បាត់ដំបង ៖ រដ្ឋាភិបាលជប៉ុនផ្តល់ថវិកាចំនួន ៧៦ ៣៣៣ ដុល្លារអាមេរិក ដល់សហព័ន្ធកីឡាបាល់បោះរទេះជនពិការកម្ពុជា (CWBF) ក្រោមគ្រោងការណ៍ជំនួយឥតសំណងសម្រាប់គម្រោងទ្រង់ទ្រាយតូចវប្បធម៌ (គូសាណូណិ)។

កិច្ចសន្យាផ្តល់ជំនួយនេះត្រូវបានចុះហត្ថលេខានាព្រឹកថ្ងៃទី២១ ខែមីនា ឆ្នាំ២០២៤ នៅស្ថានទូតជប៉ុនប្រចាំកម្ពុជា ដោយឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និង ពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា និងអ្នកម្នាង ស៊ីសុវត្ថិ កន្ធីរ៉េត ប្រធានសហព័ន្ធកីឡាបាល់បោះរទេះជនពិការកម្ពុជា (CWBF) ។

ថវិកាជំនួយនេះនឹងត្រូវប្រើប្រាស់ដើម្បីសាងសង់ដំបូលទីលានបាល់បោះរទេះ ជនពិការ ដែលមានទីតាំងស្ថិតនៅមជ្ឈ​មណ្ឌលស្តារលទ្ធភាពពលកម្មកាយសម្បទាខេត្តបាត់ដំបង។

ឯកឧត្តមឯកអគ្គរាជទូត អ៊ូអិណុ អាត់ស៊ូស៊ី បានមានប្រសាសន៍ថា ៖ ជំនួយឥតសំណងសម្រាប់គម្រោងទ្រង់ទ្រាយតូចវប្បធម៌នេះ គាំទ្រដល់អាជ្ញាធរមូលដ្ឋាន និងអង្គការក្រៅរដ្ឋាភិបាលនានាក្នុងការអនុវត្តគម្រោងដែលរួមចំណែកដោយផ្ទាល់ដល់ការលើកកម្ពស់សកម្មភាពវប្បធម៌ កីឡា និងការអប់រំកម្រិតខ្ពស់ ក៏ដូចជាការអភិរក្សបេតិកភណ្ឌវប្បធម៌ នៅក្នុងប្រទេសកំពុងអភិវឌ្ឍ។

ទោះជាយ៉ាងណាក៏ដោយ បន្ទាប់ពីការសាងសង់ដំបូលរួចរាល់រំពឹងថាអត្តពលិកអាចហាត់សមកីឡាបាល់បោះបានគ្រប់ពេលវេលា មិនថាអាកាសធាតុបែបណាក៏ដោយ ហើយ ក្រុមកីឡាបាល់បោះរទេះជនពិការអាចទទួលបានលទ្ធផលកាន់​តែល្អប្រសើរជាងមុននៅក្នុងការប្រកួតអន្តរជាតិនៅថ្ងៃអនាគត។

ឯកឧត្តមបានបន្តថា ៖ គម្រោងនេះនឹងជួយសម្រួលបន្ថែមដល់ការផ្លាស់ប្តូរវប្បធម៌ ក៏ដូចជាធ្វើឱ្យចំណងមិត្តភាព និងការយល់អំពីគ្នាមានភាពកាន់តែស៊ីជម្រៅរវាងប្រទេសទាំងពីរ។ ជប៉ុនក៏នឹងបន្តចូលរួមចំណែកក្នុងការដោះស្រាយបញ្ហាប្រឈម ដើម្បីកែលម្អគុណភាពជីវិតតាមរយៈគ្រោងការណ៍ជំនួយអភិវឌ្ឍន៍ផ្លូវការផ្សេងៗ រួមទាំងជំនួយឥតសំណងគូសាណូណិ។

អ្នកម្ខាង ស៊ីសុវត្ថិ កន្ធីរ៉េត ប្រធានសហព័ន្ធកីឡាបាល់បោះរទេះជនពិការកម្ពុជា បានមានព្រះរាជបន្ទូលថា ៖ តាមរយៈជំនួយនេះមិនត្រឹមតែបង្ហាញអំពីសក្ខីភាពចំពោះចំណងមិត្តភាពដ៏រឹងមាំរបស់ប្រទេសជាតិទាំងពីរនោះទេ ប៉ុន្តែក៏ជាក្តីសង្ឃឹមដ៏ធំធេងចំពោះអត្តពលិកដែលមានពិការភាពនៅក្នុងប្រទេសកម្ពុជាទាំងមូលផងដែរ។ ជំនួយដ៏ថ្លៃថ្លាមួយនេះ គឺជាការរួមចំណែកឱ្យសហព័ន្ធបានបន្តបេសកកម្មក្នុងការលើកកម្ពស់បរិយាបន្នសង្គម ការពង្រឹងសិទ្ធិអំណាច និងស្មារតីកីឡា ក្នុងចំណោមជនមានពិការភាពតាមរយៈកីឡាបាល់បោះរទេះជិះរទេះជនពិការ។

អ្នកម្ខាង ស៊ីសុវត្ថិ កន្ធីរ៉េត បានបន្តថា ការគាំទ្រមួយនេះនឹងអាចឱ្យកីឡាករអនុវត្តសកម្មភាពហ្វឹកហាត់ដែលមានទីលានស្អាតល្អ និងផ្តល់ឱកាសសម្រាប់អត្តពលិកបានចូលរួមប្រកួតទាំងកម្រិតថ្នាក់ជាតិ និងអន្តរជាតិ។ ការប្តេជ្ញាចិត្តមួយនេះគឺជាផ្នែកមួយដ៏សំខាន់ក្នុងការពង្រឹងកិច្ចសហការ និងសាមគ្គីភាពតាមរយៈសកម្មភាពកីឡា ហើយសហព័ន្ធពិតជាមានកិត្តិយសដែលមានស្ថានទូតជប៉ុនជាដៃគូសហការនៅក្នុងបេសកកម្មមួយនេះ៕