ភ្នំពេញ៖ រាជរដ្ឋាភិបាលកម្ពុជា បានចេញគោលនយោបាយអភិវឌ្ឍន៍លំនៅឋានសង្គម និងលំនៅឋានតម្លៃសមរម្យ កាលពីខែកុម្ភៈ ឆ្នាំ២០២៦ ដែលត្រូវបានរៀបចំឡើងតាមរយៈការធ្វើប​ច្ចុប្បន្នកម្ម និងជំនួសឱ្យគោលនយោបាយស្តីពីការលើកទឹកចិត្ត និងការបង្កើតកម្មវិធីជាតិសម្រាប់ការអភិវឌ្ឍលំនៅឋានតម្លៃសមរម្យ ដើម្បីធានានិរន្តភាពនៃការបន្តដោះស្រាយបញ្ហាប្រឈមក្នុងវិស័យលំនៅឋាននៅកម្ពុជា ក្នុងគោលដៅជំរុញការផ្គត់ផ្គង់លំនៅឋានសង្គម និងលំនៅឋានតម្លៃសមរម្យប្រកបដោយគុណភាព សុវត្ថិភាព និងមានការតភ្ជាប់សេវាជូនប្រជាជនដែលមានចំណូលទាប មធ្យម និងក្រុមជនងាយរងគ្រោះព្រមទាំងជំរុញដល់ការអភិវឌ្ឍន៍នគររូបនីយកម្ម។​

លំនៅឋានតម្លៃសមរម្យ ៣ប្រភេទ នឹងទទួលបានការគាំទ្រពីរាជរដ្ឋាភិបាល រួមមាន លំនៅឋានសង្គម​, លំនៅឋានតម្លៃសមរម្យកម្មសិទ្ធិ, លំនៅឋានតម្លៃសមរម្យសម្រាប់ជួល​​ ដែលអ្នកអភិវឌ្ឍន៍អាចសុំវិនិយោគ ដើម្បីទទួលបានការគាំទ្រពីរាជរដ្ឋាភិបាល និងផ្គត់ផ្គង់ដល់ពលរដ្ឋដែលមានចំណូលទាប។

យោងតាមគោលនយោបាយអភិវឌ្ឍន៍លំនៅឋានសង្គម និងលំនៅឋានតម្លៃសមរម្យ ដែលរដ្ឋាភិបាលបានដាក់ចេញកាលពីពេលថ្មីៗនេះបានឱ្យដឹងថា គ្រប់គម្រោងលំនៅឋានដែលទទួលបានការគាំទ្រពីរាជរដ្ឋាភិបាល ត្រូវប្រើប្រាស់ទំហំដីយ៉ាងច្រើនបំផុត៧០% នៃផ្ទៃដីសរុបរបស់គម្រោងសម្រាប់សាងសង់លំនៅឋាន និងមានរក្សានូវលម្អបៃតង ព្រមទាំងមានភ្ជាប់ជាមួយរបាយការណ៍បឋមនៃការវាយតម្លៃហេតុប៉ះពាល់បរិស្ថាន និងសង្គម។

គម្រោងទាំងនេះអាចត្រូវបានអភិវឌ្ឍជាសហគមន៍បញ្ចូលគ្នារវាងលំនៅឋាន ដែលទទួលបានការគាំទ្រពីរាជរដ្ឋាភិបាល និងលំនៅឋានប្រភេទផ្សេងទៀតក្នុងគម្រោងតែមួយ ដោយសមាមាត្រនៃចំនួនលំនៅឋានទាំងនោះធៀបនឹងចំនួនលំនៅឋាន ឬសំណង់ផ្សេងទៀតក្នុងគម្រោងទាំងមូល និងត្រូវកំណត់ក្នុងការសិក្សាគម្រោងដោយផ្អែកលើទីតាំង​ អតិថិជនគោលដៅ និងរចនាសម្ព័ន្ធហិរញ្ញវត្ថុរបស់គម្រោងជាអាទិ៍។

ថ្លែងក្នុងឱកាសពិធីបញ្ចប់ការសាងសង់គ្រោងអគារនៃលំនៅឋានអារ៉ាខាវ៉ា ២ (Arakawa Residence 2) នាពេលថ្មីៗនេះ ឯកឧត្តម ប្រាក់ អង្គារ៉ា អគ្គនាយកនៃអគ្គនាយកដ្ឋានលំនៅឋាន ក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ថា៖ ក្រុមហ៊ុន អារ៉ាកាវ៉ា បានសាងសង់គម្រោងលំនៅឋានតម្លៃសមរម្យ ជាមួយសមត្ថភាព និងបច្ចេកទេសខ្ពស់ក្នុងការសាងសង់។ គម្រោងនេះជាការរួមចំណែកមួយរវាងវិស័យឯកជន និងរដ្ឋាភិបាល ដើម្បីជួយឱ្យវិស័យនេះវាអាចរីកចម្រើន ហើយជួយទៅដល់ប្រជាពលរដ្ឋក្រីក្រ និងមធ្យម មានលំនៅឋានសមរម្យសម្រាប់រស់នៅ។

ឯកឧត្តមបានបន្តថា ៖

«គោលនយោបាយលំនៅឋានតម្លៃសមរម្យនេះ ផ្តល់ការអនុគ្រោះសម្រាប់ប្រជាពលរដ្ឋ ធ្វើម៉េចឱ្យប្រជាពលរដ្ឋដែលជាកម្មករ មន្ត្រីរាជការ ដែលមានប្រាក់ចំណូលទាប អ្នករកស៊ីលក់ដូរបន្តិចបន្តួចហ្នឹង អាចមានលទ្ធភាពទិញ។ យើងមិនឱ្យគាត់ចំណាយលើសពីប្រាក់ចំណូលរបស់គាត់ក្នុងមួយខែលើសពី ៣០ ភាគរយទេ។ មានន័យថាប្រាក់ចំណូលរបស់គាត់ អាចមានលទ្ធភាពទិញ គឺការបង់ប្រចាំខែហ្នឹងមិនឱ្យលើសពី ៣០ ភាគរយ។ គាត់អាចទិញផ្ទះ តម្លៃសមរម្យមិនឱ្យលើសពី ៣ ឆ្នាំនៃប្រាក់ចំណូលរបស់គាត់ប្រចាំឆ្នាំទេ»។

ឯកឧត្តមបានបញ្ជាក់ថា៖ មានការលើកទឹកចិត្តចំពោះវិនិយោគិនទាំងក្នុង និងក្រៅប្រទេស ទៅលើការវិនិយោគលើលំនៅឋានតម្លៃសមរម្យ ដូចជា អារ៉ាកាវ៉ា ជាដើម ដែលទទួលបានការអនុគ្រោះដូចជាការបង់ពន្ធប្រថាប់ត្រា ពន្ធកាត់ឈ្មោះ ពន្ធផ្សេងៗទៀត ដែលអាចទទួលបានការអនុគ្រោះពីរដ្ឋាភិបាល ប៉ុន្តែគាត់ត្រូវតែដាក់ពាក្យស្នើសុំជាគម្រោងលំនៅឋានតម្លៃសមរម្យសិន។

ឯកឧត្តមបានបន្តថា ៖

«រដ្ឋក៏មានដី អាចផ្តល់ការអនុគ្រោះអ្នកវិនិយោគ តែដីនៅទីក្រុងសព្វថ្ងៃនេះ គឺមានការពិបាកបន្តិច ជាពិសេសទីក្រុងភ្នំពេញ ព្រោះដីភាគច្រើនជាដីឯកជន។ ប៉ុន្តែនៅតាមបណ្តាខេត្ត យើងមានដីរដ្ឋខ្លះដូចជានៅសៀមរាប បាត់ដំបង ដែលអាចសហការជាមួយខាងក្រុមហ៊ុន ដើម្បីធ្វើការវិនិយោគលំនៅឋានតម្លៃសមរម្យ។ រដ្ឋាភិបាលយើងគិតគូរទៅដល់ប្រជាពលរដ្ឋ ធ្វើម៉េចឱ្យប្រជាពលរដ្ឋគ្រប់រូប ជាពិសេសអ្នកដែលមានប្រាក់ចំណូលទាប ចំណូលមធ្យម ជនងាយរងគ្រោះ ហើយក៏គិតគូរទៅដល់គូស្វាមីភរិយាថ្មីថ្មោងដែលទើបរៀបការហើយ អាចមានលំនៅឋានសមរម្យសម្រាប់រស់នៅ»។

លោកបណ្ឌិត យ៉ាស៊ូម៉ូតូ ខេមមូរី (Dr. Yasumoto Kemmori) ស្ថាបនិក និងជាប្រធានក្រុមប្រឹក្សាភិបាលក្រុមហ៊ុន បានឱ្យដឹងថាខន់ដូ អារ៉ាខាវ៉ានេះ សាងសង់ឡើងដោយគុណភាពខ្ពស់ សំណង់រឹងមាំ និងផ្តល់លទ្ធភាពសម្រាប់អ្នកមានចំណូលមធ្យមនិងចំណូលទាប។  ដូចគម្រោងទី១ ក្នុងសង្កាត់ទឹកថ្លា គម្រោងអារ៉ាខាវ៉ាទី២ នេះ ក៏វិនិយោគ ១០០% ដោយទុនផ្ទាល់របស់វិនិយោគិនជប៉ុន ដោយមិនប្រើប្រាស់ប្រាក់កក់របស់អតិថិជនឡើយ ។ គម្រោងសាងសង់ក្នុងសង្កាត់រលួស ខណ្ឌដង្កោ លើផ្ទៃដីជិត ០.៤ ហិកតា មាន ២ ប្លុក (៤ អគារ) កម្ពស់ ២២ ជាន់ និងមានយូនីតសរុប ៩៦០ យូនីត ។ក្រុមហ៊ុនផ្តល់ជូននូវលក្ខខណ្ឌបង់ប្រាក់ងាយស្រួល ជាមួយការបង់រំលស់ប្រចាំខែចាប់ពី ១៨០ដុល្លារ ដោយគ្មានការប្រាក់រហូតដល់ទៅ ៤២ ខែ និងមិនមានប្រាក់កក់។ លក្ខខណ្ឌនេះ សាកសមបំផុតសម្រាប់អ្នកធ្វើការ គ្រួសារតូច គូស្រករថ្មីថ្មោង និងសិស្សនិស្សិត។​ គម្រោងក៏ផ្តល់ផងដែរនូវការផ្ទេរកម្មសិទ្ធិប្លង់រឹង ដោយឥតគិតថ្លៃ។

គម្រោងត្រូវបានរចនាតាមបែបស្ថាបត្យកម្មសាមញ្ញ តែទំនើប ដោយគិតគូរ​អំពីពន្លឺ និងលំហូរខ្យល់ធម្មជាតិគ្រប់យូនីត ដែលជួយកាត់បន្ថយការចំណាយលើថាមពលអគ្គិសនី។ យូនីតនីមួយៗ អាចមើលឃើញទេសភាពដ៏ស្រស់ត្រកាលនៅក្នុងរាជធានីភ្នំពេញ។ គ្រប់យូនីត និងអគារទាំងមូលត្រូវបានបំពាក់ប្រព័ន្ធសុវត្ថិភាព និងប្រព័ន្ធការពារអគ្គិភ័យស្តង់ដា ដើម្បីការរស់នៅប្រកបដោយផាសុកភាព សុវត្ថិភាព និងភាពសុខដុមរមនា ។

ឯកឧត្តម សេង ឡូត រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា អ្នកអភិវឌ្ឍន៍លំនៅឋានតម្លៃសមរម្យនៅកម្ពុជា នឹងត្រូវទទួលបានការលើកលែង ឬអនុគ្រោះពន្ធ និងកាតព្វកិច្ចនិយ័តកម្ម រួមទាំងការបង់កម្រៃផ្សេងៗ ដូច្នេះក្រុមហ៊ុន ឬអ្នកវិនិយោគដែលបោះទុនវិនិយោគលើលំនៅឋានតម្លៃសមរម្យ នឹងទទួលឱកាសពិសេស និងអត្ថប្រយោជន៍ច្រើនពីរាជរដ្ឋាភិបាល ។

ឯកឧត្តមបន្តថា ៖

«ក្រៅពីអត្ថប្រយោជន៍ទាំងនេះ អ្នកវិនិយោគ ឬអ្នកអភិវឌ្ឍន៍លំនៅឋានតម្លៃ សមរម្យក៏នឹងទទួលបានការជួយសម្របសម្រួលនីតិវិធីរដ្ឋបាល និងការវិនិយោគហេដ្ឋារចនាសម្ព័ន្ធ សាធារណៈ ដោយក្រសួងរៀបចំដែន នគរូបនីយកម្មនិងសំណង់ នឹងជួយសម្រួលបែបបទនិងការស្នើសុំ អភិវឌ្ឍលំនៅឋានតម្លៃសមរម្យ ដោយក្រសួងនឹងជួយសម្រួលនិងពន្លឿននីតិវិធី ដើម្បីធ្វើយ៉ាងណាឱ្យដំណើរការវិនិយោគរបស់លឿនរហ័ស ដោយរដ្ឋនឹងជួយតភ្ជាប់ហេដ្ឋារចនាសម្ព័ន្ធដូចជាផ្លូវ លូ ទឹក ភ្លើងជាដើម »។

បើតាមរបាយការណ៍របស់ក្រសួងរៀបចំដែនដី នគរូបនីយកម្មនិងសំណង់ គិតត្រឹមឆ្នាំ ២០២៥ គម្រោងអភិវឌ្ឍន៍លំនៅឋានតម្លៃសមរម្យមានចំនួន៦ ដោយក្នុងនោះរួមមាន ១. គម្រោងរបស់ក្រុមហ៊ុន World Bridg Home មានផ្ទះសរុបចំនួន ២ ៤៥៧គម្រោង ស្ថិតនៅខេត្តកណ្ដាល ២. គម្រោងរបស់ក្រុមហ៊ុន B&BM Development ដោយអភិវឌ្ឍផ្ទះសរុបចំនួន ៧០០ ខ្នង ស្ថិតនៅខេត្តកណ្ដាល ៣.គម្រោងរបស់ក្រុមហ៊ុន អារ៉ាខាវ៉ា ជាប្រភេទអគារសហកម្មសិទ្ធិដែលមានចំនួន ១ ៩២៨យូនីត ( បំណែកឯកជន ) ស្ថិតនៅរាជធានីភ្នំពេញ ៤. គម្រោងរបស់ក្រុមហ៊ុន Grand Park ដោយអភិវឌ្ឍផ្ទះសរុបចំនួន២០០ខ្នង ស្ថិតនៅរាជធានីភ្នំពេញ ។

ដោយឡែកមានគម្រោងថ្មីចំនួន២ទៀត ដែលបានស្នើសុំអភិវឌ្ឍលំនៅឋានតម្លៃសមរម្យរួមមាន ក្រុមហ៊ុនឃុន សៀ អ៊ីមផត អិចផត ដោយទទួលបានគោលការណ៍អនុញ្ញាតវិនិយោគលើផ្ទៃដី ៩១ ៦០៧ហិកតា ជាប្រភេទលំនៅឋានតម្លៃក្រោម៣ម៉ឺនដុល្លារ  ហើយគ្រោងនឹងសាងសង់ផ្ទះសរុបចំនួន ៦២ ២៩៦ខ្នង ដែលមានទីតាំងស្ថិតនៅក្រុងអរិយក្សត្រ ខេត្តកណ្ដាល ។ គម្រោងមួយទៀតដែលបានស្នើសុំអភិវឌ្ឍលំនៅឋានតម្លៃសមរម្យដែរនោះ គឺក្រុមហ៊ុន ឡេង យី បានស្នើសុំសាងសង់លំនៅឋានសរុបចំនួន ៥០០ខ្នង ដែលមានទីតាំងស្ថិតនៅខណ្ឌព្រែកព្នៅ រាជធានីភ្នំពេញ ។

ទាក់ទិននឹងការអភិវឌ្ឍលំនៅឋានតម្លៃសមរម្យនេះដែរ អ្នកស្រី អាន សុធីតា នាយិកាប្រតិបត្តិក្រុមហ៊ុន PropNex Cambodia បានមានប្រសាសន៍ថា តម្រូវការលំនៅឋាននៅក្នុងប្រទេស កម្ពុជានៅតែមាន ជាពិសេសទីផ្សារលំនៅឋានតម្លៃសរម្យ ដូច្នេះសម្រាប់ឆ្នាំ២០២៦នេះអ្នកអភិវឌ្ឍន៍លំនៅឋាន គួរតែផ្ដោតលើលំនៅឋានតម្លៃសមរម្យ មិនថាជាប្រភេទបុរី ឬខុនដូ ៕