សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ពោត ជាដំណាំមានសក្ដានុពលមួយប្រភេទដែលប្រជាកសិករខ្មែរនិយម និងចូលចិត្តដាំដើម្បីប្រមូលផលជាផ្លែ ដោយមានអ្នកខ្លះប្រមូលទិន្នផលនៅពេលខ្ចី អ្នកខ្លះទុករហូតដល់ទុំ រាប់ទាំងប្រភេទពោតស និងប្រភេទពោតក្រហម។ ដោយឡែកពេលនេះ យើងសូមណែនាំបងប្អូនប្រជាកសិករដឹងពីបច្ចេកទេសក្នុងការដាំពោតដើម្បីយកទិន្នផលជាស្នៀតពោតដែលទីផ្សារកំពុងមានតម្រូវការខ្ពស់ និងទទួលបានតម្លៃថ្លៃ។
ចំពោះការដាំពោតយកស្នៀត កសិករត្រូវយល់ដឹងពីកត្តាសំខាន់ៗមួយចំនួនដូចជាការជ្រើសរើសពូជ ដោយពូជដែលសមស្របគឺពូជហាវ៉ៃក្រហម ដែលអាចឲ្យស្នៀត ៣-៤ផ្លែ វាមិនសូវត្រូវការទឹកច្រើនទេ ទោះបីបងប្អូនដាំពូជប្រភេទនោះនៅខែប្រាំង ក៏គេអាចដាក់ទឹកតែម្ដងរហូតដល់ប្រមូលផល ឬអាចបន្ថែមទឹក ២-៣ដង ដើម្បីបានផលស្នៀតកាន់តែច្រើន ។
ក្នុងការដាំពោតឱ្យបានល្អ គេត្រូវមានភាពវៃឆ្លាតក្នុងការជ្រើសរើសទីតាំង និងរៀបចំដីដែលងាយស្រួលក្នុងការដាំ តួយ៉ាងការដាំពោតយកស្នៀត គួរដាំនៅតតំបន់ដីល្បាប់មាត់ទន្លេ ដែលសម្បូរជីជាតិ មិនមែនដីកណ្ដេង និងដីខ្សាច់នោះទេ ហើយត្រូវភ្ជួរហាលដី ៣-៤ថ្ងៃឲ្យដីឆ្អិនល្អសិន ទើបអាចរាស់បំបែកដីឲ្យម៉ត់។
បន្ទាប់មកឆូតដីជាគន្លងសម្រាប់ដាំ ដោយគម្លាតពីរងមួយទៅមួយ ចន្លោះពីកន្លះម៉ែត្រទៅ ៧តឹក ហើយអ្នកដាំត្រូវដាំក្នុងគន្លង ចៀសវាងដាំក្នុងពំនូកដីដែលលើកជារងនោះទេ ដោយហេតុថា ការដាំក្នុងគន្លងវាឆាប់ដុះជាង ឯដីពំនូករងគឺទុកសម្រាប់កាយលុបគល់ដើមពោតនៅពេលវាដុះបានខ្ពស់បន្តិច។ ឯប្រភេទពោតដាំយកស្នៀតនេះ គេអាចដាំចង្អៀតដើមជាងដាំពោតយកផ្លែ ដោយមួយរន្ធអាចដាក់គ្រាប់ពោតពូជបាន ៥-៧គ្រាប់ក្នុង១រណ្ដៅ ហើយក្នុងដី១ហិកតា កសិករត្រូវប្រើគ្រាប់ពូជចន្លោះពី ៣០-៣៥ គីឡូក្រាមផងដែរ។
ពាក់ព័ន្ធនឹងការថែទាំង ក្រោយការដាំគ្រាប់ពូជប្រមាណ ១៥-២០ថ្ងៃ គេត្រូវបាញ់ទឹកតាមរងដាំពោតកុំឲ្យដីរងស្ងួតពេក ទើបពោតអាចលូតលាស់បានល្អ ណាមួយពោតជាប្រភេទដំណាំលូតលាស់លឿន ពោលគឺលូតលឿនជាងស្មៅទៅទៀត ដែលស្មៅមិនអាចចោទជាបញ្ហាបាននោះទេ។
ដោយឡែកការប្រើប្រាស់ជី មុនពេលដាំពោត កសិករត្រូវដាក់ជីលាមកសត្វពុកផុយ ឬជីកំប៉ុស ចំនួន ២គីឡូក្រាមក្នុងដី ១ម៉ែត្រការ៉េ ហើយបន្ទាប់ពីដាំបាន ១សប្ដាហ៍ ត្រូវថែមជីអ៊ុយរ៉េក្នុងបរិមាណ ១.៥ក្រាម ក្នុង១គុម្ព ដោយដាក់ចម្ងាយ ១តឹកពីគុម្ពពោត ដើម្បីបំដើមឱ្យកាន់តែល្អ។ បន្ទាប់ពីរយៈពេល ៣០ថ្ងៃ គេត្រូវថែមជី ២០ ២០ ១៥ ប្រមាណ ៥ក្រាម ក្នុង១គុម្ព ដាក់ចម្ងាយ ២តឹកពីគុម្ពពោត លុះដាំបាន ៥០ថ្ងៃ គេត្រូវថែមជីដដែលទម្ងន់ ១០ក្រាមក្នុង ១គុម្ព ដាក់ជីនោះចន្លោះ ២-២.៥តឹក ពីគល់ពោតបន្ថែមទៀត ដើម្បីបំប៉នដើមកុំឱ្យអន់។
គួរបញ្ជាក់ដែរថា នៅក្នុងចន្លោះពេលដាក់ជី កសិករចាំបាច់ត្រូវបាញ់ទឹកបំប៉នដើម ក្រោយពីដាំពោតបានកន្លះខែ និងក្រោយពីដើមពោតដុះបានជាង ១ខែ ហើយការដាំពោតយកស្នៀតលក់នេះ មិនពិបាកថែទាំច្រើននោះទេ ពោលគឺត្រូវបាញ់ទឹកទៅក្នុងរងនៅពេលដីស្ងួតខ្លាំង។ ថែមលើនេះស្នៀតពោក៏ជាមានតម្រូវការទីផ្សារខ្ពស់ អាចច្នៃជាម្ហូបបានច្រើនមុខ និងសម្បូរទៅដោយវីតាមីន និងជាតិរ៉ែល្អៗ ដែលជំនួយច្រើនដល់សុខភាពអ្នកទទួលទាន៕
Account
Security
Favourite Content