បរទេស ៖ កិច្ចព្រមព្រៀងសន្តិភាពនៅអ៊ុយក្រែននៅមិនទាន់អាចធ្វើទៅរួចនោះទេខណៈតួលេខនៃការបាត់បង់ជីវិត និងពិការភាពរបស់ប្រជាជន ព្រមទាំងកងទ័ព មានរហូតទៅដល់ជាង៩ម៉ឺននាក់ (គិតតែភាគីប្រទេសរុស្ស៊ីប៉ុណ្ណោះ)។ យ៉ាងណាក្តី គេជឿជាក់ថា របបដឹកនាំរបស់លោកប្រធានាធិបតី Vladimir Putin នឹងមិនអាចទទួលរងនូវភាពរង្គោះរង្គើរនោះឡើយ។

បច្ចុប្បន្ននេះ លោកប្រធានាធិបតី Vladimir Putin មានវ័យដល់ទៅ៧៣ឆ្នាំហើយ ប៉ុន្តែអំណាចរបស់លោកហាក់ដូចជាមិនទាន់ថមថយនៅឡើយ បន្ទាប់ពីបានបំពេញការងារជានាយករដ្ឋមន្ត្រីរុស្ស៊ីដំបូងតាំងតែពីឆ្នាំ២០០០ រហូតដល់ឆ្នាំ២០១២ ទើបមកបំពេញការងារជាប្រធានាធិបតីរុស្ស៊ីរហូតមកដល់សព្វថ្ងៃ។ ឈានចូលដល់វ័យ៧៣ឆ្នាំកាលពីខែតុលាកន្លងទៅនេះ លោក Putin បានក្លាយទៅជាអ្នកនយោបាយដ៏មានឥទ្ធិពលបំផុតក្នុងប្រវត្តិសាស្ត្ររបស់រុស្ស៊ី ជាមួយនឹងបទពិសោធដឹកនាំប្រទេសដល់ទៅ២៥ឆ្នាំ ព្រមទាំងបទពិសោធនយោបាយជាច្រើនទសវត្សរ៍ផ្សេងទៀត។

តើរុស្ស៊ីបានត្រៀមខ្លួនរួចហើយឬនៅសម្រាប់ពេលអនាគតក្រោយពេលដែលមិនមានវត្តមានរបស់លោក Putin ?

យោងតាមការស្ទាបស្ទង់មតិមួយដែលធ្វើឡើងដោយ Radio Free Euorope/ Radio Liberty (RFE/RL) កាលពីឆ្នាំ២០២៤កន្លងទៅបានបង្ហាញពីការយល់ឃើញរបស់ក្រុមអ្នកមានចំណេះដឹងខ្ពស់របស់រុស្ស៊ីចំពោះការដឹកនាំរបស់លោក Putin នាពេលអនាគតដោយក្នុងនោះគេរកឃើញថា ៤០ភាគរយនៃអ្នកដែលបានឆ្លើយតបជឿជាក់ថា លោក Putin នឹងបន្តកាន់អំណាចរហូតដល់ពេលគាត់បាត់បង់ជីវិត។

ជាការកត់សម្គាល់ នៅក្នុងចំណោមអ្នកដែលបានបញ្ចេញមតិទាំងនោះ មានប្រមាណជាង ២៣ភាគរយ បានបង្ហាញពីក្ដីរំពឹងទុកថា អាចនឹងមានរដ្ឋប្រហារកើតឡើងដើម្បីទម្លាក់តំណែងរបស់បុរសខ្លាំងរុស្ស៊ីរូបនេះ ខណៈដែលប្រមាណជា ៣ភាគរយប៉ុណ្ណោះសង្ឃឹមទុកថា លោក Putin ខ្លួនឯងអាចនឹងមានការរៀបចំទុកដាក់អ្នកបន្តវេនដ៏ត្រឹមត្រូវម្នាក់ដើម្បីមកជំនួសតំណែងជាប្រធានាធិបតីរុស្ស៊ី។

ព្រមគ្នានេះដែរ មានអត្ថបទមួយដែលចេញផ្សាយដោយ TheWeek បានរៀបរាប់អំពីបេក្ខភាពដ៏មានសក្តានុពលមួយចំនួនដែលគេជឿជាក់ថា ទាំងពលរដ្ឋរុស្ស៊ីក្តី ទាំងរដ្ឋាភិបាលរុស្ស៊ីក្តី អាចផ្តល៉ទំនុកចិត្តដើម្បីគាំទ្រឱ្យកាន់តំណែងជំនួសលោក Putin នាពេលខាងមុខ (យ៉ាងឆាប់បំផុតក្នុងរយៈពេល៥ឆ្នាំ ឬយូរបំផុត១០ឆ្នាំខាងមុខ)។ ចំពោះបេក្ខភាពដែលគេរំពឹងថាអាចក្លាយជាអ្នកស្នងតំណែងរបស់ Putin រួមមានដូចជា ៖

លោក Mikhail Mishustin វ័យ៥៩ឆ្នាំ បច្ចុប្បន្នកំពុងបំពេញការងារជានាយករដ្ឋមន្ត្រីនៃប្រទេសរុស្ស៊ី។

លោក Sergei Sobyanin មានវ័យ ៦៦ឆ្នាំ ជាអភិបាលក្រុងមូស្គូអស់រយៈពេលជាយូរមកហើយ និងជាបេក្ខភាពដែលមានប្រជាប្រិយភាពបំផុត។

លោក Dmitry Medvedev មានវ័យ ៥៩ឆ្នាំ ធ្លាប់ទទួលតំណែងជាប្រធានាធិបតីរុស្ស៊ីម្តងដែរកាលពីអាណត្តិឆ្នាំ២០០៨ ដល់ឆ្នាំ២០១២ មុនពេលបោះបង់តំណែងនេះទៅឲ្យលោក Putin។

លោក Sergei Kiriyenkoជាអនុប្រធាន​អគ្គសេនាធិការទី១ របស់លោក Putin និងមានអាយុប្រមាណជា៦២ឆ្នាំ។

លោក Alexei Dyumin វ័យ៥២ឆ្នាំ ធ្លាប់បំពេញការងារជាអង្គរក្សផ្ទាល់របស់លោក Putin មុនពេលទទួលបានតំណែងការងារកំពូលក្នុងជួររដ្ឋាភិបាល។

គួរឲ្យដឹងដែរថា បច្ចុប្បន្ននេះ រុស្ស៊ី មានប្រជាពលរដ្ឋប្រមាណជា ១៤០លាននាក់ ប៉ុន្តែត្រូវបានចាត់ទុកថាជាប្រទេសដែលមានផ្ទៃដីធំជាងគេបំផុតរបស់ពិភពលោកដោយលាតសន្ធឹងចាប់ពីអឺរ៉ុបខាងកើតទៅដល់អាស៊ីខាងជើង។ រុស្ស៊ីទាំងមូល មានល្វែងម៉ោងខុសគ្នាដល់ទៅ១១ទីតាំងខុសគ្នា ហើយមានព្រំប្រទល់ជាមួយនឹងប្រទេសដទៃរហូតដល់ទៅ១៤ប្រទេស៕