ភ្នំពេញ ៖ វិថីហិរញ្ញវត្ថុ ឬ Financial Street ត្រូវបានគេស្គាល់យ៉ាងទូលំទូលាយថាជាកម្មវិធីមួយដ៏សំខាន់ដែលត្រូវបានបង្កើតឡើងក្នុងគោលបំណងចូលរួម ផ្សព្វផ្សាយ និងចែករំលែកនូវចំណេះដឹងផ្នែកហិរញ្ញវត្ថុដល់សាធារណៈជនគ្រប់ស្រទាបនៅក្នុងសង្គម ទាំងការសន្សំ ការប្រើប្រាក់កម្ចីប្រកបដោយភាពឆ្លាតវៃ ការ គ្រប់គ្រងបំណុល ការៀបចំផែនការហិរញ្ញវត្ថុ ក៏ដូចជាចំណេះដឹងលើការវិនិយោគ ជាមួយនឹងការកំណត់គោលដៅ និងចក្ខុវិស័យច្បាស់លាស់ដើម្បីកាត់បន្ថយនូវ អក្ខរកម្មហិរញ្ញវត្ថុនៅកម្ពុជា។

ជាមួយនឹងការទទួលស្គាល់ និងសាទរពីសំណាក់សាធារណៈជន ក៏ដូចជាសិស្ស-និស្សិតជាច្រើន ក្រុមហ៊ុន អប្សរា មេឌា ស៊ីរីស (AMS) ក្រោមកិច្ចសហការផលិត ជាមួយសមាគមធនាគារនៅកម្ពុជា (ABC) សមាគមមីក្រូហិរញ្ញវត្ថុកម្ពុជា (CMA) ក្រុមហ៊ុន ក្រេឌីត ហ្សូរ៉ូ ខេមបូឌា (CBC) ជាពិសេស ការគាំទ្រពីធនាគារជាតិនៃ កម្ពុជា (NBC) នោះ បច្ចុប្បន្ននេះ កម្មវិធី «វិថីហិរញ្ញវត្ថុ» រដូវកាលទី៣ បាន និងកំពុងបន្តបេសកកម្មរបស់ខ្លួនក្រោមវត្តមានសហការពីសំណាក់អ្នកជំនាញហិរញ្ញវត្ថុជាច្រើននរូប។

កញ្ញា នី ស្រីលីន ជានិស្សិតនៅសកលវិទ្យាល័យ ជាតិគ្រប់គ្រង បានប្រាប់ឱ្យដឹងថា កញ្ញា គឺជាអ្នកគាំទ្រ និងតាមដានមើលកម្មវិធី វិថីហិរញ្ញវត្ថុ រហូតមក ព្រោះអាចទទួលបានចំណេះដឹងជាច្រើនពីកម្មវិធី។

កញ្ញាបានបញ្ជាក់ថា ៖ «ប្រទេសជាតិមួយអាចរីកចម្រើនទៅបាន គឺអាស្រ័យទៅលើកត្តាជាច្រើន ហើយកត្តាដែលសំខាន់មួយក្នុងនោះគឺកត្តាប្រជាពលរដ្ឋ កាលណាប្រជាពលរដ្ឋមានចំណេះដឹងហិរញ្ញវត្ថុ ធ្វើឲ្យគាត់ជៀសផុតពីបំណុលលើសលប់។ កាលណាបុគ្គលមានចំណេះដឹងហិរញ្ញវត្ថុ ធ្វើឲ្យជីវភាពគ្រួសារគាត់រីកចម្រើនផ្នែកហិរញ្ញវត្ថុ, គ្រួសារនីមួយៗកាន់តែរីកចម្រើនផ្នែកហិរញ្ញវត្ថុ ធ្វើឲ្យសហគមន៍មួយរីកចម្រើន នាំឲ្យប្រទេសជាតិក៏រីកចម្រើនដូចគ្នា»។

លោក ស៊ាន ធនិន អគ្គនាយកផ្នែកលក់ និងចែកចាយនៃធនាគារហត្ថា បានបញ្ចេញទស្សនៈថា ៖ «ខ្ញុំគិតថា ចំណេះដឹងផ្នែកហិរញ្ញវត្ថុវាពិតជាសំខាន់ ដោយសារតែចំណេះដឹងហិរញ្ញវត្ថុ និងចំណេះដឹងពីលុយ ជាចំណេះដែលចូលរួមនៅក្នុងដំណើរជីវិតយើងទាំងមូល។ ដូច្នេះហើយ ខ្ញុំយល់ឃើញថា ការស្វែងយល់ ការចេះដឹងអំពីហិរញ្ញវត្ថុ គឺវាពិតជាបានរួមចំណែកទៅដល់ដំណើរវិវត្តន៍ និងការរីកចម្រើនទៅដល់បុគ្គល គ្រួសារ និងសង្គមជាតិ»។

លោកស្រី ម៉ក់ រស្មី អគ្គនាយករងបទប្បញ្ញត្តិ និងបរិយាបន្នហិរញ្ញវត្ថុ និងជាប្រធាននាយកដ្ឋានបទប្បញ្ញត្តិនៃធនាគារជាតិនៃកម្ពុជា បានថ្លែងថា ការចូលរួមរបស់ក្រុម ហ៊ុន អប្សរា មេឌា សឺវីស ដែលជាក្រុមហ៊ុនសារព័ត៌មានប្រកបដោយប្រជាប្រិយភាព ការច្នៃប្រឌិត និងការទុកចិត្តខ្ពស់ពីសំណាក់សាធារណជនទូទៅ រួមផ្សំនឹងការ ប្រើប្រាស់បច្ចេកវិទ្យាព័ត៌មាន និងទំនាក់ទំនង (ICT) បណ្តាញសង្គមនានា ពិតជាកំលាំងចលករយ៉ាងសំខាន់ក្នុងការជួយដល់សាធារណជនទទួលបាននូវព័ត៌មាន ផ្លូវការដែលអាចជឿទុកចិត្តបាន សំដៅធ្វើការសម្រេចចិត្តកាន់តែប្រសើរលើការប្រើប្រាស់ផលិតផល និងសេវាហិរញ្ញវត្ថុប្រកបដោយសុវត្ថិភាព និងប្រសិទ្ធភាពខ្ពស់។

លោកស្រី ម៉ក់ រស្មី បានមានប្រសាសន៍សង្កត់ធ្ងន់ថា កន្លងមកក្នុងនាមស្ថាប័នដឹកនាំមួយក្នុងការអនុវត្តយុទ្ធសាស្ត្រនានា ធនាគារជាតិនៃកម្ពុជា បាន និងកំពុងយក ចិត្តទុកដាក់លើការលើកកម្ពស់ចំណេះដឹងផ្នែកហិរញ្ញវត្ថុដល់ក្រុមគោលដៅ និងសាធារណជនទូទៅ តាមរយៈកិច្ចសហការជាមួយក្រសួង-ស្ថាប័ន ភាគីពាក់ព័ន្ធជាតិ និងអន្តរជាតិ និងដៃគូអភិវឌ្ឍន៍នានាក្នុងការអនុវត្តសកម្មភាពសំខាន់ជាច្រើន។

សូមជម្រាបផងដែរថា តាមរយៈកម្មវិធី «វិថីហិរញ្ញវត្ថុ» រដូវកាលទី ៣ នេះ មិនត្រឹមតែជាវេទិកាបង្កើនការយល់ដឹងកាន់តែទូលំទូលាយអំពីសារៈសំខាន់នៃចំណេះដឹង ផ្នែកហិរញ្ញវត្ថុសម្រាប់សាធារណជនប៉ុណ្ណោះទេ ប៉ុន្តែក៏សម្រាប់គ្រឹះស្ថានធនាគារ, គ្រឹះស្ថានមីក្រូហិរញ្ញវត្ថុ និងអ្នកពាក់ព័ន្ធផ្សេងទៀត ដើម្បីកែលម្អចំណេះដឹងផ្នែក ហិរញ្ញវត្ថុឱ្យកាន់តែល្អប្រសើរផងដែរ៕