ភ្នំពេញ ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងអំពីអាទិភាពរបស់រាជរដ្ឋាភិបាលក្នុងការជំរុញប្រជាជនឱ្យទទួលបានចំណូលខ្ពស់ ដើម្បីស្របទៅនឹងគោលដៅក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។ ការលើកឡើងបែបនេះត្រូវបានធ្វើឡើងនៅក្នុងឱកាសដែលសម្ដេចអញ្ជើញជាអធិបតីនាពីធីខួប២០ឆ្នាំ ដែលកម្ពុជាបានចូលជាសមាជិកអង្គការពាណិជ្ជកម្មពិភពលោក (WTO) កាលពីពេលកន្លងទៅថ្មីៗនេះ។

ជាការឆ្លើយតបទៅនឹងគោលដៅនេះ សម្ដេចធិបតី ហ៊ុន ម៉ាណែត បានរំលេចនូវសកម្មភាពសំខាន់ៗមួយចំនួនដូចជា​ការជំរុញការអភិវឌ្ឍវិស័យគន្លឹះ និងប្រភពថ្មីនៃកំណើនសេដ្ឋកិច្ច តាមរយៈការធ្វើពិពិធ​កម្មមុខទំនិញ​នាំចេញបន្ថែមទៀត ក្រៅពីសម្លៀកបំពាក់ និងអង្ករ តួរយ៉ាងដូចជាផលិតផលធ្វើដំណើរ គ្រឿង​អេឡិច​ត្រូនិក បន្ទះសូឡា កង់ និងផលិតផលកសិកម្មផ្សេងទៀតដូចជា កៅស៊ូ គ្រាប់ស្វាយចន្ទី ចេក និងផ្លែស្វាយ។

បន្ថែមពីនេះ រាជរដ្ឋាភិបាលក៏ផ្ដល់ការលើកទឹកចិត្តផ្នែកពន្ធដារដល់សហគ្រាសផលិត ផ្គត់ផ្គង់ក្នុង​ស្រុក និងនាំចេញស្រូវ អង្ករ ពោត ដំឡូង សណ្ដែក ម្រេច ដំឡូង គ្រាប់ស្វាយចន្ទី ជ័រកៅស៊ូ មៀនប៉ៃលិន វារីវប្បកម្ម ការចិញ្ចឹមសត្វ ផលិតផលដូងប្រេងជាដើម ដើម្បីលើកកម្ពស់ផលិតកម្មសម្រាប់តម្រូវការក្នុងស្រុក និងជំរុញការនាំចេញផលិតផលទាំងនោះឱ្យមានតម្លៃបន្ថែមកាន់តែខ្ពស់ សំដៅផ្ដល់ផលប្រយោជន៍ដល់កសិករ និងវិនិយោគិន។

សម្រាប់រាជរដ្ឋាភិបាលកម្ពុជា ដើម្បីអាចក្លាយជាប្រទេសមានការអភិវឌ្ឍខ្លាំងក្លា គឺមិនមែនរដ្ឋមានថវិកាច្រើននោះទេ ប៉ុន្តែកម្រិតជីវភាពប្រជាពលរដ្ឋឯណោះទេដែលជាសូចនាករវាស់វែងពីការ​អភិវឌ្ឍ។ ម្លោះហើយ សកម្មភាពអាទិភាពទាំងប៉ុន្មានដែលរាជរដ្ឋាភិបាល និងក្រសួងពាក់ព័ន្ធកំពុងដុតដៃ ដុតជើងធ្វើ គឺដើម្បីបុព្វហេតុជំរុញនូវចំណូលរបស់ប្រជាជននេះឯង។

ទន្ទឹមនឹងការរើបម្រាស់របស់កម្ពុជាក្នុងការដើរចេញពីប្រទេសដែលមានការអភិវឌ្ឍតិចតួចនាពេលនេះ សម្ដេចនាយករដ្ឋមន្ត្រីបានទទួលស្គាល់ថា កម្ពុជានឹងត្រូវប្រឈមជាមួយភាពលំបាកមួយចំនួន ដែលរួមមាន ការកាត់ផ្ដាច់ជំនួយអភិវឌ្ឍន៍ពីអន្តរជាតិ និងការលុបចេញនូវគោលការអនុគ្រោះផ្សេងៗលើផ្នែកពាណិជ្ជកម្ម និងហិរញ្ញវត្ថុជាដើម។ ប៉ុន្តែ បើទោះបីជាយ៉ាងនេះក្ដី រាជរដ្ឋាភិបាលនៅតែបន្តអះអាងពីជំហររបស់កម្ពុជាក្នុងការត្រៀមលត់ដំខ្លួន សំដៅពង្រឹងភាពម្ចាស់ការលើខ្លួនឯង ពោលគឺមិនរស់ពឹងជំនួយអន្តរជាតិ។

ត្រង់ចំណុចនេះដែរ សម្ដេចធិបតីបានមានប្រសាសន៍ថា៖

«សំណួរសួរថា បើលំបាកបែបហ្នឹង តើចេញធ្វើអី? យើងនៅសម្ងំជាប្រទេសក្រីក្រទៅ គេយោគយល់​។ តើយើងនៅក្រមួយជីវិត ​ឬយ៉ាងម៉េច តើយើងនៅរំពឹងគេជួយតាមការអនុគ្រោះ ឬត្រូវពឹងខ្លួនឯង? ចម្លើយគឺ យើងចៀស​មិនផុត​​ពីពង្រឹងភាពជាម្ចាស់ការលើខ្លួនឯង តាមរយៈការចាកចេញពីប្រទេសក្រីក្រដើម្បី​ពង្រឹងខ្លួនឯងបន្ថែមទៀត»។

នៅក្នុងឱកាសជាមួយគ្នានេះ សម្ដេចធិបតី ហ៊ុន ម៉ាណែត បានសង្កត់ធ្ងន់ថា ៖

«បើយើងមិនខំ​ មិនប្រឈមការលំបាក យើងនៅតែប៉ុណ្ណឹង ទីផ្សាររបស់យើង កម្រិតជីវភាពរបស់យើង ក៏នៅតែប៉ុណ្ណឹង។ ដូច្នេះហើយ ទោះដឹងថាហត់ ដឹងថាលំបាក តែត្រូវតែដាក់ផែនការ រៀបចំ​ផែនទីបង្ហាញផ្លូវ ដាក់គោលដៅកាន់តែខ្ពស់ ទើបយើងដើរបានកាន់តែឆ្ងាយ ដើម្បីប្រជាពលរដ្ឋយើង»៕