សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ បានណែនាំដល់ក្រុមការងារចុះមូលដ្ឋានក្រុងកំពង់សោមឱ្យផ្ដោតការយកចិត្តទុកដាក់គិតគូរអំពីចលនាភូមិឃុំសង្កាត់មានសុវត្ថិភាពដែលជាឧបករណ៍នយោបាយមួយដ៏សំខាន់ និងរៀបចំសាលារៀនឱ្យបានល្អសម្រាប់ជាថ្នាលបណ្ដុះបណ្ដាលដល់សិស្សានុសិស្សឱ្យមានសីលធម៌សុជីវធម៌ ចៀសឆ្ងាយពីគ្រឿងញៀន និងល្បែងស៊ីសងគ្រប់ប្រភេទ ក្នុងគោលដៅបង្កើតបាននូវធនធានមនុស្សដែលមានគុណភាព និងធ្វើឱ្យការរស់នៅរបស់ប្រជាពលរដ្ឋមានភាពសុខដុមរមនា។
ថ្លែងក្នុងពិធីប្រកាសសមាសភាពក្រុមការងារចុះមូលដ្ឋានក្រុងកំពង់សោម ខេត្តព្រះសីហនុ នាព្រឹកថ្ងៃទី១០ ខែតុលា ឆ្នាំ២០២៥ ក្នុងនាមជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ ឯកឧត្តមឧបនាយករដ្ឋមន្ត្រី សាយសំអាល់ បានឱ្យដឹងថា នៅក្នុងការប្រកាសសមាសភាពនាពេលនេះគឺប្រកាសសមាសភាពឯកឧត្តម ឡៅ ទិព្វសីហា ជាប្រធានក្រុមការងាររាជរដ្ឋាភិបាលចុះមូលដ្ឋានក្រុងកំពង់សោម និងឯកឧត្តម សុខ កល្យាណ ជាប្រធានក្រុមការងារគណបក្សប្រជាជនកម្ពុជាចុះជួយក្រុងកំពង់សោម ។
ឯកឧត្តមឧបនាយករដ្ឋមន្ត្រី បានថ្លែងអំណរគុណដល់ក្រុមការងារទាំងចាស់ និងថ្មីទាំងអស់ ដែលបានខិតខំប្រឹងប្រែងដោយស្ម័គ្រចិត្តចុះជួយទាំងរាជរដ្ឋាភិបាល និងគណបក្សប្រជាជនកម្ពុជា ដោយចូលរួមផ្ដល់ទាំងសម្ភារៈ និងថវិកាសម្រាប់ជួយដល់ប្រជាពលរដ្ឋក្នុងមូលដ្ឋានស្រុកព្រៃនប់ ឬក្រុងកំពង់សោមនេះ។ ការកំណត់ស្រុកព្រៃនប់ថា ជាក្រុងកំពង់សោមវិញនោះគឺដោយសារមិនចង់បាត់បង់ឈ្មោះកំពង់សោម ពីព្រោះឈ្មោះនេះមានតាំងពីយូរយារណាស់មកហើយ ហើយយើងចង់រក្សាឈ្មោះកំពង់សោមឲ្យមាននៅទីនេះដដែល។
ឯកឧត្តមក៏បានបង្ហាញពីគោលបំណងចង់ឱ្យក្រុមការងារទាំងរាជរដ្ឋាភិបាល និងគណបក្សប្រជាជនកម្ពុជា ត្រូវគ្រប់គ្រងសមាជិករបស់ខ្លួនឱ្យបានខ្ជាប់ខ្ជួន ជាក់លាក់ ដែលនេះគឺជាកិច្ចការយុទ្ធសាស្ត្រទី១, រីឯទី២ គឺត្រូវខិតខំប្រឹងប្រែងធ្វើការងាររួមគ្នាជាមួយសមាជិកក្រុមការងារនៅមូលដ្ឋានផ្ទាល់ដើម្បីឲ្យបានយល់ពីគោលបំណងរួមទាំងអស់គ្នាក្នុងការដើរលើមាគ៌ាដ៏ត្រឹមត្រូវដែលដឹកនាំដោយគណបក្សប្រជាជនកម្ពុជា, ចំពោះចំណុចទី៣ គឺរដ្ឋបាលសាធារណៈ, ក្រុមការងារត្រូវចូលរួមគិតគូរលើគ្រប់វិស័យនៅក្នុងដែនសមត្ថកិច្ចរបស់ខ្លួន ដើម្បីជំរុញអោយក្រុងកំពង់សោមកាន់តែមានការអភិវឌ្ឍន៍រីកចម្រើន,ជីវភាពប្រជាពលរដ្ឋកាន់តែត្រូវបានលើកស្ទួយជាលំដាប់។ជាមួយនេះ ផ្តើមចេញពីការគ្រប់គ្រងក្នុងមូលដ្ឋាន ត្រូវធ្វើយ៉ាងណាឱ្យប្រជាជនរស់នៅស្អាត, គ្រប់គ្រងសំណល់រឹងរាវឲ្យបានត្រឹមត្រូវ, ទប់ស្កាត់បញ្ហាគ្រឿងញៀនល្បែងស៊ីសង អំពើលួចឆក់ប្លន់គ្រប់ប្រភេទ និងធ្វើយ៉ាងណាជំរុញឱ្យជីវភាពរស់នៅរបស់ប្រជាពលរដ្ឋកាន់តែប្រសើរឡើង នោះនឹងធ្វើឱ្យមូលដ្ឋាននីមួយៗមានសន្តិសុខសុវត្ថិភាព ប្រជាពលរដ្ឋរស់នៅប្រកបដោយភាពសុខដុមរមនា ។
ឯកឧត្តមក៏បានស្នើឱ្យមានការចូលរួមពីសមាជិកក្រុមការងារទាំងអស់ឱ្យគិតគូរពីចលនាភូមិឃុំសង្កាត់មានសុវត្ថិភាពដែលជាឧបករណ៍នយោបាយមួយដ៏សំខាន់ ដោយធ្វើយ៉ាងណាអប់រំបណ្ដុះផ្នត់គំនិតបញ្ជៀសកុំឱ្យយុវជនក្នុងមូលដ្ឋានប្រើប្រាស់គ្រឿងញៀននិងល្បែងស៊ីសង, រៀបចំសាលារៀនអោយបានល្អ មានលំហសាធារណៈ, បង្គន់អនាម័យ,មានចំណីអាហារប្រកបដោយជីវជាតិសម្រាប់សិស្សានុសិស្សនិង បណ្ដុះផ្នត់គំនិតសិស្សានុសិស្សឱ្យមានសីលធម៌ល្អក្នុងការរស់នៅ នោះសង្គមនឹងដើរទៅមុខដោយបង្កើតបាននូវធនធានមនុស្សមានគុណភាពសម្រាប់ចូលរួមអភិវឌ្ឍន៍ប្រទេសជាតិនាពេលអនាគត ដូច្នេះផ្ដើមចេញពីការគិតគូររៀបចំសាលារៀនឲ្យបានល្អ នោះយើងនឹងឈានទៅបន្តដំណើរលើមាគ៌ាដ៏ត្រឹមត្រូវរបស់គណបក្សប្រជាជនកម្ពុជា ហើយសន្តិភាពនឹងចាក់ឫសយ៉ាងជ្រៅបន្ថែមទៀតនៅក្នុងសង្គមជាតិ ៕
Account
Security
Favourite Content