សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បច្ចុប្បន្ននេះ ដើមចេកចាស់ៗ ឬដើមចេកដែលកាប់យកផ្លែរួចរាល់ត្រូវបានគេយកទៅកែច្នៃ ហូតយកសរសៃផលិតជាសម្ភារប្រើប្រាស់ប្រចាំថ្ងៃ មិនប៉ះពាល់បរិស្ថាន ក៏ដូចជាគ្រឿងតាំងលម្អរផ្សេងៗ ដែលមានភាពស្វិតជាប់បានយូរ មិនខុសពីកំប្លោក ស្លឹកជ្រែ ឬស្លឹកទ្រាំងនោះឡើយ។
នៅក្នុងខេត្តបាត់ដំបងឯណោះ ស្រ្តីជាគ្រូបង្រៀនម្នាក់បានផ្ដើមធ្វើអាជីវកម្មច្នៃស្រទបចេកទៅជាកាបូប ដោយមានជំនួនពីប្អូនប្រុស។ នៅពេលចាប់ផ្ដើមដំបូង ពោលគឺក្នុងអំឡុងឆ្នាំ២០២១ គ្រូបង្រៀនរូបនេះមិនមានបំណងធំដុំអ្វីនៅឡើយទេ ដោយគ្រាន់តែចង់ធ្វើលក់តូចតាច តាមរយៈការបង្ហោះតាមបណ្ដាញសង្គមប៉ុណ្ណោះ។ ប៉ុន្តែដោយសារតែជំងឺកូវីដចាប់រីករាលដាល ដែលធ្វើឲ្យប្រជាជនស្ទើរតែគ្រប់គ្នាប្រើប្រាស់អ៊ីនធឺណេត ដើម្បីប្រាស្រ័យទាក់ទង និងដើម្បីការកម្សាន្ដនោះ កាបូបធ្វើពីដើមចេករបស់កញ្ញាក៏ចាប់ផ្ដើមទទួលបានការចាប់អារម្មណ៍ជាខ្លាំង និងមានអ្នកសួររកជាច្រើននាក់។ ដោយមូលហេតុនេះ កញ្ញាបានចាប់ផ្ដើមពង្រីកអាជីវកម្មរបស់ខ្លួនបន្តិចម្ដងៗរហូតបង្កើតជាសិប្បកម្ម មួយតែម្ដងដែលគ្រូបង្រៀននៃវិទ្យាល័យភ្នំសំពៅរូបនេះដាក់ឈ្មោះថា សិប្បកម្មអនុសារ។
កញ្ញាបានបញ្ជាក់ឲ្យដឹងជាលំអិតថា ៖
“តាមពិតទៅខ្ញុំជាគ្រូពិតមែន តែខ្ញុំចិញ្ចឹមចិត្តចង់មានអាជីវកម្មផ្ទាល់ខ្លួន១គឺចង់មានអាជីវកម្មដែលជួយដល់សង្គម លុះពេលមួយប្អូនខ្ញុំគាត់ចូលចិត្តច្នៃរបស់របរជុំវិញផ្ទះគាត់ចេះច្នៃដើមចេកធ្វើកន្ត្រកទៅចម្ការ ថ្ងៃមួយខ្ញុំទៅភ្នំពេញមកវិញឃើញគាត់ច្នៃកន្ត្រកដ៏ស្អាត១ចំពេលដែលគេល្បីរឿងច្នៃកំប្លោកទៅជាកាបូប ហើយខ្ញុំក៏នឹកឃើញចង់ឲ្យគាត់ច្នៃកាបូបចេកទៅចូលរួមមង្គលការគេ ដល់ពេលយកទៅដល់ខ្ញុំថតបង្ហោះលេងក៏មានគេចាប់អារម្មណ៍ច្រើន ហើយខ្ញុំឲ្យប្អូនច្នៃមកខ្ញុំតុបតែងបន្ថែមឲ្យគេ។”
ដោយឡែក ដើម្បីឲ្យអាជីវកម្មដើរទៅមុខទន្ទឹមនឹងគុណភាពដែរនោះ កញ្ញាបានទៅរៀនបន្ថែមជាមួយក្រុមហ៊ុន C-Investment ព្រមទាំងទទួលបានកញ្ចប់ជំនួយដើម្បីអាចដំណើរការអាជីវកម្មបានមកដល់ពេលនេះ។ ម្យ៉ាងទៀត ដោយសារតែតំបន់របស់កញ្ញា សម្បូរកសិករដាំដុះដើមចេកស្រាប់ ហើយត្រូវនឹងដំណាំប្រភេទនេះ ទាមទារឲ្យកសិករកាប់ចោល ក្រោយពីប្រមូលផលបានម្ដង ការកែច្នៃដើមចេកគឺជាវិធីដ៏ល្អមួយក្នុងការប្រើប្រាស់ធនធានឲ្យអស់ពីលទ្ធភាព។ យ៉ាងណាមិញ ដំណើរការក្នុងការផលិតរហូតបានចេញជាកាបូបមួយគឺមានភាពស្មុគស្មាញ និងត្រូវការពេលយូរ។
កញ្ញា ឆាប សុឃឿប បានឲ្យដឹងថា ៖
“ផលវិបាកវិញ គឺមានផលវិបាកច្រើន ដោយដំបូងគឺយើងត្រូវកាប់ដើមចេក ហើយត្រូវការពេលវេលាក្នុងការហាលវា និងអាស្រ័យលើអាកាសធាតុទៅទៀត បើសិនជាមេឃស្រទំៗនោះពណ៌ដើមចេកគឺមិនសូវស្អាតទេ លុះពេលហាលស្ងួតហើយ យើងច្រៀកវាទៅតាមទំហំដែលយើងចង់ច្នៃ ឬត្បាញ និយាយរួមសម្រាប់កាបូបសម្រាប់ញុំាការមួយអាចត្រូវការពេលពី ៣ទៅ៥ថ្ងៃឯណោះ។”
សម្រាប់ទីផ្សារវិញ មកដល់សព្វថ្ងៃនេះ កញ្ញាមានទាំងអតិថិជនទិញរាយ មានទាំងអតិថិជនទិញយកទៅបោះដុំបន្ត មានទាំងសិស្សនិស្សិត និងស្ត្រីៗដែលនិយមប្រើកាបូបចេកទៅញុំាការ។ ក្រៅពីនោះ កញ្ញាក៏តែងនាំយកអាជីវកម្មរបស់ខ្លួនទៅចូលរួមជាមួយកម្មវិធីជំរុញផលិតផលខ្មែរ ឬកម្មវិធីជាតិផ្សេងទៀត ហើយក៏ទទួលបានការចាប់អារម្មណ៍ពីសំណាក់ប្រជាពលរដ្ឋខ្មែរយើងច្រើនគួរសមផងដែរ។ ជាចុងក្រោយ កញ្ញាបានសំណូមពរឲ្យប្រជាជនកម្ពុជាជួយគាំទ្រផលិតផលក្នុងស្រុក ថ្វីត្បិតតែតម្លៃខ្ពស់បន្តិចមែន ប៉ុន្តែវាជាការធ្វើដោយដៃ ដែលទាមទារឱ្យមានការផ្ចិតផ្ចង់មែនទែន។ ម្យ៉ាងទៀត ក៏ដើម្បីបង្ហាញពីការគាំទ្រ ដើម្បីបើកផ្លូវឲ្យផលិតផលក្នុងស្រុកបានកកើតឡើងកាន់តែទូលាយផងដែរ៕
Account
Security
Favourite Content