សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ធនាគារអភិវឌ្ឍន៍អាស៊ី (ADB) បានព្យាករថា សេដ្ឋកិច្ចកម្ពុជានឹងកើនឡើងក្នុងអត្រា ៥,៨% ក្នុងឆ្នាំ២០២៤ និង ៦,០% ក្នុងឆ្នាំ ២០២៥ ដោយសារកំណើនក្នុងវិស័យកម្មន្តសាល និងការស្ទុះឡើងវិញជាបន្តទៀតនៃវិស័យទេសចរណ៍។ នេះបើតាមរបាយការណ៍ដែលចេញផ្សាយដោយធនាគារអភិវឌ្ឍន៍អាស៊ី (ADB) កាលពីថ្ងៃទី១១ ខែមេសា ឆ្នាំ២០២៤ ។
នាយិកាប្រចាំប្រទេសកម្ពុជារបស់ ADB លោកស្រី Jyotsana Varma មានប្រសាសន៍ថា ទោះបីជាមានបញ្ហាប្រឈមនៃសេដ្ឋកិច្ចពិភពលោកក៏ដោយ ក៏សេដ្ឋកិច្ចកម្ពុជាបានដំណើរការល្អក្នុងឆ្នាំ២០២៣ ហើយរំពឹងថា កំណើនសេដ្ឋកិច្ចនឹងមានភាពកាន់តែប្រសើរក្នុងឆ្នាំ២០២៤-២០២៥ ដោយសារវិស័យកាត់ដេរសម្លៀកបំពាក់ ស្បែកជើង និងទំនិញធ្វើដំណើរ (GFT) ទំនងជានឹងមានកំណើនខ្ពស់ ដោយផ្អែកលើសន្ទុះវិជ្ជមានដែលបានកើតឡើងក្នុងត្រីមាសចុងក្រោយនៃឆ្នាំ២០២៣។
របាយការណ៍ដដែលនេះ ក៏បានបង្ហាញពីកិច្ចពិភាក្សាផងដែរអំពីការរៀបចំជាយុទ្ធសាស្ត្ររបស់កម្ពុជាសម្រាប់ការឆ្លងផុតពីក្រុមប្រទេសអភិវឌ្ឍន៍តិចតួច (Least-Developed Country) របស់អង្គការសហប្រជាជាតិនៅឆ្នាំ២០២៧។ វាបានកត់សម្គាល់ថា ការឆ្លងផុតនេះនឹងធ្វើអោយប្រសើរឡើងនូវស្ថានភាពកម្ពុជាលើឆាកអន្តរជាតិ និងភាពទាក់ទាញផ្នែកវិនិយោគរបស់ខ្លួន។ ប៉ុន្តែនាពេលជាមួយគ្នានេះដែរ ការឆ្លងផុតនេះក៏នឹងបង្កើតបញ្ហាប្រឈមមួយចំនួន ដែលនឹងកើតចេញពីការថយចុះនៃលទ្ធភាពទទួលបានកម្ចីសម្បទាន និងការអនុគ្រោះផ្នែកពាណិជ្ជកម្មនានាដល់វិស័យមួយចំនួន ដែលបានរួមចំណែកដល់ការបង្កើតការងារ និងកំណើនសេដ្ឋកិច្ចខ្ពស់។
ដើម្បីឆ្លងផុតការផ្លាស់ប្តូរនេះប្រកបដោយប្រសិទ្ធភាព របាយការណ៍នេះបានសង្កត់ធ្ងន់លើសារៈសំខាន់សម្រាប់ប្រទេសកម្ពុជា ក្នុងការបង្កើនសមាហរណកម្មសេដ្ឋកិច្ចទៅក្នុងពិភពលោក ការធ្វើពិពិធកម្មទីផ្សារដោយផ្តោតលើផលិតផលដែលមានតម្លៃបន្ថែមខ្ពស់ ការវិនិយោគលើហេដ្ឋារចនាសម្ព័ន្ធប្រកបដោយនិរន្តរភាព ការវិនិយោគលើធនធានមនុស្សនិងការពង្រឹងការកៀរគរធនធានវិនិយោគក្នុងស្រុក។
លោក ឌួង ពូឡង់ មន្ត្រីសេដ្ឋកិច្ចជាន់ខ្ពស់ បានឱ្យដឹងថា ៖ វិស័យទេសចរណ៍ និងកម្មន្តសាលមិនមែនវាយនភ័ណ្ឌគឺជាកម្លាំងចលករសំខាន់សម្រាប់កំណើនសេដ្ឋកិច្ចឆ្នាំ២០២៣។ ការធ្លាក់ចុះនៃតម្លៃប្រេងឥន្ធនៈនាំចូលបានរួមចំណែកដល់ការថមថយនៃសម្ពាធអតិផរណា។ សេដ្ឋកិច្ចត្រូវបានរំពឹងថានឹងបន្តងើបឡើងវិញនៅក្នុងឆ្នាំនេះ និងឆ្នាំបន្ទាប់ជាមួយការបន្តងើបឡើងវិញនៃវិស័យទេសចរណ៍ និងកំណើនដ៏រឹងមាំនៃវិស័យកម្មន្តសាល។ចំណែកវិស័យកសិកម្ម សំណង់ និងអចលនទ្រព្យត្រូវបានរំពឹងថានឹងកើនឡើងក្នុងកម្រិតមធ្យម។ អតិផរណាអាចនឹងបន្តនៅទ្រឹងខណៈ ដែលតម្លៃប្រេងឥន្ធនៈសកលមានស្ថិរភាព។ ដោយសារប្រទេសកម្ពុជាត្រៀមនឹងចេញផុតពី ក្រុមប្រទេសអភិវឌ្ឍន៍តិចតួច ដែលកំណត់ដោយអង្គការសហប្រជាជាតិនៅឆ្នាំ២០២៧ វាចាំបាច់ណាស់ដែលកម្ពុជាត្រូវរៀបចំផែនការជាយុទ្ធសាស្ត្រសម្រាប់អន្តរកាលដោយរលូនមួយ៕
Account
Security
Favourite Content