សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានណែនាំឱ្យអ្នកដាំកាហ្វេនៅខេត្តមណ្ឌលគិរីរួមគ្នាកសាងម៉ាកសមូហភាព«កាហ្វេមណ្ឌលគិរី»ដើម្បីជួយការពារអត្តសញ្ញាណផលិតផលក្នុងស្រុក ជំរុញការផលិតកាហ្វេប្រកបដោយស្តង់ដារ និរន្តរភាព បង្កើនភាពធន់ ព្រមទាំងបង្កើនប្រាក់ចំណូល។
ឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានណែនាំដោយផ្តោតលើចំណុចសំខាន់ៗមួយចំនួនរួមមានដូចជា ការធ្វើបច្ចុប្បន្នភាពទិន្នន័យផលិតកម្មកាហ្វេនៅខេត្តមណ្ឌលគីរី, ការសិក្សាអំពីការធ្វើពិពិធកម្មដំណាំ ជាពិសេសការប្តូរពីការដាំដំឡូងមកដាំកាហ្វេវិញ និងវិភាគពីសក្តានុពល បញ្ហាប្រឈម និងដំណោះស្រាយ, ការរៀបចំឱ្យមានចម្ការគំរូនៅគ្រប់ឃុំ ក្រោមការដឹកនាំពីមន្ត្រីកសិកម្មឃុំ , ការរួមគ្នាកសាងម៉ាកសមូហភាព «កាហ្វេមណ្ឌលគីរី» ដែលមានស្តង់ដារ GAP និងឈានទៅរកកាហ្វេសរីរាង្គ ហើយជាចុងក្រោយគឺការពង្រឹង និងពង្រីកទីផ្សារ។
ឯកឧត្តមបណ្ឌិត យ៉ង សាំងកុមារ បានបញ្ជាក់ថា ៖
« ការងារទាំងនេះមានគោលបំណងលើកកម្ពស់គុណភាព និងតម្លៃបន្ថែមនៃកាហ្វេមណ្ឌលគីរី ព្រមទាំងបង្កើនប្រាក់ចំណូលសម្រាប់ទ្រទ្រង់ជីវភាពរស់នៅរបស់កសិករ និងការផលិតកសិកម្មដែលមានភាពធន់អាកាសធាតុ»។
សូមបញ្ជាក់ថា ការបង្កើតម៉ាកសមូហភាព នឹងផ្តល់អត្ថប្រយោជន៍សំខាន់ៗជាច្រើន ដោយម៉ាកសញ្ញាផលិតផលនេះអាចការពារអត្តសញ្ញាណផលិតផលក្នុងស្រុក លើកកម្ពស់កេរ្តិ៍ឈ្មោះផលិតផលរួម បង្កើនតម្លៃបន្ថែម ធានាគុណភាពស្ដង់ដារ និងការបង្កើនជំនឿទុកចិត្តដល់អ្នកប្រើប្រាស់ ជាពិសេសពង្រីកទីផ្សារសម្រាប់សមាគម។
លោក ឌុក ពិសិដ្ឋ ប្រធានសមាគមកាហ្វេកម្ពុជាបានប្រាប់សារព័ត៌មាន AMS ឱ្យដឹងថា សមាគមបានធ្វើការងារជាច្រើនជាមួយកាហ្វេ ដែលបច្ចុប្បន្នអាចមានលទ្ធភាពដាំកាហ្វេផ្គត់ផ្គង់តម្រូវការបានប្រមាណជាង ១ ០០០ តោនប៉ុណ្ណោះ ខណៈតម្រូវការមានប្រមាណ ២ម៉ឺនតោនក្នុងមួយឆ្នាំ។ ដូច្នេះ ចាំបាច់មានតម្រូវការនាំចូលពីប្រទេសដទៃ រួមមាន ប្រេស៊ីល កូឡុំប៊ី ជាដើម ប៉ុន្តែប្រទេសដែលសំខាន់ គឺប្រទេសជិតខាង ដូចជា ឡាវ និងវៀតណាម។
លោកប្រធានសមាគម បានបន្ថែមថា ៖
«សមាគមបានលើកទឹកចិត្តកសិករពង្រីកផ្ទៃដីដាំដុះកាហ្វេឱ្យបានច្រើន ដើម្បីអាចកាត់បន្ថយការនាំចូលពីបរទេស និងធ្វើការផ្សព្វផ្សាយ ចែករំលែកបច្ចេកទេសដាំដុះ កែច្នៃ ដែលចង់ឱ្យខេត្តមណ្ឌលគីរីទទួលបានម៉ាកសម្គាល់ភូមិសាស្ត្រ (GI) សម្រាប់ខេត្តតែម្ដង។ យើងមើលឃើញថាដំណាំនេះនឹងផ្តល់ផលចំណេញច្រើន ហើយអនាគត តម្រូវការកាហ្វេនឹងបន្តកើនឡើងជាបន្តបន្ទាប់ និងមិនចង់ពឹងលើទីផ្សារនាំចូលពីក្រៅប្រទេសនោះទេ»។
សូមជម្រាបដែរថា សមស្របក្រសួងកសិកម្ម រុក្ខាប្រមាញ់ និងនេសាទ ជំរុញឱ្យមានការកសាងម៉ាកសមូហភាពសម្រាប់ខេត្តមណ្ឌលគីរីនោះ សមាគមកាហ្វេកម្ពុជា កំពុងមានភាពមមាញឹកក្នុងការពង្រីកផ្ទៃដីដាំដុះដំណាំកាហ្វេនៅតាមបណ្តាខេត្តនានាដែលមានសក្ដានុពល រួមមាន៖ រតនគីរី កំពង់ចាម ត្បូងឃ្មុំ អូរសោម (ពោធិ៍សាត់) កោះកុង(ថ្មបាំង) និងខេត្តមណ្ឌលគិរី ដែលមានដំណាំកាហ្វេច្រើនជាងគេ ។ គិតត្រឹមឆ្នាំ២០២៥ ផ្ទៃដីដាំដុះកាហ្វេនៅកម្ពុជា មានប្រមាណ ៨០០ហិកតាប៉ុណ្ណោះ ប៉ុន្តែនៅក្នុងឆ្នាំ២០២៦ នេះ សមាគមកាហ្វេកម្ពុជា នឹងបង្កើនផ្ទៃដីដាំកាហ្វេបន្ថែមប្រមាណជាង៦០០ហិកតាទៀត ខណៈដែលកម្ពុជាត្រូវការផ្ទៃដីចន្លោះពី ៨០០០ ទៅ ១០ ០០០ ហិកតាទៀត ទើបអាចផ្គត់ផ្គង់គ្រប់តាមតម្រូវការទីផ្សារក្នុងស្រុកបាន៕
Account
Security
Favourite Content