ភ្នំពេញ៖ ក្រៅពីវិស័យរថយន្តអគ្គិសនី ដែលនឹងក្លាយជាទីផ្សារសំខាន់សម្រាប់ប្រទេសចិន បន្ទះស្រូបពន្លឺព្រះអាទិត្យ និងបច្ចេកវិទ្យាថាមពលកកើតឡើងវិញ ក៏នឹងក្លាយជាទីផ្សារដ៏គួរឱ្យចាប់អារម្មណ៍ពីប្រទេសចិនផងដែរ។

ប្រទេសកម្ពុជាស្ថិតនៅកណ្តាលនៃតំបន់អាស៊ានដែលជាតំបន់​មួយក្នុងចំណោម​តំបន់ដែលមានថាមពលខ្លាំងបំផុតរបស់ពិភពលោក មានគុណសម្បត្តិខាង​ភូមិសាស្ត្រ ដែលអាចឱ្យប្រទេសមួយនេះដើរតួជាមជ្ឈ​មណ្ឌលដ៏ល្អប្រសើរសម្រាប់ការប្រមូលផ្តុំការផលិត និងជំហានសំខាន់ៗផ្សេងទៀតតាមខ្សែសង្វាក់តម្លៃ។ ជាមួយនឹងចំនួនប្រជាជនវ័យក្មេងកើនឡើង ប្រទេសកម្ពុជាកំពុង​ឈានទៅ​កាន់តំណែង​ជាប្រទេស​ដែលមានប្រាក់ចំណូលខ្ពស់នៅឆ្នាំ២០៥០។ ទាំងនេះជាចំណុចដ៏សំខាន់នៃភាពទាក់ទាញវិនិយោគិន ជាពិសេសពីប្រទេសចិន។

ឯកឧត្តម បណ្ឌិត ធន់ វឌ្ឍនា គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃព្រឹទ្ធសភាកម្ពុជា បានលើក​ឡើង​ដូច្នេះកាលពីពេលកន្លងទៅថ្មីៗនេះនៅក្នុងវេទិកាស្តីពី “ការអភិវឌ្ឍយានយន្តថាមពលថ្មី បច្ចេកវិទ្យាសូឡាកម្រិតខ្ពស់ និងឧស្សហកម្មស្តុកថាមពលថ្មី” ក្នុងទីក្រុង Hefei ខេត្តអានហួយ សាធារណរដ្ឋប្រជាមានិតចិនដោយមានអ្នកចូលរួមជាង៣០០នាក់មកពី១២ប្រទេសដែលជាសមាជិក​ RCEP ។

ឯកឧត្តម បណ្ឌិត បានថ្លែងថា៖

«បន្ទះស្រូបពន្លឺព្រះអាទិត្យ និងបច្ចេកវិទ្យាថាមពល​កកើតឡើងវិញក៏នឹងក្លាយជា​របៀប​វារៈស៏សំខាន់ដែល​ត្រូវបញ្ចូលទៅក្នុងការវិនិយោគ និងពាណិជ្ជកម្មដែលផ្តល់ផលប្រយោជន៍ទៅវិញទៅមករវាងចិន-កម្ពុជា»។

ឯកឧត្តមបណ្ឌិត បានលើកឡើងថា ៖

«កិច្ចសហប្រតិបត្តិការរវាងកម្ពុជា-ចិន អាចពង្រីកផលិតកម្ម និងការវិនិយោគលើបច្ចេកវិទ្យា​ប្រកប​ដោយនិរន្តរភាពដែលអាចបង្កើតការងារសមរម្យ កាត់បន្ថយភាពក្រីក្រ និងសម្រួលដល់កំណើនសេដ្ឋកិច្ច។ យើងចង់បង្កើន​បរិមាណ​​នៃការវិនិយោគនៅក្នុងវិស័យ EV ថាមពលពន្លឺព្រះអាទិត្យ និងថាមពលបៃតងពីដៃគូបរទេស និងបង្កើតយុទ្ធសាស្រ្ត​យូរអង្វែង​សម្រាប់ការចាប់យកទីផ្សាររយៈពេលវែង»។

ឯកឧត្តមបណ្ឌិត ធន់ វឌ្ឍនា បានគូសបញ្ជាក់ថា៖ នៅក្រោមដំបូលនៃសន្តិភាព និងស្ថិរភាពនយោបាយ គោលនយោបាយ​របស់កម្ពុជា​ទាក់ទងនឹងការវិនិយោគផ្ទាល់ពីបរទេសគឺមានភាពពិសេសក្នុងចំណោមដៃគូរបស់ខ្លួន ដែលផ្តល់ភាពងាយ​ស្រួល និងគ្មានការរើស​អើងរវាងការវិនិយោគក្នុងស្រុក និងបរទេស។ ច្បាប់របស់កម្ពុជាសមស្របទៅនឹងក្របខណ្ឌមូលដ្ឋានក្នុងតំបន់ដែលសង្កត់ធ្ងន់លើការកាត់បន្ថយហានិភ័យ ខណៈដែលកំពុងបង្កើនឱកាសក្នុងពេលដំណាលគ្នា។ បន្ថែមពីលើភាពបត់បែននេះ គោលនយោបាយថ្មីៗរបស់កម្ពុជាក៏មានគោលបំណងលើកទឹកចិត្តដល់ការវិនិយោគតាមរយៈការលើកលែងពន្ធ និងការឧបត្ថម្ភធន​ស្រដៀងគ្នាផ្សេងទៀត ការបង្កើនប្រាក់ចំណេញ និងសក្តានុពលនៃការវិនិយោគផ្ទាល់ពីបរទេស (FDI) នៅក្នុងប្រទេសរបស់កម្ពុជា។

ដោយឡែក ឯកឧត្តម​ កែវ​ រតនៈ​ រដ្ឋមន្រ្តីក្រសួងរ៉ែ​ និងថាមពល​ នៅក្នុងវេទិកាថាមពលស្អាតអាស៊ី (ACEF2024)នាពេលកន្លងមក បានលើកឡើងថា ប្រទេសកម្ពុជាបានប្តេជ្ញាចិត្តក្នុងការបង្កើនប្រភពថាមពលកកើតឡើងវិញឱ្យបាន ៧០ភាគរយនៅឆ្នាំ២០៣០ ​និងសម្រេ​ច​គោលដៅអព្យាក្រឹត្យកាបូននៅត្រឹមឆ្នាំ២០៥០។

ថ្មីៗនេះ ឯកឧត្តមរដ្ឋមន្រ្តីក្រសួងរ៉ែ និងថាមពល បានបង្ហើបឱ្យដឹងថា ក្រុមហ៊ុនយក្សជប៉ុន Minebea គ្រោងនឹងបើកការដ្ឋានសាងសង់រោងចក្រទី២ របស់ខ្លួននៅក្នុងស្រុកក្រគរ ខេត្តពោធិ៍សាត់ ដែលនឹងបង្កើតការងារថ្មីជាច្រើនកន្លែងបន្ថែមទៀតដល់យុវជន ។ មូលហេតុមួយក្នុងចំណោមមូលហេតុដទៃទៀត​ ដែលក្រុមហ៊ុន​ Minebea សម្រេចចិត្តវិនិយោគរោងចក្រទី២​ នៅកម្ពុជា​ គឺដោយសារគេបានមើលឃើញពីសក្តានុពលនៃការគាំទ្ររបស់ថាមពលអគ្គិសនីដែលបច្ចុប្បន្ន​កម្ពុជាកំពុងតែផលិតថាមពលចេញពីប្រភពថាមពលកកើតឡើងវិញយ៉ាងច្រើនលើសលប់ធ្វើឱ្យប្រទេសកម្ពុជាក្លាយជាប្រទេសមួយដែលមានការទាក់ទាញលើវិស័យថាមពល។​

ចំណែកគម្រោងវិនិយោគថ្មីមួយកន្លែងទៀត​ ដែលក្រុមប្រឹក្សាអភិវឌ្ឍន៍កម្ពុជា​បានអនុម័តកាលពីខែឧសភា ឆ្នាំ២០២៤ កន្លងទៅគឺគម្រោង​វិនិយោគអភិវឌ្ឍន៍ស្ថានីយអគ្គិសនីដើរដោយថាមពលពន្លឺព្រះអាទិត្យ អានុភាព ៦០មេហ្កាវ៉ាត់​ ជាមួយប្រព័ន្ធផ្ទុកថាមពលអគ្គិសនី​ ដែលមានទីតាំងស្ថិតនៅភូមិព្រៃជ្រៅ​ ឃុំក្បាលទឹក​ ស្រុកទឹកផុស​ ខេត្តកំពង់ឆ្នាំង។

ឯកឧត្តម កែវ រតនៈ បានមានប្រសាសន៍ថា ៖ ថាមពលដើរដោយខ្យល់ វាមានសារៈសំខាន់ណាស់ដែលជាចំណែកមួយនៃការដាក់ថាមពលស្អាតនៅក្នុងពិភពលោក។ នៅឆ្នាំ២០២២ ប្រទេសចិនម្នាក់ឯង តំណាងឲ្យ​៥០​ភាគរយនៃការដាក់បញ្ចូលថាមពលដើរដោយខ្យល់នៅក្នុងពិភពលោក។ ប្រទេសចិនគឺជាប្រទេសមួយឈានមុខគេក្នុងការដាក់ដំឡើងថាមពលដើរដោយខ្យល់។

ឯកឧត្តមបានបញ្ជាក់ថា៖

«កម្ពុជាយើងនឹងឈានទៅដល់ការផលិតថាមពលដើរដោយខ្យល់នាពេលដ៏ខ្លីខាងមុខនេះ គឺនឹងដំឡើងថាមពល​ដើរដោយខ្យល់នៅក្នុងខេត្តមណ្ឌលគីរី ក៏ដូចជាតំបន់ភ្នំបូកគោ ដើម្បីរុញថាមពលស្អាត និងថាមពលកកើតឡើងវិញសម្រាប់ប្រព័ន្ធអគ្គិសនីនៅកម្ពុជា»៕