គម្រោងវិនិយោគបង្កើតរោងចក្រផលិតសំបកកង់រថយន្ត និងពោះវៀនកង់ ក្រោមទុនវិនិយោគប្រមាណ ៤៥០ លានដុល្លារ ស្ថិតក្នុងតំបន់សេដ្ឋកិច្ចពិសេស យូ ប៊ី អ៊ី ស្នួល ខេត្តក្រចេះ ត្រូវបានរំពឹងថានឹងជួយឱ្យតម្រូវការជ័រកៅស៊ូក្នុងស្រុកកាន់តែមានទីផ្សារបន្ថែមទៀត។

យោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា (CDC) កាលពីចុងសប្ដាហ៍កន្លងទៅនេះ គម្រោងវិនិយោគលើរោងចក្រផលិតសំបកកង់រថយន្តនេះ ដែលវិនិយោគដោយក្រុមហ៊ុន New Continent (Cambodia) Tire Co., LTD. គឺជាគម្រោងទី ៣ ហើយដែលបានមកបោះទីតាំងវិនិយោគ នៅក្នុងខេត្តក្រចេះ ហើយក៏ជារោងចក្រផលិតសំបកកង់រថយន្តទី ៨ ដែលបានមកបោះទីតាំងវិនិយោគនៅកម្ពុជា។

ក្រុមប្រឹក្សាអភិវឌ្ឍន៍កម្ពុជា ក៏បានអបអរសាទរ ដល់ប្រជាពលរដ្ឋស្រុកស្នួល ខេត្តក្រចេះ ក៏ដូចជាពលរដ្ឋនៅតំបន់ភូមិភាគឦសាន្ត ព្រោះគម្រោងវិនិយោគនេះនឹងអាចបង្កើតការងារ និងបង្កើតប្រាក់ចំណូលបន្ថែមជូនប្រជាពលរដ្ឋ ពិសេសជួយលើកកម្ពស់ជីវភាពគ្រួសារកាន់តែប្រសើរ។ គម្រោងនេះនឹងបង្កើតការងារបានរហូតដល់ ៣០០០ នាក់ ដល់ពលរដ្ឋក្នុងតំបន់ ក៏ដូចជាពលរដ្ឋក្នុងប្រទេសកម្ពុជាទាំងមូល។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានថ្លែងប្រាប់ AMS ថា កម្ពុជាស្វាគមន៍រាល់រោងចក្រផលិតសំបកកង់ឡាន ដែលបានសម្រេចបោះទុនវិនិយោគ និងជ្រើសរើសប្រទេសកម្ពុជា ជាទីតាំងវិនិយោគរបស់ខ្លួន។

អ្នកឧកញ៉ា បានថ្លែងដូច្នេះថា៖

“ការវិនិយោគលើរោងចក្របែបនេះកាន់តែច្រើន នឹងផ្ដល់អត្ថប្រយោជន៍បន្ថែមដល់អ្នកដាំដុះដំណាំកៅស៊ូ។ ជាក់ស្ដែង នៅពេលមានរោងចក្រផលិតសំបកកង់ឡានកាន់តែច្រើន នឹងធ្វើឱ្យតម្រូវការជ័រកៅស៊ូក្នុងស្រុកកាន់តែច្រើន មានតម្លៃល្អ ដោយមិនបារម្ភកង្វះទីផ្សារ ឬតម្លៃទៀតនោះឡើយ។”

លោក ឃុន កក្កដា អគ្គនាយករង ទទួលបន្ទុករួមអគ្គនាយកដ្ឋានកៅស៊ូ បានប្រាប់បណ្តាញព័ត៌មាន AMS ថា តាមរយៈការខិតខំជំរុញការដាំដុះលើផលិតកម្មដំណាំកៅស៊ូ នៅតំបន់ភូមិភាគឦសាន បានធ្វើឱ្យក្រុមហ៊ុនវិនិយោគក្នុង និងក្រៅប្រទេស ចូលមកបណ្ដាក់លើឧស្សាហកម្មកែច្នៃ ហើយថ្មីៗនេះ ក៏ឃើញមានវត្តមាន​រោងចក្រផលិតសំបកកង់ឡានជាបន្តបន្ទាប់ ចូលទៅវិនិយោគនៅក្នុងភូមិភាគឦសានជាកន្លែង ដែលមានសក្ដានុពលលើដំណាំកៅស៊ូ។

លោកបានបន្តថា ការងារបន្ទាប់របស់អគ្គនាយកដ្ឋាន ក៏ដូចជាអ្នកពាក់ព័ន្ធ គឺខិតខំប្រឹងជំរុញការដាំដុះ និងផលិតជ័រកៅស៊ូ ដើម្បីបំពេញតម្រូវការលើទីផ្សារ ទៅឱ្យរោងចក្រផលិតសំបកកង់ឡានថ្មីៗ ដែលចូលមកវិនិយោគនៅកម្ពុជា។

លោក ឆេង ថុង ប្រធានសហគមន៍កសិកម្មសំបូរមានជ័យ បានមានប្រសាសន៍ថា វត្តមានរោងចក្រផលិតសំបកកង់ឡានបានចូលមកកម្ពុជាកាន់តែច្រើន ដែលធ្វើឱ្យតម្រូវការកៅស៊ូពីសហគមន៍ក៏កាន់តែច្រើន ។ បច្ចុប្បន្ន ក្នុងសហគមន៍កសិកម្មសំបូរមានជ័យ មានផ្ទៃដីលើដំណាំកៅស៊ូជាង ២០០ ហិកតា ដែលអាចរួមចំណែកបានមួយកម្រិតដល់ការផ្គង់ផ្គង់ជ័រកៅស៊ូទៅកាន់រោងចក្រផលិតផលសំបកកង់ឡានទាំងនោះ។

លោកបានថ្លែងប្រាប់ថា៖

“វត្តមានរោងចក្រផលិតសំបកកង់រថយន្តនៅកម្ពុជា កាន់តែច្រើន នឹងជួយឱ្យអ្នកដាំកៅស៊ូកាន់តែទទួលបានផលចំណេញ ហើយថែមទាំងបានផ្ដល់ការងារដល់ពលរដ្ឋក្នុងតំបន់ ឱ្យទទួលបានប្រាក់ចំណូល ដោយមិនចាំបាច់ធ្វើចំណាកស្រុកទៅក្រៅខេត្ត ឬក្រៅប្រទេស ព្រោះការងារក្នុងចម្ការកៅស៊ូត្រូវការកម្មករច្រើន ពិសេសណាស់សម្រាប់ចៀរជ័រកៅស៊ូ។”

គួរបញ្ជាក់ថា បច្ចុប្បន្ន កម្ពុជា មានរោងចក្រផលិតសំបកកង់រថយន្តចំនួន ៨ ដែលបានបោះទីតាំងនៅ​​តំបន់សេដ្ឋកិច្ចចំនួន ៥ នៃខេត្តស្វាយរៀង ព្រះសីហនុ និងខេត្តក្រចេះ។ រោងចក្រទាំងនោះ បានកំពុងតែស្រូបយកវត្ថុធាតុដើមជាជ័រកៅស៊ូ ក្នុងស្រុកមួយចំនួនធំ ដែលអាចចាត់ទុកថា ជាការនាំចេញនៅនឹងកន្លែង។

របាយការណ៍របស់អគ្គនាយកដ្ឋានកៅស៊ូ នៃក្រសួងកសិកម្មរុក្ខាប្រមាញ់ និងនេសាទ បានឱ្យដឹងថា នៅឆ្នាំ ២០២៥ កម្ពុជាមានផ្ទៃដីដំណាំកៅស៊ូ សរុបមានចំនួន ៤៤៨ ០៥១ ហិកតា ក្នុងនោះផ្ទៃដីចៀរជ័រមានចំនួន ៣៤៦ ៨៤២ ហិកតា ស្មើនឹង ៧៧% និងផ្ទៃដីថែទាំមានចំនួន ១០១ ២០៨ ហិកតា ស្មើនឹង ២៣%៕