សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ទន្ទឹមនឹងសេដ្ឋកិច្ច ក៏ដូចជាប្រជាជននៅតាមទីប្រជុំជនមានការកើនឡើងគួរឱ្យកត់សម្គាល់ ការគ្រប់គ្រងសំរាមក៏ហាក់នៅមិនទាន់អាចធ្វើឡើងគ្រប់ជ្រុងជ្រោយនៅឡើយ។ ជាក់ស្ដែង បើតាមទិន្នន័យពីក្រសួងបរិស្ថាន សំរាមដែលបានប្រមូលទៅចោលនៅទីលានគឺមានត្រឹមតែ ៧០% ទៅ ៨០% ប៉ុណ្ណោះ។
បើតាមទិន្នន័យពីក្រសួងបរិស្ថានដដែល ក្នុងចំណោមសំរាមដែលបានប្រមូលទៅចោលនៅទីលានមានត្រឹមតែ ២០% ប៉ុណ្ណោះដែលត្រូវបានកែច្នៃដើម្បីប្រើប្រាស់ឡើងវិញ។ លទ្ធភាពនៃការកែច្នៃបានតិចតួចនេះហើយ ដែលធ្វើឱ្យទីលានចាក់សំរាមមិនអាចទ្រទ្រង់សំរាមបានយូរអង្វែង។
ដោយឡែក អាជីវកម្មផលិតធុងបរិស្ថាន គឺជាអាជីវកម្មមួយដែលកែច្នៃសំបកកង់ឡានចាស់ៗឱ្យទៅជាធុងសម្រាប់ដាក់សំរាម និងមានវត្តមានលើទីផ្សារតាំងតែពីឆ្នាំ២០១០ ខណៈដែលអាជីវកម្មមួយនេះ បានចូលរួមជួយសម្រាលបន្ទុកបរិស្ថានបានយ៉ាងច្រើន។
សំបកកង់ឡានដែលប្រើប្រាស់រួចត្រូវបានម្ចាស់សិប្បកម្មនេះយកទៅកាត់ និងចៀរដោយដៃ រួចផ្គុំគ្នាចេញជារាងមូល និងមានគម្របគ្របពីលើផង។ ដើម្បីសោភ័ណ្ឌភាព ក៏ដូចជាបង្កើនភាពងាយស្រួលក្នុងការប្រើប្រាស់ផង អ្នកស្រី សឿង សុថារី ជាម្ចាស់សិប្បកម្មកែច្នៃធុងបរិស្ថានបានតុបតែងធ្វើជើងទម្រ និងលាបពណ៍ធុងរបស់ខ្លួនបានយ៉ាងស្រស់ស្អាត។
ថ្វីត្បិតថា ផលិតផលធុងបរិស្ថាន (Eco Bin) ត្រូវបានផ្សព្វផ្សាយនៅលើទីផ្សារច្រើនក្ដី ប៉ុន្តែម្ចាស់សិប្បកម្មរូបនេះអះអាងថា ខ្លួនមិនទាន់ទទួលបានជោគជ័យក្នុងការពង្រាយធុងតាមទីសាធារណៈនៅទូទាំងប្រទេសនៅឡើយទេ។
ក្នុងន័យនេះ អ្នកស្រី សឿង សុថារី បានរៀបរាប់ថា៖
«តាមការខិតខំរបស់យើងប្រមាណជាង ១០ឆ្នាំមកនេះ ពួកយើងនៅតែចង់ឃើញវត្តមានធុងបរិស្ថានរបស់យើងនៅគ្រប់ទីសាធារណៈទូទាំងប្រទេស»។
អ្នកស្រីបន្តថា បើមានធុងសំរាមនៅតាមទីសាធារណៈកាន់តែច្រើន នោះការទុកដាក់សំរាមរបស់ប្រជាជនក៏នឹងមានភាពល្អប្រសើរជាងមុន រីឯប្រភេទសំរាមកង់ឡានក៏នឹងត្រូវបានប្រមូលទៅកែច្នៃកាន់តែច្រើនថែមទៀត។
យ៉ាងណាមិញ ដើម្បីអាចឈានទៅដល់គោលដៅនោះ អ្នកស្រីបាន និងកំពុងខិតខំផ្សព្វផ្សាយបន្ថែមទៀត ជាពិសេសធ្វើការជាមួយអ្នកពាក់ព័ន្ធ។ ជាក់ស្ដែងបច្ចុប្បន្ន អ្នកស្រី និងក្រុមការងារកំពុងតែរៀបចំនូវយុទ្ធនាការដាក់ធុងសំរាមទៅតាមទីវត្តអារាមឱ្យបាន ១០០វត្តផ្សេងៗគ្នា។
គោលដៅបន្តទៀត គឺបន្តដាក់ធុងសំរាមទៅតាមសាលារៀន មណ្ឌលសុខភាព និងសួនសាធារណៈនៅទូទាំងប្រទេសតែម្ដង។ យ៉ាងណាក៏ដោយ អ្នកស្រីនៅតែបន្តអំពាវនាវឱ្យមានការចូលរួមពីប្រជាពលរដ្ឋដែលជាអ្នកបង្កើតសំរាម ក្នុងការគ្រប់គ្រងសំរាមឱ្យបានត្រឹមត្រូវ មិនបោះចោលពាសវាលពាសកាល និងចេះបែងចែកទៅតាមប្រភេទសំរាម ដើម្បីបង្កភាពងាយស្រួលដល់អ្នកកែច្នៃ៕
Account
Security
Favourite Content