បរទេស៖ យោងតាមប្រភពពីបរទេសបានលើកឡើងថា នៅទូទាំងពិភពលោក កាហ្វេត្រូវបានដាំដុះយ៉ាងច្រើនលើសលប់ដោយកសិករខ្នាតតូច ហើយភាគច្រើនរស់នៅក្នុងជីវភាពខ្វះខាត។ ដើម្បីគាំទ្រផលិតភាពការដាំគ្រាប់កាហ្វេ ECOM បានចូលរួមជាមួយអ្នកដាំខ្នាតតូចទាំងនោះ ដោយផ្តល់ការបណ្តុះបណ្តាល និងឱកាសចូលក្នុងទីផ្សារ។

Ecom Agroindustrial Corporation Ltd. (ECOM) គឺជាក្រុមហ៊ុនពាណិជ្ជកម្មធំមួយរបស់ពិភពលោកដែលមានឯកទេសកែច្នៃទំនិញចេញពីកាហ្វេ កប្បាស កាកាវ និងស្ករ។ ECOM គឺជាក្រុមហ៊ុនលក់កាហ្វេឈានមុខគេមួយក្នុងចំណោមបីរបស់ពិភពលោក មាន​រោងម៉ាស៊ីនកិនកាហ្វេធំជាងគេមួយនៅលើពិភពលោក និងស្ថិតក្នុងអាជីវកម្មកំពូលទាំងប្រាំខាងផ្នែកកប្បាសនិងកាកាវ។ ក្រុមហ៊ុននេះមានលក្ខណៈរួមបញ្ចូលចាប់តាំងពី អ្នកបង្កើតទំនិញ អ្នកកែច្នៃ និងឈ្មួញ ព្រមទាំងផ្គត់ផ្គង់ផលិតផលរបស់ខ្លួនទៅកាន់ក្រុមហ៊ុនផ្សេងៗទៀតដូចជា Nestlé Group, Starbucks, Hershey, Mars, Sara Lee, Kraft និង Folgers ។ ECOM មានទីស្នាក់ការកណ្តាលនៅប្រទេសស្វីស និងមានក្រុមហ៊ុនបុត្រសម្ព័ន្ធរបស់ខ្លួនដំណើរការក្នុង ៣០ ប្រទេស ជាមួយនឹងបុគ្គលិកប្រហែល ៦ ០០០ នាក់នៅទូទាំងពិភពលោក។

ទន្ទឹមនឹងនេះ ECOM ប្តេជ្ញាធ្វើអាជីវកម្មជាមួយកសិករខ្នាតតូច។ ជាមួយនឹងការកើនឡើងនៃទីផ្សារកាហ្វេគុណភាព ECOM បានវិនិយោគយ៉ាងសកម្មក្នុងការអភិវឌ្ឍន៍កសិករទាំងនោះ ដោយសារការអនុវត្តរបស់ពួកគេមានសារៈសំខាន់ចំពោះសមត្ថភាពរបស់ ECOM ក្នុងការផ្តល់នូវកាហ្វេមានគុណភាពខ្ពស់ និងដំណោះស្រាយជូនអតិថិជនរបស់ខ្លួន។ មិនត្រឹមតែប៉ុណ្ណោះ ការប្រកួតប្រជែងរបស់កសិករក៏សំខាន់ចំពោះ ECOM ចូលទៅកាន់ទីផ្សារកាហ្វេពិសេសមានគុណភាពខ្ពស់ផងដែរ។ បច្ចុប្បន្ននេះ តម្រូវការគ្រាប់កាហ្វេមានគុណភាពខ្ពស់កើនឡើងក្នុងបណ្តាអ្នកកិនម្សៅកាហ្វេ អ្នកលក់រាយ និងអ្នកប្រើប្រាស់កំពុងស្វែងរកគ្រាប់កាហ្វេមានគុណភាពខ្ពស់ និរន្តរភាពសម្រាប់បរិស្ថាន និងសមស្របស្តង់ដារសង្គម។ អាស្រ័យលើលក្ខខណ្ឌទីផ្សារ ក្រុមហ៊ុនផលិតកាហ្វេត្រូវបង់ប្រាក់ដើម្បីឲ្យគ្រាប់កាហ្វេត្រូវបានទទួលស្គាល់ ដែលនឹងផ្តល់អត្ថប្រយោជន៍ដល់អ្នកដាំដុះ។ កាលពីឆ្នាំ ២០១២ គ្រាប់កាហ្វេដែលត្រូវបានការទទួលស្គាល់របស់ ECOM លក់បានប្រហែល ២០ ភាគរយ ដែលជំរុញឲ្យក្រុមហ៊ុនមានគោលបំណងបង្កើនតួលេខនេះ។ ដើម្បីបំពេញតម្រូវការនេះ ECOM ត្រូវបង្កើនចំនួនកសិករគួបផ្សំជាមួយនឹងការបន្ថែមធនធានដើម្បីបណ្តុះបណ្តាលកសិករ និងផ្តល់ហិរញ្ញប្បទានដល់ពួកគេ។

ECOM បានអនុវត្តគំរូអាជីវកម្មបរិយាបន្នដោយផ្តល់ការគាំទ្រដល់អ្នកដាំគ្រាប់កាហ្វេរួមមាន ជំនួយបច្ចេកទេសដើម្បីបង្កើនទិន្នផលធ្វើឱ្យប្រសើរឡើងនូវគុណភាព និងទទួលបានវិញ្ញាបនបត្រទទួលស្គាល់ពី  ECOM ទៅតាមប្រភេទកាហ្វេសម្រាប់ក្រុមហ៊ុនផ្សេងៗ (Rainforest Alliance,Starbucks, 4C, Utz, និង Nespresso AAA)។ នៅក្នុងករណីខ្លះទៀត ECOM បានផ្តល់ហិរញ្ញប្បទានរយៈពេលមធ្យមតាមរដូវដល់កសិករសម្រាប់ជាទុន ហើយនៅផ្នែកជំនួយបច្ចេកទេស ECOM ជួលអ្នកជំនាញកសិកម្មដែលធ្វើការជាមួយអង្គការក្រៅរដ្ឋាភិបាលក្នុងស្រុក និងអន្តរជាតិ ដើម្បីបណ្តុះបណ្តាលកសិករអំពីនិរន្តរភាព និងផលិតភាព។ នៅក្រោមភាពជាដៃគូជាមួយនឹង IFC ECOM មានគោលបំណងកែលម្អផលិតភាពរបស់កសិករ និរន្តរភាព និងសិទ្ធិទទួលបានវិញ្ញាបនប័ត្រការទទួលស្គាល់។ កសិករត្រូវបានលើកទឹកចិត្តឱ្យកែលម្អការដាំដុះតាមរយៈកម្មវិធីកែលម្អធ្វើឲ្យតែប្រសើរឡើងនៃដំណើរការផលិតកម្ម ការគ្រប់គ្រងជី ការកែលម្អលក្ខខណ្ឌការងារ និង វិធានការផ្សេងៗទៀត។ លើសពីនេះ កម្មវិធីកែលម្អប្រែប្រួលទៅតាមរយៈពេលអាស្រ័យលើលក្ខណៈនៃការកែលម្អដែលត្រូវការរួមមាន ការអភិរក្សដី និងការការពារជីវចម្រុះ ដែលជាធម្មតាចំណាយពេលយូរដើម្បីដោះស្រាយ។ ទន្ទឹមនឹងនេះ បុគ្គលិក ECOM ទទួលការបណ្តុះបណ្តាលជាប្រចាំពីអ្នកជំនាញ ដើម្បីឲ្យពួកគេចែករំលែកចំណេះដឹងបន្តទៅកាន់អ្នកដាំដុះតាមរយៈសិក្ខាសាលា។ បន្ថែមពីនេះ ពួកគេចុះត្រួតពិនិត្យដំណាំកាហ្វេដើម្បីតាមដានការអភិវឌ្ឍន៍ និងដោះស្រាយរាល់បញ្ហាទាក់ទងនឹងការអនុវត្តរបស់កសិករដែលខិតខំឆ្ពោះទៅរកគោលដៅផលិតកម្ម និងទទួលវិញ្ញាបនប័ត្រ។ ប្រសិនបើកម្មវិធីទាំងនេះត្រូវបានប្រតិបត្តិបានល្អ កសិករនឹងអាចសម្រេចបាននូវតម្រូវការសិទ្ធិទទួលបានវិញ្ញាបនប័ត្រ ឬអាចបង្កើនផលិតភាពថែមទៀតផង។

នៅផ្នែកហិរញ្ញវត្ថុ ECOM ផ្តល់ឥណទានតាមរដូវកាលដល់អ្នកដាំកាហ្វេដែលជាអ្នកផ្គត់ផ្គង់របស់ខ្លួននៅក្នុងប្រទេសមួយចំនួនដូចជា ម៉ិកស៊ិក ក្វាតេម៉ាឡា ណីការ៉ាក្វា ហុងឌូរ៉ាស និងកូស្តារីកា។ ក្នុងពេញមួយវដ្តនៃការផលិតកាហ្វេ អ្នកដាំកាហ្វេត្រូវបានគាំទ្រផ្នែកហិរញ្ញវត្ថុរួមមាន ការទិញជី ការថែរក្សារុក្ខជាតិ និងការប្រមូលផល។ ក្រៅពីនេះ អ្នកទិញកាហ្វេដែលមានគុណភាព (ឧ. Nespresso របស់ Nestlé Group,Starbucks) ក៏មានសារៈសំខាន់ចំពោះគំរូអាជីវកម្មបរិយាបន្នរបស់ ECOM ផងដែរ ដោយសារវាជាសញ្ញាវិជ្ជមានមួយដល់កសិករអំពីគោលបំណងរបស់ក្រុមហ៊ុនក្នុងការទិញគ្រាប់កាហ្វេមានគុណភាពខ្ពស់ និងជំរុញឱ្យ ECOM ធ្វើការជាមួយកសិកររបស់ខ្លួនកាន់តែមានផលិតភាពជាងមុន៕