ភ្នំពេញ៖ នាថ្ងៃដើមសប្ដាហ៍នេះ ពិធីសែនចូលឆ្នាំថ្មីប្រពៃណីជនជាតិចិន-វៀតណាម នឹងមកដល់ ដែលជាឱកាសល្អសម្រាប់បងប្អូនប្រជាកសិករដាំដំណាំ ក៏ដូចជាអាជីវករដែលជាអ្នកទទួលទិញពីកសិករយកមកលក់បន្តយកចំណេញនៅលើទីផ្សារ។ ជាការកត់ ក្នុងចំណោមប្រភេទបន្លែដែលត្រូវបានដាក់លក់នៅលើទីផ្សារក្នុងឱកាសពិធីបុណ្យប្រចាំឆ្នាំរបស់ជនជាតិចិន- វៀតណាម ក៏ដូចជាប្រជាជនខ្មែរដែលមានជាប់សែស្រឡាយ ឬកូនកាត់នេះ មានច្រើនប្រភេទ ប៉ុន្តែ បន្លែដែលាមតម្រូវការខ្ពស់ជាងគេនោះគឺបន្លែខាត់ណាដើម និងម់មឆៃថាវ ខណៈដែលតម្លៃក៏ទទួលបានល្អជាងថ្ងៃធម្មតា។

អ្នកស្រី យឿន រី ជាអាជីវករលក់បន្លែមួយរូបនៅផ្សារនាគមាស រាជធានីភ្នំពេញ បានឱ្យដឹងថា ចំពោះខាត់ណាដើម ភាគច្រើនត្រូវបានគេប្រើសម្រាប់ធ្វើម្ហូបប្រភេទឆាជាច្រើនមុខ និងមុខម្ហូបស្ងោរចាប់ឆាយជាដើម ​ដែលកាន់តែជួយបង្កើនរសជាតិយ៉ាងឈ្ងុយឆ្ងាញ់។ រាល់ឆ្នាំឱ្យតែជិតដល់បុណ្យចូលឆ្នាំចិន បន្លែខាត់ណាដើមត្រូវបានបងប្អូនដែលជាអ្នកមានជាប់សែស្រឡាយចិន-វៀតណាម និយមទិញច្រើនជាងថ្ងៃធម្មតា។

អ្នកស្រីបញ្ជាក់ថា ៖

«សម្រាប់ឱកាសពិធីបុណ្យចូលឆ្នាំចិនឆ្នាំនេះ បន្លែខាត់ណាដើមមានតម្រូវការខ្ពស់ដូចរាល់ឆ្នាំ ប៉ុន្តែតម្លៃមិនថ្លៃពេកនោះទេ ពោលគឺប្រហាក់ប្រហែលឆ្នាំមុន ដោយកន្លែងខ្លះអាចលក់បានក្នុងតម្លៃចាប់ពី ១ម៉ឺន ៥ពាន់ ទៅ ១ម៉ឺន ៨ពាន់រៀល ហើយកន្លែងខ្លះទៀតដែលមានដើមល្អអាចលក់បានដល់ទៅ ២ម៉ឺនរៀល ក្នុងខាត់ណា ទម្ងន់ ១០គីឡូក្រាម។ ដោយឡែក ចំពោះចំនួនលក់វិញ ខ្ញុំអាចលក់បានប្រមាណ ២០០ ទៅ ៣០០គីឡូក្រាមក្នុងមួយថ្ងៃ ខណៈដែលថ្ងៃធម្មតាគ្មានបុណ្យទាន អាចលក់បានប្រមាណ ១០០គីឡូក្រាមតែប៉ុណ្ណោះ»។

អ្នកស្រី  រិទ្ធ ចន្ថា ប្រធានក្រុមប្រឹក្សា ​ឃុំទឹកហូត ខេត្តកំពង់ឆ្នាំង បានឱ្យដឹងថា សហគមន៍អ្នកស្រីបានដាំខាត់ណាដើមនៅក្នុងផ្ទះសំណាញ់ច្រើនគួរសម ដែលអាចប្រមូល​ផល និងលក់បានចំនួនប្រមាណ៨០០គីឡូក្រាម​ទៅឱ្យផ្សារទំនើប ម៉ាត ក្នុងតម្លៃ ៤០០០រៀលក្នុង១គីឡូក្រាម ស្មើនឹងទឹកប្រាក់សរុបប្រមាណ ៣លាន ២សែនរៀល។

 អ្នកស្រី  រិទ្ធ ចន្ថា បានបញ្ជាក់ថា ៖ «ខាត់ណាដើម លក់បានតម្លៃ៤០០០រៀលក្នុង១គីឡូក្រាម វាថ្លៃជាងខាត់ណាដែលដាំក្រៅផ្ទះសំណាញ់ ប៉ុន្តែបើនិយាយពីប្រាក់ចំណេញ គឺមិនច្រើនទេ ព្រោះត្រូវចំណាយលើការដាំដុះច្រើនគួរសម គ្រាន់តែថាយើងមិនសូវបារម្ភពីរឿងអត់ទីផ្សារ »។

សូមជម្រាបdErថា ខុសពីកន្លែងលក់បោះដុំនៅផ្សារនាគមាស  បន្លែខាតណាដើម ដែលលក់រាយនៅផ្សារមួយចំនួនក្នុងភ្នំពេញ ដូចជា ផ្សារសាមគ្គី ទួលគោក ផ្សារ ៧មករា ត្រូវបានអាជីវករដាក់លក់រាយក្នុងតម្លៃរហូតដល់ ៥០០០រៀលក្នុង១គីឡូក្រាម។

អ្នកស្រី សុខចាន់ អាជីវករលក់បន្លែគ្រប់មុខនៅផ្សារទួលគោក រាជធានីភ្នំពេញ បានឱ្យដឹងថា៖ ខាត់ណាដើម ដែលអ្នកស្រីដាក់លក់គឺតម្លៃ ៤០០០រៀលក្នុង១គីឡូក្រាម ។ អ្នកស្រីបញ្ជាក់ឱ្យដឹងដែរថា ខាត់ណាដើម កាលពីប៉ុន្មានថ្ងៃមុន បើលក់ត្រឹម ៤០០០- ៥០០០រៀល ក្នុងមួយគីឡូក្រាម គឺមិនពិបាកលក់ទេ ប៉ុន្តែសម្រាប់ថ្ងៃនេះ ឬថ្ងៃសែនចូលឆ្នាំចិនតែម្ដង តម្លៃខាត់ណាដើមអាចធ្លាក់ចុះ ពីព្រោះមានការសម្រុកនាំចូលទីផ្សារច្រើន ដែលធ្វើឱ្យខាត់ណាដើមនៅសល់ច្រើន។

ងាកមកចាប់អារម្មណ៍នឹងប្រភេទមើនឆៃថាវវិញ ក៏ជាប្រភេទបន្លែពេញនិយមក្នុងពិធីបុណ្យសែនចូលឆ្នាំចិនដែរ ដោយគេយកធ្វើជាជ្រក់ឆៃថា និងជាបន្លែនៅក្នុងមុខម្ហូបសម្លរចាប់ឆាយ ក៏ដូចជាមុខម្ហូបស្ងោរផ្សេងៗទៀត។

អ្នកស្រី ចាន់ ឌីណា អាជីវករលក់បន្លែឆៃថាវ នៅផ្សារនាគមាស បានឱ្យដឹងថា ចំពោះបន្លែឆៃថាវ ភាគច្រើនត្រូវបានគេប្រើសម្រាប់ធ្វើម្ហូបប្រភេទស្ងោរនៅក្នុងពិធីសែនចូលឆ្នាំចិន ​ដោយអ្នកស្រីលក់បោះដុំក្នុងតម្លៃ ២០០០រៀលក្នុងមួយគីឡូក្រាម ហើយក្នុងរយៈពេល ២-៣ថ្ងៃចុងក្រោយនេះ អាចលក់បានក្នុងចន្លោះប្រមាណ ១៥០​-២០០គីឡូក្រាម ក្នុង១ថ្ងៃ ខណៈដែលថ្ងៃធម្មតាត្រឹម ១០០គីឡូក្រាម ស្ទើរតែលក់មិនអស់ផង។

ដោយឡែក សម្រាប់អ្នកស្រី សុខចាន់ ដែលជាអាជីវករទទួលទិញបន្លែបោះដុំច្រើនមុខពីផ្សារនាគមាស ហើយយកទៅលក់រាយបន្តយកចំណេញនៅផ្សារទួលគោក រាជធានីភ្នំពេញ បានឱ្យដឹងថា៖ ចំពោះប្រភេទបន្លែឆៃថាវនៅថ្ងៃធម្មតា អ្នកស្រីអាចលក់រាយក្នុងតម្លៃ ៣៥​០​០-៤៥០០រៀលក្នុង១គីឡូក្រាម ប៉ុន្តែជិតចូលដល់ថ្ងៃសែនឆ្នាំចិន តម្លៃបានចុះថោកបន្តិច ប៉ុន្តែអាចលក់បានច្រើនជាងថ្ងៃធម្មតា៕