ភ្នំពេញ៖ មជ្ឈមណ្ឌលបណ្ដុះធុរកិច្ចថ្មី “តេជោ” (ម.ធ.ត.) នាថ្ងៃដើមសប្ដាហ៍នេះ បានរៀបចំ «ថ្ងៃបទបង្ហាញសាធារណៈ» ដែលជាវគ្គផ្តាច់ព្រ័ត្រនៃកម្មវិធីពន្លឿនអាជីវកម្មថ្នាលឌីជីថលរដូវកាល ទី៤ បានរកឃើញធុរកិច្ចថ្មីឆ្នើមចំនួន ៥ក្រុម និងបានផ្តល់ទឹកប្រាក់ចំនួន១២០លានរៀលសម្រាប់ក្រុមជ័យលាភី។ កម្មវិធីពន្លឿនអាជីវកម្មថ្នាលឌីជីថលរដូវកាលទី៤នេះ មានការអញ្ជើញចូលរួមពីសំណាក់ឯកឧត្តមបណ្ឌិត តាំង ងួនលី នាយកប្រតិបត្តិមជ្ឈមណ្ឌលបណ្តុះធុរកិច្ចថ្មី “តេជោ” អមជាមួយវត្តមានរបស់អ្នកតំណាងនៃដៃគូសហការជាច្រើនរួមមាន មូលនិធិអភិវឌ្ឍន៍សហគ្រិនភាព, សហគ្រិនខ្មែរ, ធនាគារ វីង និង ភ្ញៀវកិត្តិយសជាច្រើនរូបទៀតផងដែរ។

កម្មវិធីពន្លឿនអាជីវកម្មថ្នាលឌីជីថល ត្រូវបានរៀបចំឡើងរយៈពេល ៣ខែ ដើម្បីផ្តល់ការគាំទ្រដល់ក្រុមធុរកិច្ចថ្មីដែលអាចបង្កើតដំណោះស្រាយឌីជីថល ឬ ថ្នាលឌីជីថលដែលអាចឆ្លើយតបនឹងតម្រូវការទីផ្សារ ជាពិសេសតម្រូវការរបស់សហគ្រាសធុនមីក្រូ តូច និង មធ្យម(MSME)។

កម្មវិធីពន្លឿនអាជីវកម្មនេះ ផ្ដល់ការគាំទ្ររយៈពេល ១២ សប្តាហ៍ដែលរួមមានការបណ្ដុះបណ្ដាល, ការតម្រង់ទិស និងការគាំទ្រហេដ្ឋារចនាសម្ព័ន្ធបន្ថែម ជាពិសេស ធុរកិច្ចថ្មីក៏អាចភ្ជាប់បណ្ដាញទំនាក់ទំនងជាមួយដៃគូសហការក្នុងប្រទេស និងថ្នាក់តំបន់ផងដែរ ក្នុងគោលដៅជំរុញឱ្យធុរកិច្ចថ្មីអាចដាក់ដំណើរការផលិតផលរបស់ខ្លួននៅលើទីផ្សារ ក៏ដូចជាអាចបង្កើនគុណភាពនៃផលិតផលឌីជីថលកាន់តែមានប្រសិទ្ធភាពបន្ថែមទៀត។

កម្មវិធីបានទទួលពាក្យស្នើសុំរហូតដល់ទៅ ៦១ ហើយបន្ទាប់ពីការសម្រាំងយ៉ាងលម្អិតក្នុងវគ្គដំបូង, ធុរកិច្ចថ្មីចំនួន ១០ ក្រុមត្រូវបានជ្រើសរើសឱ្យចូលរួមក្នុងកម្មវិធីនេះ។ យ៉ាងណាមិញ ក្រោយពីការជម្រុះក្នុងវគ្គបុរេពន្លឿនអាជីវកម្ម, កម្មវិធីបានជ្រើសរើសធុរកិច្ចថ្មីចំនួន ៧ ឱ្យធ្វើបទបង្ហាញទៅកាន់គណកម្មការក្នុងថ្ងៃបទបង្ហាញ និងវាយតម្លៃនាថ្ងៃទី ២០ ខែ មិថុនា ឆ្នាំ២០២៥។ ដោយធុរកិច្ចថ្មីទាំង ៧ ក្រុមចុងក្រោយ រួមមាន BeOne HR, Bomnorng Digital, Digi-Lab, Espass, TosTov, Niyai និង Point Hub។ ជាលទ្ធផល ធុរកិច្ចថ្មីចំនួន ៥ បានទទួលទុនវិនិយោគដែលមិនយកភាគហ៊ុន (Equity-free Investments) ពីកម្មវិធី។

នៅក្នុង «ថ្ងៃបទបង្ហាញសាធារណៈ» ជាថ្ងៃប្រកាសលទ្ធផលបានប្រព្រឹត្តទៅនាថ្ងៃទី៣០ ខែ មិថុនា ឆ្នាំ២០២៥ នៅសណ្ឋាគារ Oakwood Premier Phnom Penh, ក្រុមធុរកិច្ចថ្មីឆ្នើមទាំង ៥ ក្រុមបានទទួលនូវទុនវិនិយោគដែលមិនយកភាគហ៊ុនសរុបជាទឹកប្រាក់ចំនួន ១២០ លានរៀលពីកម្មវិធីដោយក្នុងនោះរួមមាន៖

១. ធុរកិច្ចថ្មី Point Hub បានទទួល Top Performance Award ដែលនឹងទទួលបានទុនចំនួន ៤០ លានរៀល ព្រមជាមួយនឹងការចូលរួមក្នុងកម្មវិធី Regional Exhibition ក្នុងខែសីហា ឆ្នាំ ២០២៥

២. ធុរកិច្ចថ្មី Espass បានទទួល Excellence Award ដែលនឹងទទួលបានទុនចំនួន ៣០ លានរៀល ព្រមជាមួយនឹងការចូលរួមក្នុងកម្មវិធី Regional Exhibition ក្នុងខែ សីហា ឆ្នាំ ២០២៥

៣. ធុរកិច្ចថ្មី Digi-Lab និង ធុរកិច្ចថ្មី BeOne HR បានទទួល Merit Award ដែលនឹងទទួលបានទុនចំនួន ២០ លានរៀល ក្នុងមួយក្រុម ព្រមជាមួយនឹងការចូលរួមក្នុងកម្មវិធី Regional Exhibition ក្នុងខែ សីហា ឆ្នាំ ២០២៥

៤. ធុរកិច្ចថ្មី Bomnorng Digital បានទទួល Honorable Mention ដែលនឹងទទួលបានទុនចំនួន ១០ លានរៀល ព្រមជាមួយនឹងការចូលរួមក្នុងកម្មវិធីRegional Exhibition ក្នុងខែ សីហា ឆ្នាំ២០២៥ផងដែរ។

ឯកឧត្តមបណ្ឌិត តាំង ងួនលី នាយកប្រតិបត្តិមជ្ឈមណ្ឌលបណ្តុះធុរកិច្ចថ្មី “តេជោ” បានមានប្រសាសន៍ថាមជ្ឈមណ្ឌលបណ្តុះធុរកិច្ចថ្មី “តេជោ” បានបង្កើតកម្មវិធីពន្លឿនអាជីវកម្មថ្នាលឌីជីថលក្នុងគោលបំណងចង់ចូលរួមជាមួយចក្ខុវិស័យរបស់រាជរដ្ឋាភិបាលក្នុងការបណ្តុះធុរកិច្ចថ្មី( Start Up) ឱ្យក្លាយទៅជាក្រុមហ៊ុនដែលអាចផ្តល់នូវសេវានិងផលិតផលថ្មីៗជូនប្រជាពលរដ្ឋឱ្យកាន់តែប្រសើរឡើង។ នៅពេលដែលក្រុមហ៊ុនStart Up ក្លាយជាក្រុមហ៊ុនធំ រីកលូតលាស់ នឹងជួយកសាងសេដ្ឋកិច្ចកម្ពុជាឱ្យកាន់តែរីកចំរើន។

ឯកឧត្តមបណ្ឌិត តាំង ងួនលី នាយកប្រតិបត្តិ បានមានប្រសាសន៍ទៀតថា ៖ មជ្ឈមណ្ឌលបណ្តុះអាជីវកម្មថ្មីតេជោ បានបង្កើតកកម្មវិធីពន្លឿនអាជីវកម្មផ្តោតទៅលើធុរកិច្ចថ្មីប្រភេទឌីជីថល ។ខាងមជ្ឈមណ្ឌល ផ្តល់ជាប្រាក់រង្វាន់ដើម្បីលើកទឹកចិត្តដល់ការខិតខំប្រឹងប្រែងចំណាយពេលអស់រយៈពេលជាង២០សប្តាហ៍ ដើម្បីយកធ្វើជាទុនបឋមយកផលិតផលរបស់គាត់ដែលបានបង្កើតដាក់ទៅក្នុងទីផ្សារនិងកែសម្រួលផលិតផលគាត់ឱ្យកាន់តែប្រសើរនិងត្រូវនឹងទីផ្សារ។មជ្ឈមណ្ឌលនៅតែបន្តព្យាយាមគាំទ្រពួកគាត់ទាំងស្មារតី ថវិកា ព្រមទាំងផ្គូផ្គងជាមួយអាជិវកម្មឬវិនិយោគិនផ្សេងៗ។

គួរបញ្ជាក់ផងដែរថាកម្មវិធីពន្លឿនអាជីវកម្មថ្នាលឌីជីថលរដូវកាលទី ៤ ត្រូវបានរៀបចំឡើងដោយ ក្រសួងសេដ្ឋកិច្ច និង ហិរញ្ញវត្ថុ រួមជាមួយ មជ្ឈមណ្ឌលបណ្ដុះធុរកិច្ចថ្មី “តេជោ”, ដោយមានការសហការរៀបចំដោយ ក្រសួងឧស្សាហកម្ម វិទ្យាសាស្រ្ត បច្ចេកវិទ្យានិង នវានុវត្តន៍, សហគ្រិនខ្មែរ, រួមជាមួយមូលនិធិអភិវឌ្ឍន៍សហគ្រិនភាព ហើយក៏មានការឧបត្ថម្ភពីធនាគារ វីង និង ចូលរួមគាំទ្រជាដៃគូចែករំលែកចំណេះដឹង (Knowledge Partners)ពីមជ្ឈមណ្ឌលសាន់វ៉ានវានុវត្តន៍រាជធានីភ្នំពេញ, មជ្ឈមណ្ឌលសាន់វ៉ានវានុវត្តន៍នៅប្រទេសវៀតណាម, Business Startup Support Centre, Quest Venture និង Impact Investment Exchange រួមទាំងដៃគូផ្សព្វផ្សាយ រួមមាន Fresh News, Technology Cambodia, និង Cambodia Investment Review ផងដែរ៕