ភ្នំពេញ ៖ សមាគមវារីវប្បករកម្ពុជា​បានឱ្យដឹងថា វារីវប្បករដែលបានទុកស្រះចិញ្ចឹមត្រីចោលបន្ទាប់ពីប្រមូលផលកាលពីខែមេសាកន្លងទៅដោយសារតម្លៃត្រីចុះថោកខ្លាំងពេកនោះ បានងាកមកចិញ្ចឹមត្រីឡើងវិញហើយកាលពីខែកក្កដា ក្រោយពីតម្លៃត្រីមានភាពល្អប្រើសើរជាងមុន។

លោក ឡែមផូរ  វរិទ្ធិ មន្រ្តីអភិវឌ្ឍន៍សមាគម និងជាអ្នកនាំពាក្យសមាគមវារីវប្បករកម្ពុជា បានប្រាប់ឱ្យដឹងកាលពីពេលថ្មីៗនេះថា កាលពីអំឡុងខែមីនា និងមេសា ដើមឆ្នាំកន្លងទៅ មានវារីវប្បករប្រមាណពី៥០ ទៅ៦០ភាគរយ បានសម្រេចចិ​ត្តទុកស្រះឱ្យទំនេរចោលក្រោយប្រមូលផលរួច​ ដោយមិនមានការសម្អាត និងដាក់កូនត្រីចិញ្ចឹមបន្តនោះទេ ដោយសារតែ​តម្លៃត្រីទាបខ្លាំងពេក ដែលធ្វើឱ្យពួកគាត់មិនអាចចំណេញបាន ប៉ុន្តែស្ថានភាពនេះបានប្រែប្រួលចាប់តាំងពីខែកក្កដារហូតមក។

លោក វរិទ្ធិ បានប្រាប់ដូច្នេះថា ៖

«នៅអំឡុងពេលមុនបោះឆ្នោត នៅខែកក្កដា តម្លៃត្រី​ចាប់ផ្តើមកើនឡើងវិញខ្លាំង ដោយត្រីប្រាធ្លាប់តែមួយគីឡូក្រាម ៤ ០០០ រៀល បាន​ឡើងដល់ ៥ ២០០រៀល, ត្រីឆ្តោមួយគីឡូក្រាម ៩០០០រៀល ឡើង១២ ០០០រៀល។ ហេតុដូចនេះ អ្នកដែលធ្លាប់សម្រេចចិត្តថាផ្អាកចិញ្ចឹមត្រី​ បែរជាងាកមកចាប់ផ្តើម​រក​​កូនត្រី ដើម្បីចិញ្ចឹមតទៀ​ត។ ប៉ុន្តែ វារីវប្បករបានជួបការលំបាកខ្លះ ដោយសារតែផុតខែដែលសម្បូរកូនត្រីពូជ (ខែឧសភា ឬមិថុនា) ដែល​ធ្វើឱ្យវារីវប្បករយើងពិបាករកទិញកូនត្រីពូជមកដាក់។ ដូចនេះ អ្នករកពូជបានក៏ចិញ្ចឹម អ្នកខ្លះទៀតរកមិនបាន ក៏មិនបានចិញ្ចឹមដែរ ដោយអ្នកដែលរកកូនត្រីមកចិញ្ចឹមបានមានប្រហែលពាក់កណ្តាលនៃអ្នកធ្លាប់ផ្អាកចិញ្ចឹម»។

បើតាម​មន្រ្តីអភិវឌ្ឍន៍សមាគមដដែលនេះ​ ការប្រមូលផលត្រីនៅកម្ពុជាតែងធ្វើឡើងនៅអំឡុងខែមេសា ឬឧសភា ដោយ​សារតែពេលវេលានោះលែងមានទឹក ដូច្នេះត្រូវតែលក់ចេញ។ ដោយឡែកអ្នកចិញ្ចឹមត្រី​ក្នុងខែកក្កដា ឬខែ​សីហា​ គឺយកត្រីដែ​លធំល្មម (ទំហំ១០ លី) មកចិញ្ចឹមបន្ត។

លោកបានអះអាងថា ៖

«មកទល់ពេលនេះ តម្លៃត្រីនៅល្អ ចុះត្រឹម១០០រៀល ទៅ២០០រៀលប៉ុណ្ណោះ ដែលអាចឱ្យកសិ​ក​រនៅតែចំណេញបាន។ បរិមាណដែលវារីវប្បករចិញ្ចឹមនៅក្នុងចុងឆ្នាំនេះ (ខែវិច្ឆកា និងធ្នូ) ខ្ញុំគិតថា វានឹងមិនខ្វះទេ បូកផ្សំនឹងត្រីធម្មជាតិខ្លះ យើងមិនបាច់នាំចូលទេ»។

លោក ចាន់ សុវណ្ណ វារីវប្បករចិញ្ចឹមត្រីប្រានៅខេត្តកំពង់ធំ បានប្រាប់ឱ្យដឹងថា លោកទើបតែចាប់ផ្តើមដាក់កូនត្រីចិញ្ចឹមវិញ កាលពីពាក់កណ្តាលខែកក្កដាកន្លងទៅ​ ដោយសារតែលោកទទួលបានព័ត៌មានថា តម្លៃថ្លៃបានកើនឡើងខ្ពស់ ដែលជាឱកា​សល្អសម្រាប់ការចិញ្ចឹមឡើងវិញ។

លោកបានបន្ថែមថា មូលហេតុដែលលោកបានផ្អាកចិញ្ចឹមនាពេលកន្លងទៅ (ឆ្នាំមុន) ដោយសារតែតម្លៃត្រីទាបពេក ដែលធ្វើ​ឱ្យការ​ចិញ្ចឹមរបស់លោកមិនត្រឹមតែមិនចំណេញទេ តែ​ថែមទាំងខាតទៀតផង។ ហេតុដូចនេះ លោកចង់ទុកស្រះចោល ២ ទៅ៣ឆ្នាំសិន ដើម្បីរង់ចាំមើលតម្លៃត្រីនៅលើទីផ្សារ។

លោក ចាន់ សុវណ្ណ បានប្រាប់ថា ៖

«ខ្ញុំផ្អាកចិញ្ចឹមជាង១ឆ្នាំហើយ មកពីកាលណោះ ត្រីថោកពេក រកតែថ្លៃដើ​មមិនបានផង មានលុយឯណាទៅបង់ធនាគារ។ តែកាលខែ​កក្កដា ខ្ញុំមើលពីព័ត៌មានតម្លៃត្រីលើទីផ្សារ ឃើញថាបានថ្លៃគួរសម ទើបសម្រេចចិញ្ចឹមវិញទៅ។ បើតម្លៃដូចរាល់ថ្ងៃនេះ យើងអាចចំណេញបានសមរម្យ»។

បើតាមសមាគមវារីវប្បករកម្ពុជា កាលពីដើមខែវិច្ឆកា ឆ្នាំ២០២៣ សន្ទស្សន៍តម្លៃត្រីស្រស់នៅកសិដ្ឋាន ឬស្រះចិញ្ចឹមមួយចំនួនក្នុងខេត្តគោលដៅទាំង៦ នៅក្នុងខេត្តកណ្តាល ខេត្តកំពង់ធំ ខេត្តកំពង់ចាម ខេត្តពោធិ៍សាត់ ខេត្តសៀមរាប និង ខេត្តបាត់ដំបង រួមមាន ត្រីរ៉ស់តម្លៃ ៦០០០រៀល ទៅជាង ៧ ០០០រៀល/១គីឡូក្រាម ត្រីអណ្តែងរឹង តម្លៃជាង ៤០០០រៀល ទៅ ៥០០០រៀល/១គីឡូក្រាម។

ត្រីទីឡាប់ព្យាក្រហមតម្លៃ ៨០០០រៀល ទៅ ៩៥០០រៀល /១គីឡូក្រាម ត្រីឆ្ពិនតម្លៃ​ ៨៥០០រៀល/១គីឡូក្រាម ត្រីពោ តម្លៃ៦០០០រៀល ទៅ ៧៥០០រៀល/១គីឡូក្រាម ត្រីប្រា តម្លៃជាង ៥០០០រៀល/១គីឡូក្រាម ត្រីឆ្តោ តម្លៃ ១០៥០០រៀលទៅ ១២៥០០រៀល/១គីឡូក្រាម និងត្រីក្រាញ់តម្លៃ ៦០០០រៀល ទៅ៧៥០០រៀល/១គីឡូក្រាម៕ អត្ថបទដោយ CPA ៖ វណ្ណ សុជាតា