សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមរបាយការណ៍របស់សហព័ន្ធស្រូវអង្ករកម្ពុជាបានឱ្យដឹងថា ក្នុងរយៈពេល៧ខែ ឆ្នាំ២០២៤នេះ កម្ពុជាបានទទួលចំណូលជាទឹកប្រាក់ជាង ២៨០លានដុល្លារ ពីការនាំចេញអង្ករចំនួន ៣៧៩ ៥៤៦ តោនទៅកាន់ទីផ្សារអន្តរជាតិគោលដៅចំនួន ៦៤ ប្រទេស ។
តាមសហព័ន្ធស្រូវអង្ករកម្ពុជាបានបង្ហាញថា ការនាំចេញអង្ករត្រូវបានធ្វើឡើងតាមរយៈក្រុមហ៊ុននាំចេញអង្ករចំនួន ៥៣ ដោយក្នុងរយៈពេល៧ខែនេះ ការនាំចេញទៅកាន់បណ្តាប្រទេសនៅក្នុងតំបន់អឺរ៉ុបចំនួន ២៦ប្រទេស មានចំនួន ១៨៦ ៣៧៧ តោន ទទួលបានទឹកប្រាក់ចំនួន ១៤៤.៩២ លានដុល្លារសហរដ្ឋអាមេរិក សម្រាប់ប្រទេសចិនរួមទាំងហុងកុង និងម៉ាកាវ ចំនួន ៧៧ ២០៤ តោន ទទួលបានទឹកប្រាក់ចំនួន ៤៨.២៨ លានដុល្លារសហរដ្ឋអាមេរិក។
ដោយឡែក សម្រាប់ប្រទេសក្នុងតំបន់អាស៊ាន រួមទាំង ទីម័រខាងកើត ចំនួន ៧ប្រទេស បានបរិមាណ ចំនួន ៧៧ ៩៣៣ តោន ទទួលបានទឹកប្រាក់ចំនួន ៥៣.៥៨ លានដុល្លារសហរដ្ឋអាមេរិក និងទៅកាន់គោលដៅ ២៨ប្រទេសផ្សេងទៀត រួមមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេន ។ល។ បានចំនួន ៣៨ ០៣២ តោន ទទួលបានទឹកប្រាក់ចំនួន ៣៣.១៩ លានដុល្លារសហរដ្ឋអាមេរិក។
ក្នុងចំណោមប្រភេទអង្ករដែលបាននាំចេញ រួមមាន អង្ករក្រអូប អង្ករស អង្ករសម្រូប និងអង្ករសរីរាង្គ។ ក្នុងនោះអង្ករក្រអូបមានចំនួន ៧០.៥២ភាគរយ ប្រភេទអង្ករសធម្មតា ២៤.៣០ភាគរយ អង្ករចំហ៊ុយ ៣.១៦ភាគរយ អង្ករសរីរាង្គចំនួន ១.៧៤ភាគរយ និងអង្ករផ្សេងៗចំនួន ០.២៨ភាគរយ។
សម្រាប់ការនាំចេញស្រូវវិញ ក្នុងរយៈពេល៧ខែនេះ សម្រេចបានទឹកប្រាក់ប្រមាណ ៧៨៤.៦០ លានដុល្លារសហរដ្ឋអាមេរិក ដោយបាននាំចេញស្រូវចំនួន ២ ៧១១ ១៧៩តោន ដែលក្នុងនោះ ៨០.៥០ភាគរយ បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច។
ដោយឡែក ឧកញ៉ា ចាន់ សុខឃាង ប្រធានសហព័ន្ធស្រូវអង្ករកម្ពុជា បានឱ្យដឹងថា កាលពីសប្តាហ៍មុន សហព័ន្ធ (CRF) បានពិភាក្សារវាងសហព័ន្ធស្រូវអង្ករកម្ពុជា និងក្រុមហ៊ុន NTUC FairPrice Group ដែលជាក្រុមហ៊ុនលក់រាយដ៏ធំបំផុតមួយរបស់ប្រទេសសិង្ហបុរី កំពុងដំណើរការ ដើម្បីបង្កើតកិច្ចព្រមព្រៀងផ្គត់ផ្គង់អង្កររយៈពេលវែងក្នុងគោលបំណងបង្កើនការនាំចេញអង្កររបស់កម្ពុជាទៅកាន់ប្រទេសសិង្ហបុរី។
បើតាម CRF កិច្ចពិភាក្សានេះត្រូវបានធ្វើឡើងដើម្បីបង្កើតផែនការភាពជាដៃគូរយៈពេលវែងសម្រាប់ការផ្គត់ផ្គង់អង្ករដែលជាផ្នែកមួយនៃសន្តិសុខស្បៀងដល់ប្រទេសសិង្ហបុរី។ប្រសិនបើទទួលបានជោគជ័យ កិច្ចសហប្រតិបត្តិការរយៈពេលវែងរវាងកម្ពុជា និងសិង្ហបុរី អាចធ្វើជាគំរូសម្រាប់ពាណិជ្ជកម្មកសិកម្មនៅក្នុងតំបន់ ហើយក៏នឹងរួមចំណែកដល់កិច្ចខិតខំប្រឹងប្រែងរបស់កម្ពុជា ក្នុងការធ្វើពិពិធកម្មទីផ្សារនាំចេញរបស់ខ្លួន និងកាត់បន្ថយការពឹងផ្អែកលើដៃគូពាណិជ្ជកម្មប្រពៃណី។
ប្រទេសសិង្ហបុរី ដែលមានដីធ្វើកសិកម្មតិច និងពឹងផ្អែកយ៉ាងខ្លាំងលើការនាំចូលដើម្បីបំពេញតម្រូវការអាហារ ភាគីទាំងពីរកំពុងរិះរកមធ្យោបាយ ដើម្បីពង្រីកពាណិជ្ជកម្ម និងជំរុញភាពជាដៃគូប្រកបដោយនិរន្តរភាព។
សូមជម្រាបថា NTUC FairPrice គឺជាបណ្តាញផ្សារទំនើបដ៏ធំបំផុតនៅក្នុងប្រទេសសិង្ហបុរី។ ក្រុមហ៊ុននេះគឺជាសហករណ៍នៃសមាជសហជីពជាតិ (NTUC)។ ក្រុមនេះមានផ្សារទំនើបជាង១០០ នៅទូទាំងកោះ ជាមួយនឹងហាងលក់ទំនិញជាង១៦០ ទីតាំង៕
Account
Security
Favourite Content