ភ្នំពេញ៖ របាយការណ៍​របស់​អគ្គនាយកដ្ឋានគយ និងរដ្ឋាករកម្ពុជា (GDCE) បានបង្ហាញថា នៅក្នុងរយៈ​ពេល១១ខែ ឆ្នាំ២០២៥ ការ​ដោះ​ដូរ​ទំនិញ​កម្ពុជា-អង់គ្លេស ​សម្រេច​បាន​តម្លៃទឹក​ប្រាក់ជាង ​៩៨១ លានដុល្លារ​កើនឡើង ៥,៣ ភាគរយ​ធៀប​នឹង​រយៈ​ពេល​ដូច​គ្នា​​​នៅ​ក្នុង​ឆ្នាំ២០២៤ ដែល​មាន​ទំហំ ​៩៣២ លានដុល្លារ។ ​

ផលិតផល​សំខាន់ៗដែលជាទំនិញមានសក្តានុពលរបស់កម្ពុជានាំចេញទៅចក្រភពអង់គ្លេសរួមមាន សម្លៀកបំពាក់ ស្បែកជើង កង់ ធញ្ញជាតិ និងផលិតផលកសិកម្ម ដែលឆ្លុះបញ្ចាំងពីជំហររឹងមាំរបស់កម្ពុជាក្នុងវិស័យផលិតកម្មស្រាល និងកសិកម្ម ។ រីឯទំនិញនាំចូលសក្តានុពលពីចក្រភពអង់គ្លេសមកកម្ពុជាវិញរួមមាន គ្រឿងយន្ត ឱសថ ក្រណាត់វាយនភណ្ឌ ផលិតផលចំណីសត្វ និងទំនិញម្ហូបអាហារផ្សេងៗ ។

សូមបញ្ជាក់ថា ចក្រភពអង់គ្លេស គឺជាទីផ្សារដ៏សំខាន់មួយសម្រាប់ផលិតផលកសិកម្ម និងកម្មន្តសាលរបស់កម្ពុជា ដែលពាណិជ្ជកម្មទ្វេភាគីររវាងប្រទេសទាំងពីរបានកើនលើសពី ១ ០០០លានដុល្លារអាម៉េរិក ជាលើកដំបូងនៅឆ្នាំ២០២៤ កើនឡើង១៦ភាគរយបើប្រៀបធៀបទៅនឹងឆ្នាំ២០២៣។

សមិទ្ធផលដ៏សំខាន់នេះបានពង្រឹងជំហររបស់ចក្រភពអង់គ្លេសជាដៃគូពាណិជ្ជកម្មធំជាងគេទី១០ របស់ប្រទេសកម្ពុជាបន្ទាប់ពីប្រទេសចិន អាម៉េរិក វៀតណាម ថៃ ជប៉ុន កាណាដា ឥណ្ឌូនេស៊ី អាល្លឺម៉ង់ និងអេស្ប៉ាញ ដែលបង្ហាញពីទំនាក់ទំនងសេដ្ឋកិច្ចដែលកំពុងរីកចម្រើន និងឱកាសសម្រាប់ការពង្រីកបន្ថែមទៀតនៅក្នុងឆ្នាំខាងមុខ។

លោកបណ្ឌិត ហុង វណ្ណៈ បានប្រាប់ AMS ថា ពាណិជ្ជកម្មទ្វេភាគីកម្ពុជា-អង់គ្លេស មានលក្ខណៈល្អប្រសើរ គឺតាំងពីមុនសម័យដែលចក្រភពអង់គ្លេសមិនទាន់ចាកចេញពីសហភាពអឺរ៉ុប។ ទំនាក់ទំនងការទូតរវាងប្រទេសទាំង២ ក៏មានភាពប្រសើរ ដែលជំរុញឱ្យទំហំពាណិជ្ជកម្មមានការកើនឡើងជាបន្តបន្ទាប់។ អ្វីដែលសំខាន់ នៅក្នុងកិច្ចសហប្រតិបត្តិការជាបន្តបន្ទាប់នេះដែរ ប្រទេសអង់គ្លេស បានសន្យាទទួលយកនូវការបញ្ជាទិញផលិតផលប្រទេសកម្ពុជា ជាកសិផល (ដែលមិនយកពន្ធ) នាំទៅកាន់ទីផ្សារអង់គ្លេស ។

លោកបណ្ឌិតបានបញ្ជាក់ថា៖

« ប្រសិនបើយើងទទួលបាននូវការអនុគ្រោះពីចក្រភពអង់គ្លេស មានន័យថា កម្ពុជា ក៏អាចទទួលបានឱកាស និងអាចរួមចំណែកជំរុញឱ្យសង្វាក់ផលិតកម្មនៅកម្ពុជាកើនឡើង ដើម្បីនាំចេញទៅទីផ្សារអង់គ្លេស។ ដូច្នេះ ចក្រភព​អង់គ្លេស ​នៅតែ​ជាទី​ផ្សារ​ទិសដៅ​សំខាន់​សម្រាប់​កម្ពុជា ព្រោះ​ការនាំចេញ​ទំនិញ​ទៅ​ទីនោះ​ស្ថិតក្រោម​លក្ខខណ្ឌ​ពន្ធ​ពិសេស ហើយ​កម្ពុជា ​ក៏​អាច​យក​ទីផ្សារ​ចក្រភព​អង់គ្លេស​​បន្តភ្ជាប់ទៅកាន់ប្រទេសជា​សមាជិក​សហភាព​អឺរ៉ុប​ផងដែរ​»។

អ្នកជំនាញសេដ្ឋកិច្ចរូបនេះបានបញ្ជាក់បន្ថែមថា នៅក្នុងកិច្ចទំនាក់ទំនងល្អ និងភាពស្អិតល្មួតរវាងគ្នា កម្ពុជាអាចបង្កើតចំណុចសំខាន់ចំនួន២សម្រាប់ខ្លួនឯង ពោលគឺទី១ នៅក្នុងទំនាក់ទំនងល្អ អាចឱ្យកម្ពុជាទាក់ទាញអ្នកធុរកិច្ចពីចក្រភព​អង់គ្លេ​ស​មកកម្ពុជា ហើយទី២ ទីផ្សារអង់គ្លេសអាចជួយបង្ហូរទំនិញរបស់កម្ពុជាទៅទីផ្សារបណ្តាប្រទេសដទៃទៀតនៅក្នុងតំបន់អឺរ៉ុប៕