សៀមរាប៖ យោងតាមការចុះសិក្សាស្រាវជ្រាវ និងតាមដានផលនេសាទដោយឧបករណ៍របាំងព្រួល «លបឡុក» កាលពីអំឡុងខែធ្នូ ឆ្នាំ២០២៣ កន្លងទៅនេះ ក្រុមការងារគម្រោងអច្ឆរិយភាពនៃទន្លេមេគង្គ ខណ្ឌរដ្ឋបាលជលផលសៀមរាប វិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប រួមជាមួយមហាវិទ្យាល័យជលផល និងវារីវប្បកម្ម បានផ្តិតយករូបភាពសកម្មភាពនៃការកែច្នៃត្រីឆ្អើររបស់អ្នកភូមិនេសាទកំពង់ឃ្លាំង ដែលប្រជាពលរដ្ឋនៃឃុំនេះ ភាគច្រើនប្រកបរបរនេសាទត្រី និងកែច្នៃទិន្នផលត្រីទៅជាប្រហុក ត្រីងៀត ត្រីឆ្អើរសម្រាប់ទ្រទ្រង់ជីវភាពប្រចាំថ្ងៃតជំនាន់របស់ពួកគាត់។

តាមការឱ្យដឹងពីប្រជាសហគមន៍កំពង់ឃ្លាំងបានឱ្យថា កំពង់ឃលាំងគឺជាតំបន់អេកូទេសចរណ៍ មានទីតាំងស្ថិតនៅក្នុងភូមិកំពង់ឃ្លាំង ឃុំកំពង់ឃ្លាំង ស្រុកសូទ្រ​និគម មាន ចំងាយប្រមាណ ៤៥គីឡូម៉ែត្រ ពីទីរួមខេត្តសៀមរាប។ សហគមន៍កំពង់ឃ្លាំង ជារមណី​យដ្ឋានទេសចរណ៍បែបធម្មជាតិ និងវប្បធម៌ នៅទីនេះមានសក្តានុពលទេសចរណ៍សំខាន់ៗដូចជាបឹងទន្លេសាប អាហារធម្មជាតិ ព្រៃធម្មជាតិ។ ភ្ញៀវទេសចរអាចមកជិះទូកលំហែកម្សាន្ត ស្វែងយល់ពីជីវភាពរស់នៅរបស់ប្រជាជនក្នុងតំបន់។

ជីវភាពរបស់ប្រជាពលរដ្ឋ ឃុំកំពង់ឃ្លាំង ពឹងលើការនេសាទត្រី ដោយប្រជាពលរដ្ឋខ្លះចេញទៅបោះទូកនេសាទ ជាកន្លែងស្នាក់នៅលើផ្ទៃទន្លេ ដើម្បីងាយស្រួលប្រមូលផលត្រីនាំមកលក់នៅឯកំពង់វិញ ។ នៅក្នុងរដូវសម្បូរត្រី អ្នកទេសចរ ក៏អាចដើរគយគន់ការកែច្នៃត្រី ជាត្រីឆ្អើរនៅក្នុងភូមិផងដែរ ព្រោះថាប្រជាពលរដ្ឋនៅក្នុងភូមិភាគច្រើនប្រកបរបរនេសាទត្រី ចិញ្ចឹមត្រីក្នុងស្រះ ធ្វើចម្ការ និងដឹកភ្ញៀវទេសចរតាមទូកគយគន់ព្រៃលិចទឹក ។

បច្ចុប្បន្ន ជារដូវប្រមូលផលត្រី ក្រសួងកសិកម្ម រុក្ខាប្រមាញ់ និងនេសាទ បានប្រកាសពីរដូវធ្វើប្រហុកផ្អក ព្រោះថា ការធ្វើប្រហុករហូតមកទល់ពេលនេះ ប្រជាពលរដ្ឋភាគច្រើន នៅតែបន្តធ្វើប្រហុកតាមបែបប្រពៃណីសម្រាប់ការប្រើប្រាស់ប្រចាំគ្រួសារ។ រីឯសហគ្រិនខ្នាតតូច និងមធ្យមវិញ កំពុងកែច្នៃប្រហុកស្ងួតតាមតម្រូវការទីផ្សារ ហើយបច្ចុ​ប្បន្នកំពុងស្នើសុំវិញ្ញាបនបត្របញ្ជាក់គុណភាព សុវត្ថិភាព ដើម្បីបង្កើនទំនុកចិត្ត និងតម្លៃបន្ថែមសម្រាប់ការនាំចេញ។

​ដោយឡែក សម្រាប់សហគមន៍នានា ជាពិសេសក្នុងឃុំកំពង់ឃ្លាំងជាដើម តែងតែកែច្នៃត្រីតាមទម្លាប់ស្ទើរគ្រប់កន្លែង នៅក្នុងនោះមានសហគមន៍ទួលនាង ដែលក្រៅពីប្រកបការងារស្រែចម្ការ ពួកគាត់ឆ្លៀតប្រកបរបរនេសាទ ដើម្បីយកត្រឹមកធ្វើផ្អក ប្រហុក ត្រីឆ្អើរ សម្រាប់លក់ និងទុកសម្រាប់ហូបជាដើម។

សហគមន៍នេះមានប្រជាពលរដ្ឋចំនួន២៧៧គ្រួសារក្នុងនោះ៨០%ជាអ្នកនេសាទ។ ប្រជាពលរដ្ឋដែលអាស្រ័យផលទៅលើការនេសាទនេះ ភាគច្រើនប្រកបរបរធ្វើត្រីឆ្អើរ ផ្អក និងប្រហុក លក់សម្រាប់ចិញ្ចឹមជីវិត។ ដើម្បីអភិរក្សត្រីឱ្យគង់វង្សនោះ សហគមន៍បានធ្វើការបែងចែកតំបន់ឱ្យពលរដ្ឋរកត្រី ដោយតំបន់ខ្លះសហគមន៍កំណត់មិនឱ្យរកតែម្តង ដើម្បីរក្សាពូជត្រី។ តែតំបន់ខ្លះអាចរកបានតាមរដូវ ឯតំបន់ខ្លះទៀត ពលរដ្ឋអាចរកបានប្រចាំថ្ងៃសម្រាប់ចិញ្ចឹមជីវិតធម្មតាប៉ុណ្ណោះ។

ប្រជាជន​ខ្មែរ​ទូទាំងប្រទេស មិនថាតែ​អ្នក​ដែល​រស់នៅ​ជុំវិញ​បឹង​ទន្លេសាប និង​ទន្លេមេគង្គ​នោះទេ តែងផលិត​ត្រីឆ្អើរ​ពី​ប្រភេទ​ត្រី​រៀល ត្រី​លេញ ត្រី​ស្លឹក​ឬ​ស្សី ឬ​ត្រី​កេស ដោយឡែក សម្រាប់សហគមន៍ឃុំកំពង់ឃ្លាំង ប្រភេទត្រី ដែលអ្នកភូមិនេសាទបានយកមកកែច្នៃជាត្រីឆ្អើរ មានដូចជា៖ ត្រីរៀល ត្រីក្រុសមេម៉ាយ ត្រីស្លឹកឫស្សី និងត្រីកញ្ចុះជាដើម។

នៅឆ្នាំនេះ មានការសង្កេតឃើញថា បរិមាណត្រីអាចប្រហែលនឹងឆ្នាំមុនៗ ក៏ប៉ុន្តែតម្លៃបានធ្លាក់ចុះ។ ឆ្នាំនេះត្រីប្រហុកមានតម្លៃចន្លោះពី ២០០០ ទៅ ២៥០០រៀល រីឯឆ្នាំមុន មានតម្លៃចន្លោះពី៤០០០ ទៅ៥០០០រៀល។ យ៉ាងណាមិញ ប្រជាពលរដ្ឋបានយល់ដឹងច្រើនក្នុងការចូលរួមថែរក្សាធនធានធម្មជាតិ ដូចជាការចូលរួមអភិរក្សត្រីចម្រុះ ចេះស្រឡាញ់បរិស្ថាន និងសម្អាតអនាម័យតាមដងទន្លេ អាចទាក់ទាញភ្ញៀវទេសចរចូលមកកម្សាន្តតំបន់នេះច្រើនគួរសម។

សម្រាប់មុខរបរធ្វើត្រីឆ្អើរលក់របស់អ្នកស្រុកអាចជួយទ្រទ្រង់ជីវភាពគ្រួសារបានល្អប្រសើរ។ ក្រៅពីធ្វើត្រីឆ្អើរ អ្នកស្រុកធ្វើប្រហុក ផ្អក និងត្រីងៀត សម្រាប់ទុកលក់ផងដែរ។ ចំពោះត្រីដែលឆ្អើរបានក្នុង១ថ្ងៃៗ បានចាប់ពី២០គីឡូ​ក្រាមទៅជាង១០០គីឡូក្រាម អាស្រ័យដែលមានត្រីតិច ឬច្រើន​។ ត្រីឆ្អើរ ជាត្រីចង្វារមូល អាចលក់បានមួយចង្កាក់ជាង១០០០រៀល ហើយបើត្រីធំៗវិញ លក់មួយចង្កាក់ ចាប់ពី២០០០ ទៅ៥០០០រៀល។

សូមជម្រាបជូនថា រដូវបើកនេសាទគន្លងដាយត្រី ចាប់ផ្ដើមពីខែតុលា ដល់ខែកុម្ភៈ តែផែ្អកលើស្ថានភាពទឹកនៅបឹងទន្លេសាប។ បើគ្មានព្យុះ និងមេឃស្រឡះ គន្លងដាយត្រីអាចប្រមូលផលត្រីបានច្រើនចាប់ពីខែធ្នូ ដល់ខែមករា ហើយជាទូទៅក្នុងរយៈពេលខែខ្នើត ។ ពោលការធ្វើត្រីឆ្អើររបស់ប្រជាពលរដ្ឋ ធ្វើឡើងតាមរដូវកាល ហើយសម្បូរតែខែវិច្ឆិកា ដល់ខែកុម្ភៈ ឬខែមីនា តែនៅរដូវប្រាំងពុំអាចរកត្រីបាននោះទៀតទេ៕