកដល់ម្ចាស់ MSMEs និងSMEs បន្ថែមនោះទេ៕