សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលកម្ពុជា បាន និងកំពុងពន្លឿនការពង្រីកការផ្គត់ផ្គង់ទឹកស្អាតនៅតំបន់ទីក្រុង និងទីប្រជុំជនរបស់កម្ពុជាឱ្យបាន ១០០ភាគរយនៅឆ្នាំ២០២៥។ នេះបើយោងតាមផែនការយុទ្ធសាស្ត្រជាតិស្ដីពីការផ្គត់ផ្គង់ទឹកស្អាត និងការលើកកម្ពស់អនាម័យនៅតាមជនបទឆ្នាំ២០១៤-២០២៥។
ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី និងជាអតីតរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ធ្លាប់បានគូសបញ្ជាក់កាលពីឆ្នាំ២០២៣ ថា ការប្រើប្រាស់ទឹកស្អាតនៅទូទាំងប្រទេសកំពុងកើនឡើងគួរឱ្យកត់សម្គាល់ដោយគ្របដណ្តប់ប្រហែល ១.២ លានគ្រួសារ កើនឡើង ៥៣.៨ ភាគរយបើធៀបនឹងចំនួន ៧៨០ ០០០ គ្រួសារក្នុងឆ្នាំ២០១៨។
ដោយឡែក សម្ព័ន្ធក្រុមហ៊ុនទឹកស្អាតខ្មែរ ឬ Khmer Water Suply Handling ដែលបង្កើតឡើងក្នុងឆ្នាំ២០១៣ ក្នុងនាមជាក្រុមហ៊ុនមួយផ្ដោតលើការផ្គត់ផ្គង់ទឹកស្អាតនៅតំបន់ពាក់កណ្តាលទីក្រុង និងជនបទ។
ជាផ្នែកមួយក្នុងការចូលរួមជំរុញផែនការរបស់រដ្ឋាភិបាល ក្រុមហ៊ុនមួយនេះបង្កើតឡើងក្នុងគោលបំណងបង្កើនលទ្ធភាពទទួលបានទឹកស្អាតដែលមានតម្លៃសមរម្យសម្រាប់ប្រជាជនកម្ពុជានៅតាមជនបទ និងលើកកម្ពស់ការផ្ដល់ដំណោះស្រាយទឹកស្អាតប្រកបដោយនិរន្តរភាពសម្រាប់អ្នកដែលមិនមានលទ្ធភាព។
បច្ចុប្បន្ននេះ ក្រុមហ៊ុនបាន និងកំពុងផលិត និងចែកចាយទឹកស្អាតតាមបំពង់ទុយោជូនប្រជាពលរដ្ឋកម្ពុជាជិត ២០មុឺននាក់ រួមទាំងរោងចក្រឧស្សាហកម្មមួយចំនួន ក្រោមមហិច្ឆតាសម្រេចឲ្យបាននូវការផ្គត់ផ្គង់ទឹកស្អាតដល់ប្រជាជនជាងកន្លះលាននាក់នៅប៉ុន្មានឆ្នាំខាងមុខផងដែរ។
ក្រុមហ៊ុន Khmer Water Suply Handling (KWSH) បានពង្រីកស្ថានីយ៍ផ្គត់ផ្គង់ទឹកស្អាតចំនួន ៥ ដែលមានទីតាំងនៅតាមបណ្ដាខេត្តដូចជា ព្រៃវែង សៀមរាប ក្រចេះ និងតាកែវជាដើម ដែលតំបន់ទាំងនោះសុទ្ធសឹងតែជាតំបន់ដែលមិនមានទឹកស្អាតប្រើប្រាស់។
នៅតំបន់ខ្លះទៀត ប្រជាជនមានទឹកសម្រាប់ប្រើប្រាស់ ប៉ុន្តែទឹកនោះមិនមែនជាទឹកស្អាត ពោលគឺជាទឹកដែលមានសារធាតុមិនល្អនៅលាយឡំ ដែលវាអាចបង្កជាហានិភ័យចំពោះសុខភាព អ្នកបរិភោគ ហើយដើម្បីធានានូវគុណភាពទឹកដែលខ្លួនបានផ្គត់ផ្គង់ទៅកាន់ប្រជាពលរដ្ឋ ក្រុមហ៊ុនក៏តែងមានការត្រួតពិនិត្យ និងធ្វើតេស្តគុណភាពទឹកជាប្រចាំផងដែរ។
ជារួមកិច្ចខិតខំប្រឹងប្រែងរបស់ក្រុមហ៊ុនខាងលើ គឺជាការធ្វើឲ្យប្រសើរឡើងនូវសុខភាព និងគុណភាពជីវិតរបស់គ្រួសារជនបទក្នុងប្រទេសកម្ពុជាតាមរយៈការផ្តល់នូវទឹកស្អាតដែលមានសុវត្ថិភាពសម្រាប់ការទទួលទាន មានអនាម័យ និងកាត់បន្ថយជំងឺផ្សេងៗដែលកើតចេញពីប្រភពទឹក។
គួរបញ្ជាក់ថា ក្រុមហ៊ុន KWSH ជាអាជីវកម្មមួយក្នុងចំណោមអាជីវកម្មទាំង ១៨ ដែលបានជាប់ជាអាជីវកម្មបរិយាបន្ន ដោយអាជីវកម្មនេះបានរួមចំណែកជួយដល់សុខមាលភាព និងសេដ្ឋកិច្ចរបស់ប្រជាពលរដ្ឋ ព្រមទាំងជួយដល់សេដ្ឋកិច្ចជាតិជារួមផងដែរ។
បច្ចុប្បន្ន រដ្ឋាភិបាលកម្ពុជាបាន និងកំពុងជំរុញអាជីវកម្មទូទៅឱ្យក្លាយទៅជាប្រភេទអាជីវកម្មបរិយាបន្ន ដើម្បីជាផ្នែកមួយក្នុងការជំរុញសេដ្ឋកិច្ចកម្ពុជាឱ្យឈានទៅសម្រេចបានគោលដៅក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលខ្ពស់នៅឆ្នាំ២០៥០៕
Account
Security
Favourite Content