សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ប្រព័ន្ធបច្ចេកវិទ្យាហិរញ្ញវត្ថុកម្ពុជាមានភាពរីកចម្រើនគួរឱ្យកត់សម្គាល់ ជាពិសេស ដំណើររៀបចំប្រព័ន្ធទូទាត់បាគង និងបទពិសោធជោគជ័យដែលប្រតិបត្តិការប្រព័ន្ធបាគងបានជំរុញភាពរីកចម្រើនរបស់សហគ្រាសធុនតូច និងមធ្យមនៅកម្ពុជា។
លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា បានមានប្រសាសន៍ដូច្នេះនៅក្នុងឱកាសអញ្ជើញជាវាគ្មិនក្នុងកិច្ចពិភាក្សានៃកិច្ចប្រជុំកំពូលធុរកិច្ច និងវិនិយោគអាស៊ាន ឆ្នាំ២០២៥ (ABIS) ក្រោមប្រធានបទ «បង្កើនអំណាចដល់សហគ្រាសធុនមីក្រូ តូច និងមធ្យម (MSMEs) ក្នុងតំបន់អាស៊ាន ដើម្បីជំរុញការរីកចម្រើនក្នុងសេដ្ឋកិច្ចឌីជីថល» នារសៀលថ្ងៃទី២៦ ខែតុលា ឆ្នាំ២០២៥ នៅទីក្រុងគូឡាឡាំពួ ប្រទេសម៉ាឡេស៊ី។
លោកជំទាវបណ្ឌិតបានលើកឡើងថា៖ ការតភ្ជាប់ប្រព័ន្ធទូទាត់ក្នុងតំបន់មានសារៈសំខាន់ក្នុងការជួយឱ្យសហគ្រាសអាចធ្វើពាណិជ្ជកម្មយ៉ាងទូលំទូលាយ សំដៅកាត់បន្ថយគម្លាតឌីជីថលក្នុងតំបន់ និងលើកកម្ពស់បរិយាបន្នហិរញ្ញវត្ថុ។
ធនាគារជាតិនៃកម្ពុជា បានដាក់ឱ្យប្រើប្រាស់ «បាគង» កាលពីថ្ងៃទី២៨ ខែតុលា ឆ្នាំ២០២០ ដែលជាប្រព័ន្ធទូទាត់បែបទំនើបថ្មីមួយ ដើម្បីតភ្ជាប់ធនាគារ គ្រឹះស្ថានហិរញ្ញវត្ថុ និងក្រុមហ៊ុនផ្តល់សេវាទូទាត់នៅកម្ពុជា ដើម្បីអនុញ្ញាតឱ្យអតិថិជនអាចធ្វើប្រតិបត្តិការហិរញ្ញវត្ថុតាមរយៈកម្មវិធីទូរស័ព្ទពីធនាគារមួយទៅធនាគារមួយទៀត ឬពីក្រុមហ៊ុនផ្តល់សេវាទូទាត់ណាមួយទៅសមាជិកដទៃទៀត ជាមួយនឹងភាពងាយស្រួល ឆាប់រហ័ស សុវត្ថិភាព និងចំណាយតិច ។
យោងតាមរបាយការណ៍របស់ធនាគារជាតិកម្ពុជា ការទូទាត់ប្រាក់តាមប្រព័ន្ធបាគង ទាំងប្រាក់រៀល និងប្រាក់ដុល្លារអាម៉េរិក នៅឆ្នាំ២០២៤ មានទំហំទឹកប្រាក់សរុបប្រមាណ ១៥០ប៊ីលានដុល្លារអាម៉េរិក ក្នុងនោះការទូទាត់ជាប្រាក់រៀលប្រមាណ ១៨៣,៧៤ទ្រីលានរៀល កើនឡើង ១២៧% និងទំហំប្រាក់ជាប្រាក់ដុល្លារអាម៉េរិក ប្រមាណ ១០៤,៨១ប៊ីលានដុល្លារអាម៉េរិក កើនឡើង ៩៥% ធៀបនឹងឆ្នាំ២០២៣ ដែលទំហំប្រាក់សរុបនៅក្នុងឆ្នាំ២០២៤ ស្មើនឹង ៣៣០% នៃផ.ស.ស។ នេះបើយោងតាមរបាយការណ៍របស់ធនាគារជាតិនៃកម្ពុជា។ រីឯប្រតិបត្តិការផ្ទេរប្រាក់ និងទូទាត់ដែលធ្វើឡើងតាមរយៈប្រព័ន្ធបាគងមានចំនួន ៦០៨,៣២ លានប្រតិបត្តិការ ក្នុងនោះប្រតិបត្តិការជាប្រាក់រៀលមានចំនួន ២៩៩,៣២លានប្រតិបត្តិការ កើនឡើង ៣៣៤% និងប្រតិបត្តិការជាប្រាក់ដុល្លារអាម៉េរិក មានចំនួន ៣០៨,២០លាន ប្រតិបត្តិការ កើនឡើង ១៣៣% ធៀបនឹងឆ្នាំ២០២៣។
សូមជម្រាបថា៖ កិច្ចប្រជុំកំពូលធុរកិច្ច និងវិនិយោគអាស៊ាន ឆ្នាំ២០២៥ នៅម៉ាឡេស៊ី មានការចូលរួមពីវាគ្មិនជំនាញដែលសុទ្ធសឹងជាថ្នាក់ដឹកនាំជាន់ខ្ពស់នៃក្រុមហ៊ុនបច្ចេកវិទ្យាធំៗលំដាប់ពិភពលោក ដូចជា Google និង TikTok ជាដើម ដោយបានផ្តោតលើកិច្ចពិភាក្សាអំពីដំណោះស្រាយចំពោះឧបសគ្គរបស់ MSMEs ក្នុងសេដ្ឋកិច្ចឌីជីថល កិច្ចសហប្រតិបត្តិការតំបន់ និងតួនាទីរបស់ស្ថាប័នហិរញ្ញវត្ថុ និងបច្ចេកវិទ្យាក្នុងការបង្កើនអំណាចដល់ MSMEs ក្នុងតំបន់អាស៊ានដើម្បីជំរុញភាពរីកចម្រើនក្នុងសេដ្ឋកិច្ចឌីជីថល ព្រមទាំងមានវត្តមានចូលរួមពីប្រធានាធិបតី នាយករដ្ឋមន្ត្រី ថ្នាក់ដឹកនាំធុរកិច្ច សហគ្រិន ដែលមកពីទូទាំងតំបន់អាស៊ាន និងប្រទេសជាដៃគូនានាជុំវិញពិភពលោក៕
Account
Security
Favourite Content