ភ្នំពេញ ៖ ធនាគារជាតិនៃកម្ពុជា បានអះអាងថា ប្រព័ន្ធធនាគារនៅកម្ពុជា បាន និងកំពុងបន្តភាពរឹងមាំ ហើយបានរួមចំណែកដល់ការស្ដារឡើងវិញនៃស្ថានភាពសេដ្ឋកិច្ចនៅដើមឆ្នាំ២០២៥នេះ ដោយគិតត្រឹមខែកុម្ភៈឆ្នាំ២០២៥ ទ្រព្យសកម្មរបស់គ្រឹះស្ថានធនាគារ និងហិរញ្ញវត្ថុ មានចំនួន ៩៤,៦ប៊ីលានដុល្លារអាមេរិក កើនឡើង ៧,៧ភាគរយ ខណៈដែលប្រាក់បញ្ញើរបស់អតិថិជនមានចំនួន ៥៨,៦ប៊ីលានដុល្លារ កើនឡើង ១៦,២ភាគរយ និងឥណទានទៅកាន់វិស័យចម្បងៗមានចំនួន ៦០,៣ប៊ីលានដុល្លារ កើនឡើងប្រមាណ៣ភាគរយ។

ថ្លែងក្នុងពិធីសម្ពោធបើកដំណើរការជាផ្លូវការនូវអគារការិយាល័យកណ្តាលរបស់ធនាគារ ហត្ថា ម.ក ដែលមានកម្ពស់ ២២ជាន់ ស្ថិតក្នុងរាជធានីភ្នំពេញ តាមបណ្តោយមហាវិថីសម្ដេចតេជោ (៦០ម៉ែត្រ) នៅថ្ងៃទី៣០ ខែមេសា ឆ្នាំ២០២៥ នេះ ឯកឧត្តម រ័ត្ន សុវណ្ណនរៈ ទេសាភិបាលរងធនាគារជាតិនៃកម្ពុជា បានបញ្ជាក់ថា ស្ថានភាពដើមទុនសន្ទនីយភាពរក្សាបានភាពរឹងមាំ ដែលឆ្លុះបញ្ចាំងដោយកម្រិតខ្ពស់នៃអនុបាតសាធនភាព ២២,៣ភាគរយ សម្រាប់គ្រឹះស្ថានធនាគារ និង២៥,៨ភាគរយ សម្រាប់គ្រឹះស្ថានមីក្រូហិរញ្ញវត្ថុ និងកម្រិតខ្ពស់នៃអនុបាតក្របខ័ណ្ឌសន្ទនីយភាព ១៩៤,៨ សម្រាប់ធនាគារពាណិជ្ជ និង១៨៣,៧ សម្រាប់គ្រឹះស្ថានមីក្រូហិរញ្ញវត្ថុ សម្រាប់ប្រាក់បញ្ញើ។ គ្រឹះស្ថានធនាគារ និងហិរញ្ញវត្ថុនៅកម្ពុជា បានបន្តចូលរួមលើកកម្ពស់បរិយាប័ណ្ណហិរញ្ញវត្ថុជាលំដាប់ ដោយបច្ចុប្បន្នចំនួនគណនីប្រាក់បញ្ញើរបស់អតិថិជនបានកើនដល់ ២៧,២លានគណនី និងគណនីឥណទានអតិថិជនកើនដល់ ៤,៣លានគណនី។

លោក មិន សុផា ប្រធាននាយកប្រតិបត្តិធនាគារ ហត្ថា បានអះអាងថា ស្ថានភាពហិរញ្ញវត្ថុនៃធនាគាររបស់ខ្លួននៅតែមានភាពរឹងមាំ ដោយអនុបាតសន្ទនីយភាពស្ថិតក្នុងស្ថិរភាពមួយល្អ ខណៈធនាគារមេរបស់ខ្លួន ដែលមានមូលដ្ឋាននៅក្រៅប្រទេសនៅតែបន្តផ្តល់ទុនកម្រិតឥណទានរហូតដល់ជិត៥០០លានដុល្លារអាមេរិក ដើម្បីគាំទ្រដល់ស្ថិរភាព និងការពង្រឹងសមត្ថភាពធនាគាររបស់ខ្លួន ដែលធ្វើឱ្យដើមទុននៃធនាគាររបស់ខ្លួននៅកម្ពុជាក្នុងពេលបច្ចុប្បន្ននេះ កើនឡើងដល់ ២២០លានដុល្លារ។

លោកបានថ្លែងបញ្ជាក់ថា ភាពរឹងមាំនៃប្រព័ន្ធធនាគារនៅកម្ពុជា បានជំរុញឱ្យធនាគាររបស់ខ្លួនពង្រីកផលិតផល និងសេវាកម្មផ្សេងៗជាបន្តបន្ទាប់ ដូចជា ពង្រីកទីផ្សារគោលដៅទៅកាន់អាជីវកម្មខ្នាតតូច សហគ្រាសខ្នាតធំ និងអាជីវកម្មបន្ថែមលើអតិជនស្នូលដែលស្រាប់កន្លងមក។

សូមបញ្ជាក់ដែរថា គ្រឹះស្ថានធនាគារ និងហិរញ្ញវត្ថុ បានបន្តចូលរួមលើកកម្ពស់បរិយាបន្ន ហិរញ្ញវត្ថុជាលំដាប់ ដោយបច្ចុប្បន្ន ចំនួនគណនីប្រាក់បញ្ញើអតិថិជនបានកើនឡើងដល់ ២៧,២ លាន គណនី និងគណនីឥណទានអតិថិជនកើនដល់ ៤,៣ លានគណនី។ ធនាគារជាតិនៃកម្ពុជាបានពង្រឹងការត្រួតពិនិត្យលើគ្រឹះស្ថានធនាគារ និងហិរញ្ញវត្ថុជាប្រចាំ តាមវិធីសាស្ត្រត្រួតពិនិត្យផ្អែកលើហានិភ័យ និងទស្សនៈអនាគត ជាមួយនឹងការអនុវត្តយុទ្ធសាស្ត្រចាក់ចេញពីវិបត្តិជាជំហានៗ ដើម្បីពង្រឹងភាពធន់នៃប្រព័ន្ធធនាគារ និងរក្សាស្ថិរភាពហិរញ្ញវត្ថុ៕