ភ្នំពេញ​ ៖ កម្ពុជានឹងអាចក្លាយជាប្រទេសទទួលបានប្រយោជន៍ធំធេងជាងគេពីការផ្លាស់ប្តូរប្រជាសាស្ត្រនៅក្នុងតំបន់ ដោយប្រជាជនវ័យក្មេងពោរពេញដោយថាមពល និងលទ្ធភាពការងារ នឹងមានកំណើនប្រមាណ ២៤ ភាគរយ ក្នុងការចូលរួមជំរុញកំណើនសេដ្ឋកិច្ចជាតិ ខណៈវៀតណាមនឹងមានកំណើនត្រឹមតែ ១ ភាគរយ ប៉ុន្តែថៃត្រូវបានព្យាករណ៍ថានឹងធ្លាក់ចុះ ២៣ ភាគរយ ហើយចិននឹងធ្លាក់ចុះ ២២ ភាគរយ។ នេះបើយោងតាមការសិក្សារបស់ស្ថាប័ន Mekong Strategic Partners។

យោងតាមការសិក្សាខាងលើបានបង្ហាញថា ២០ ឆ្នាំទៅមុខទៀតនៃកំណើនសេដ្ឋកិច្ចយ៉ាងឆាប់រហ័សក្នុងតំបន់ ត្រូវបានធានា និងពឹងផ្អែកលើកត្តាប្រជាសាស្ត្រ។ ទន្ទឹមនេះ មនុស្សកាន់តែច្រើនក្នុងតំបន់នឹងឈានទៅចូលក្នុងក្រុមអាយុ ៣០-៤៩ ឆ្នាំ ដែលជាក្រុមមួយមានតម្រូវការ និងជំរុញការប្រើប្រាស់ មានតម្រូវការឥណទានក្នុងប្រព័ន្ធសេដ្ឋកិច្ច។ សម្រាប់ប្រទេសកម្ពុជា កំណើនពលកម្មវ័យក្មេងនៅប្រទេសនឹងក្លាយជាគោលដៅផលិតកម្មដ៏គួរឱ្យទាក់ទាញសម្រាប់អ្នកវិនិយោគកាន់តែខ្លាំងឡើង ជាពិសេសសម្រាប់សកម្មភាពដែលពឹងផ្អែកលើកម្លាំងពលកម្ម។

បច្ចុប្បន្ន ក្នុង​ចំណោម​ប្រជាជន​កម្ពុជាសរុប​ចំនួន ១៦​លាន​នាក់ ​ជាង ៦០% មាន​អាយុ​ក្រោម ៣៥​ឆ្នាំ។ ជាមួយនឹងអត្រាចូលរួមកម្លាំងពលកម្មប្រមាណ ៨០% ប្រទេសកម្ពុជាមានកម្លាំងពលកម្មវ័យក្មេង និងសកម្មដែលអាចបម្រើគ្រប់វិស័យរបស់អាជីវកម្ម ឬជំនួញរបស់វិនិយោគិន។ អត្រាអក្ខរកម្មនៅកម្ពុជាកំពុងកើនឡើងយ៉ាងឆាប់រហ័ស ដោយឈានដល់ជិត ៩០% ក្នុងឆ្នាំ២០១៩។ ចាប់តាំងពីឆ្នាំ២០០៨ មក អត្រាមានការងារធ្វើបានកើនឡើងដោយមានវិស័យឧស្សាហកម្មគាំទ្រ។ ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានថ្លែងប្រាប់ថា កត្តាមនុស្ស និងបច្ចេកវិទ្យាមានសារៈសំខាន់ណាស់សម្រាប់សេដ្ឋកិច្ច។ គេឃើញថា ថ្នាក់ដឹកនាំរដ្ឋាភិបាលតែងតែធ្វើជំរឿន និងស្ថិតិប្រជាពលរដ្ឋរៀងរាល់ ៥ ឆ្នាំម្តង ហើយមានការណែនាំពីថ្នាក់ដឹកនាំក្នុងការបង្កើនធនធានមនុស្ស ជាពិសេសចំនួនប្រជាជនឱ្យមានកំណើនចន្លោះពី ២០ ទៅ ៣០ លាននាក់ ដូច្នេះ ប្រទេសអាចមានធនធានកាន់តែច្រើន និងកម្លាំងយុវជនវ័យក្មេងកាន់តែច្រើន។

អ្នកឧកញ៉ា លឹម ហេង បានថ្លែងថា កម្លាំងពលកម្មវ័យក្មេងចន្លោះពី ១៨ ទៅ ៣៥ ឆ្នាំ គឺជាធនធានមនុស្សជួយជំរុញកំណើនសេដ្ឋកិច្ច ប៉ុន្តែក៏ត្រូវទាមទារការណែនាំដោយអ្នកជំនាញនិងបំពាក់បំប៉នជាមួយជំនាញឱ្យបានច្បាស់លាស់។ ការដែលមានកម្លាំងពលកម្មយុវជនវ័យក្មេងកាន់តែច្រើននៅក្នុងប្រទេស គឺជាកត្តាដ៏សំខាន់មួយក្នុងការទាក់ទាញអ្នកវិនិយោគ ព្រោះកម្លាំងពលកម្ម និងកត្តាបណ្តុះបណ្តាលធនធានមនុស្សទៅលើក្រុមយុវជនវ័យក្មេងគែជារឿងចាំបាច់។

លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានថ្លែងប្រាប់ថា បច្ចុប្បន្ន មានការសិក្សាជាច្រើនពីកម្ពុជាទាក់ទងកំណើន និងកត្តាប្រជាសាស្ត្រ ហើយបានបង្ហាញថា កម្ពុជាមានកំណើនប្រជាជនវ័យក្មេងច្រើនដែលជាកម្លាំងចលករក្នុងការជំរុញសេដ្ឋកិច្ច។

ទោះបីយ៉ាងក៏ដោយ លោកបណ្ឌិត ហុង វណ្ណៈ បានលើកឡើងថា កន្លងទៅ កម្ពុជាមានកម្លាំងពលកម្មនៅមានកម្រិត ប្រព័​ន្ធអប់រំក៏នៅមានកម្រិតធៀបជាមួយបណ្តាប្រទេសផ្សេងៗ ចំណែកវិស័យបច្ចេកវិទ្យាដើរយឺត ទាំងផ្នែកឧស្សាហកម្ម និងផលិតកម្មផងដែរ។ បើគិតគូរលើការជំរុញកម្លាំងជំនាញឱ្យបានដិតដល់កាលពីជាង ១០ ឆ្នាំមុន កម្ពុជាមានកម្លាំងពលកម្មពេញលេញតែម្តង ប៉ុន្តែកាលពីជាងឆ្នាំ១០​ មុន កម្ពុជាមានកម្លាំងពលកម្មផ្គត់ផ្គង់ដែរ តែកម្រិតជំនាញនៅមានកម្រិត ហើយប្រាក់ចំណូលក៏មានកម្រិត។

លោកបណ្ឌិត ហុង វណ្ណៈ​ បានឱ្យដឹងថា គោលនយោបាយផ្តោតលើការអប់រំ បណ្តុះបណ្តាល​បច្ចេកទេស និងវិជ្ជាជីវៈ (TVET) របស់រដ្ឋាភិបាលក្នុងអាណាត្តិទី៧ ដែលត្រូវបានដាក់ចេញ គឺជាគោលនយោបាយល្អមួយក្នុងការជំរុញកម្លាំងពលកម្មជំនាញឱ្យបានកាន់តែច្រើនក្នុងទីផ្សារ។ កាលណាប្រទេសមានកម្លាំងពលកម្មវ័យក្មេង បំពាក់ដោយជំនាញវិជ្ជាជីវៈច្បាស់លាស់ នោះពួកគាត់នឹងទទួលបានប្រាក់ចំណូល​កាន់ខ្ពស់ ដែលជាកត្តាមួយជួយជំរុញសេដ្ឋកិច្ចបានកាន់តែប្រសើរ។

គួរបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីថ្ងៃទី១៤ ខែវិច្ឆិកា ឆ្នាំ២០២៣ បានដាក់ចេញនូវគោលនយោបាយថ្នាក់ជាតិស្តីពីការបណ្តុះបណ្តាលជំនាញបច្ចេកទេស វិជ្ជាជីវៈ ដល់យុវជនមកពីគ្រួសារក្រីក្រ និងងាយរងហានិភ័យចំនួន ១.៥ លាននាក់ ដែលជាចំណុចអាទិភាពមួយរបស់រាជរដ្ឋាភិបាលអាណត្តិទី ៧ នេះ ដើម្បីឱ្យយុវជនក្រុមគោលដៅឆាប់ទទួលបានឱកាសការងារសមរម្យក្នុងរយៈពេលខ្លីនៅលើទិសដៅកែប្រែ និងលើកម្ពស់ជីវភាពគ្រួសារឱ្យកាន់តែប្រសើរ តាមរយៈយុវជនម្នាក់មានជំនាញមួយយ៉ាងតិចប្រចាំជីវិត ដែលមានភាពម្ចាស់ការ មានគុណភាព និងផលិតភាពខ្ពស់សម្រាប់ផ្គត់ផ្គង់ និងឆ្លើយតបបានតាមតម្រូវការទីផ្សារការងារប្រកបដោយចីរភាព ភាពធន់ និងបរិយាបន្ន៕