ភ្នំពេញ៖ ដោយសម្លឹងឃើញឱកាសពាណិជ្ជកម្ម និងសក្តានុពលសេដ្ឋកិច្ច ក្រុមហ៊ុនយក្សមួយរបស់ប្រទេសចិនបានសម្រេចចិត្តមកវិនិយោគនៅប្រទេសកម្ពុជាតាមរយៈបង្កើតមជ្ឈមណ្ឌលតាំងបង្ហាញរថយន្ត និងនាំចូលរថយន្តអគ្គិសនីទំនើបៗមកកម្ពុជា។ ការវិនិយោគរបស់វិនិយោគិនចិននាពេលនេះ ស្របពេលរដ្ឋាភិបាលកម្ពុជាកំពុងយកចិត្តទុដាក់ជំរុញវិស័យរថយន្តអេឡិចត្រូនិក ខណៈវិស័យនេះកំពុងដើរទៅមុខ។

ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ថ្លែងក្នុងពិធីបើកសម្ពោធមជ្ឈមណ្ឌលតាំងបង្ហាញរថយន្ត ZEEKR (ហ្ស៊ីគ) នៅរាជធានីភ្នំពេញ នាពេលថ្មីៗនេះថា៖ ទន្ទឹមនឹងភាពរីកចម្រើនឥតឈប់ឈរនៃបច្ចេកវិទ្យាសកល ឧស្សាហកម្មរថយន្តក៏កំពុងមានការផ្លាស់ប្ដូរជាបន្តបន្ទាប់ ជាពិសេសរថយន្តដែលប្រើបច្ចេកវិទ្យាឆ្លាតវៃ និងប្រើប្រាស់ថាមពលអគ្គិសនី។ ការវិនិយោគរបស់ក្រុមហ៊ុន វ័នរ៉ូដ គ្រុប ជាការបោះជំហានដ៏សំខាន់មួយទៀតនៃទីផ្សាររថយន្តនៅក្នុងប្រទេសកម្ពុជា។ ការមកដល់របស់រថយន្ត ZEEKR នឹងធ្វើឱ្យទីផ្សាររថយន្តថ្មីនៅកម្ពុជាកាន់តែមានភាពសម្បូរបែប និងចូលរួមជំរុញការអភិវឌ្ឍវិស័យរថយន្តថាមពលថ្មីឱ្យកាន់តែរីកចម្រើន​ខ្លាំងឡើង រួមទាំងផ្តល់ឱ្យប្រជាជនកម្ពុជានូវជម្រើសថ្មីៗ និងប្រកបដោយភាពទំនើបក្នុងការធ្វើដំណើរ។

ឯកឧត្តមរដ្ឋមន្ត្រីបានមានប្រសាសន៍ថា៖ ការនាំចូលរថយន្តអគ្គិសនីនេះ មិនត្រឹមតែអាចកាត់បន្ថយការប្រើប្រាស់លើឥន្ធនៈហ្វូស៊ីល និងកាត់បន្ថយការបំភាយឧស្ម័នកាបូនប៉ុណ្ណោះទេ ប៉ុន្តែសំខាន់ជាងនេះទៅទៀត វាក៏រួមចំណែកនៅក្នុងការពង្រីកមធ្យោបាយធ្វើដំណើរបៃតងនៅកម្ពុជា និងពិភពលោកផងដែរ។ លោកជឿជាក់ថា នាពេលអនាគត ប្រជាជនកម្ពុជាកាន់តែច្រើនឡើងនឹងពិចារណាប្តូរមកប្រើប្រាស់រថយន្តអគ្គិសនី និងចូលរួមថែរក្សាបរិស្ថានដូចជារថយន្ត ZEEKRនេះ ។

ឯកឧត្តមរដ្ឋមន្ត្រីក្រសួងពត៌មាន បានគូសបញ្ជាក់ថា៖

«រាជរដ្ឋាភិបាលកម្ពុជាតែងតែយកចិត្តទុកដាក់ខ្លាំងចំពោះកិច្ចការពារបរិស្ថាន គំនិតច្នៃប្រឌិតថ្មីៗ និងលើកទឹកចិត្តដល់ការប្រើប្រាស់បច្ចេកវិទ្យាទំនើបដើម្បីផលិតបានផលិតផលមានគុណភាពខ្ពស់ ផ្តល់ឱ្យប្រជាជននូវជម្រើសមធ្យោបាយធ្វើដំណើរប្រកបដោយភាពឆ្លាតវៃ និងបែបផែនបៃតង។ ជាក់ស្តែង រាជរដ្ឋាភិបាលបាន និងកំពុងអនុវត្តយុទ្ធសាស្រ្តអភិវឌ្ឍន៍រយៈពេលវែងប្រកបដោយអព្យាក្រឹតកាបូន ដើម្បីកាត់បន្ថយការបញ្ចេញឧស្ម័នពីវិស័យថាមពល ការដឹកជញ្ជូន ការលើកកម្ពស់ប្រសិទ្ធភាពថាមពល និងចូលរួមបង្កើនការងារបន្ថែមប្រមាណ ៤៤៩ ០០០កន្លែងនៅឆ្នាំ២០៥០»។

ឯកឧត្តម បានមានប្រសាសន៍បញ្ជាក់បន្ថែមថា ៖ រាជរដ្ឋាភិបាលកម្ពុជាទើបបានដាក់ចេញនូវគោលនយោបាយជាតិស្តីពីការអភិវឌ្ឍន៍យានយន្តអគ្គិសនី ២០២៤-២០៣០ ដើម្បីជំរុញគាំទ្រការអភិវឌ្ឍវិស័យយានយន្តអគ្គិសនីនៅកម្ពុជា និងការប្រើប្រាស់រថយន្តអគ្គិសនី ព្រមទាំងទាក់ទាញវិនិយោគិនឱ្យមកបណ្តាក់ទុនក្នុងវិស័យនេះ។

យោងតាមតួលេខរបស់ក្រសួងសាធារណការ និងដឹកជញ្ជូន ការចុះបញ្ជីយានយន្តអគ្គិសនីមានការកើតឡើងជារៀងរាល់ថ្ងៃ ដោយគិតមកដល់ពេលនេះ ការចុះបញ្ជីផ្លូវការមានចំនួនសរុបជិត៣ពាន់គ្រឿង។

ឯកឧត្តម នេត្រ ភក្ត្រា បានលើកទឹកចិត្តឱ្យក្រុមហ៊ុនបន្តប្រកាន់ខ្ជាប់នូវគោលគំនិតនៃការបង្កើតថ្មី និងការអភិវឌ្ឍប្រកបដោយនិរន្តរភាព និងរួមចំណែកបន្ថែមទៀតដល់ឧស្សាហកម្មបៃតងរបស់ប្រទេសកម្ពុជា។

បើតាមលោក ខេវិន ឡ (Kevin Luo) ប្រធាននាយកប្រតិបត្តិ និងជាស្ថាបនិកក្រុមហ៊ុន One Road Group បានលើកឡើងថា ៖ រថយន្តម៉ាក ZEEKR ចាប់ផ្តើមផលិតនៅឆ្នាំ២០២១ និងវិនិយោគទឹកប្រាក់ជាង ២០ពាន់លានយ័ន ហើយបាននាំចេញជាង ២៨ម៉ឺនគ្រឿងទៅកាន់ប្រទេសថៃ មីយ៉ាន់ម៉ា ហ្វីលីពីន ហើយនៅឆ្នាំនេះនាំមកកម្ពុជា សិង្ហបុរី ម៉ាឡេស៊ី ឥណ្ឌូនេស៊ី និងវៀតណាម ហើយនាពេលអនាគតនឹងនាំចូលទៅកាន់បណ្តាប្រទេសអាស៊ាន៕