សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
មិនចាំបាច់ទាល់តែមានដីធំ ឬដីចំការទើបអាចដាំដំណាំបាននោះទេ សូម្បីតែដីទំនេរនៅជុំវិញផ្ទះ ឬអាចច្នៃចេញជាសួនដំណាំតូចៗ ក៏អាចដាំដុះបន្លែងាយៗ សម្រាប់ហូបក្នុងក្រុមគ្រួសារ កាត់បន្ថយចំណាយ ហើយថែមទាំងអាចកម្សាន្ត និងបញ្ចេញពលកម្មតាមរយៈការមើលថែសួនដំណាំបានទៀតផង។
បើតាមបទសោធផ្ទាល់របស់លោក នី ប៊ុនថា ជាអ្នកចូលចិត្តដាំបន្លែជុំវិញផ្ទះ និងបង្កើតមាតិកាកសិកម្ម ស្ថិតនៅស្រុកស្រែអំបិល ខេត្តកោះកុង បានមានប្រសាសន៍ទាក់ទងនឹងអត្ថប្រយោជន៍នៃការដាំដំណាំងាយៗជុំវិញផ្ទះថា ការដាំដំណាំជុំវិញផ្ទះនេះ គឺគេមិនត្រូវការដីធំអ្វីនោះទេ សំខាន់ឱ្យតែចេះរៀបចំដីសម្រាប់ដាក់ដាំនូវដំណាំងាយៗ ដែលគេត្រូវការជាប្រចាំ ហើយលោកក៏លើកទឹកចិត្តឱ្យបងប្អូនងាកមកចាប់អារម្មណ៍នឹងការដាំដំណាំនេះឱ្យបានច្រើន។
លោកបញ្ជាក់ថា៖
«យើងលើកទឹកចិត្តពួកគាត់ក្នុងការដាំដំណាំ ព្រោះវាមានសារៈប្រយោជន៍សម្រាប់ការរៀបចំ មិនថាតាមផ្ទះនៅជនបទ ឬទីក្រុងនោះទេ គឺគាត់គួរតែមានសួនដំណាំតូចក្ដី ធំក្ដី ដែលគាត់អាចកាត់បន្ថយការចំណាយបានមួយផ្នែកពីបន្លែដែលទិញនៅតាមផ្សារជំនួសដោយរបស់ដាំដោយខ្លួនឯង ដូចជា ជី ស្លឹកគ្រៃ ម្ទេស និងបន្លែផ្សេងទៀត ហើយការបញ្ចេញកម្លាំងពលកម្មនានាក្នុងការដាំដុះ អាចជួយឱ្យចេញញើសមានសុខភាពល្អ ថែមទាំងជួយដល់បរិស្ថានតាមរយៈការដាំដុះ ដែលផ្ដល់នូវបរិយាកាសល្អ កាត់បន្ថយការឡើងកម្ដៅលើផែនដីផងដែរ»។
លោកបន្តទៀតថា សម្រាប់ការដាំដុះលក្ខណៈគ្រួសារ លោកលើកទឹកចិត្តឱ្យបងប្អូនប្រជាជនដាំឱ្យបានច្រើនគ្នា ព្រោះនៅពេលមានសកម្មភាពដាំដុះ និងរៀបចំសួន អាចធ្វើឱ្យការរស់នៅមានផាសុកភាព បូករួមជាមួយការប្រមូលផលបន្លែដែលដាំដោយផ្ទាល់ដៃមួយចំនួន ដែលជាបន្លែស្រស់ៗ គ្មានសារធាតុគីមី។
ដោយឡែក ប្រភេទដំណាំដែលល្អបំផុតសម្រាប់ដាំជុំវិញផ្ទះ អ្នកបង្កើតមាតិកាខាងលើបានចែករំលែកផងដែរថា បងប្អូនគួរតែដាំជាប្រភេទបន្លែវិលជុំ ដែលអាចដាំ និងប្រមូលក្នុងរយៈពេលខ្លី ជាពិសេស ប្រភេទបន្លែណាដែលត្រូវការជាប់ជាប្រចាំ ដូចជា ស្លឹកគ្រៃ ស្លឹកក្រូចសើច រំដេង ម្ទេស ប៉េងប៉ោះ ជី ស្លឹកខ្ទឹមជាដើម ដែលសុទ្ធសឹងជាដំណាំងាយដាំ និងមិនត្រូវការបច្ចេកទេសស្មុគស្មាញពេកនោះទេ។
គួរបញ្ជាក់ដែរថា ក្រៅពីការប្រមូលផលដំណាំដែលលោកបានដាំនៅជុំវិញផ្ទះហើយ លោក ប៊ុនថា ក៏អាចទាញយកប្រយោជន៍មួយផ្នែកទៀតពីការដាំដុះ នោះគឺការបង្កើតមាតិកាកសិកម្ម ដែលចែករំលែកពីបច្ចេកទេសដាំដុះដំណាំងាយៗ និងផលិតជីកសិកម្ម ដើម្បីផ្សព្វផ្សាយដល់អ្នកដែលនិយមចូលចិត្តដាំដំណាំ អាចមើល និងអនុវត្តបានតាមផ្ទះផងដែរ៕
Account
Security
Favourite Content