ភ្នំពេញ៖ យោងតាមឯកឧត្តម ឃឹម ហ្វីណង់ បានបង្ហោះលើបណ្តាញហ្វេសប៊ុកកាលពីថ្មីៗនេះបានឱ្យដឹងថា អង្ករក្រអូបកម្ពុជា«ពូជសែនក្រអូប០១»បានឈ្នះពានរង្វាន់មាសប្រចាំឆ្នាំ២០២៤ ពីប្រទេសចិន ស្របពេលដែលអង្ករក្រអូបប្រណិតកម្ពុជាម៉ាក « ម្លិះអង្គរ » «ពូជផ្ការំដួល» ទើបតែទទួលបានពានរង្វាន់«អង្ករល្អប្រណិតផ្តាច់គេលើពិភពលោក» ជាលើកទី៦ ក្នុងកម្មវិធី « សន្និសីទស្រូវអង្ករពិភពលោកឆ្នាំ២០២៤ » ( World Best Rice ) នៅប្រទេសហ្វីលីពីន កាលពីថ្ងៃទី៧ ខែវិច្ឆិកា ឆ្នាំ២០២៤។

ឯកឧត្តម ឃឹម ហ្វីណង់ បានអបអរសាទរអង្ករក្រអូបកម្ពុជា«ពូជសែនក្រអូប០១»បានឈ្នះពានរង្វាន់មាសប្រចាំឆ្នាំ២០២៤ពីប្រទេសចិន ដោយឯកឧត្តមបានលើកឡើងពីអង្ករក្រអូប«ពូជសែនក្រអូប០១»ធ្លាប់បានឈ្នះពានរង្វាន់មាសនេះម្តងរួចមកហើយកាលពីឆ្នាំ២០២៣ ពីកម្មវិធី«វាយតម្លៃគុណភាពរសជាតិប្រភេទអង្ករសគ្រាប់វែងចិន-អាស៊ាន» រៀបចំឡើងដោយវិទ្យាស្ថានវិទ្យាសាស្ត្រស្រូវនៃបណ្ឌិតសភាវិទ្យាសាស្ត្រកសិកម្មនៅក្នុងប្រទេសចិន។

សូមជម្រាបថា អង្ករម៉ាកស​មូហភាព SKO ពូជសែនក្រអូប ០១ បានឈ្នះពានរង្វាន់មាសនៅក្នុងកម្មវិធីវាយតម្លៃគុណភាព រសជាតិ ប្រភេទអង្ករសគ្រាប់វែង ចិន-អាស៊ាន លើកទី២ ដែលកម្មវិធីនេះរៀបចំឡើងដោយវិទ្យាស្ថានវិទ្យាសាស្ត្រស្រូវនៃបណ្ឌិតសភាវិទ្យាសាស្ត្រកសិកម្មខេត្ត Guangxi និងមណ្ឌលការគ្រប់គ្រងគ្រាប់ពូជនៃតំបន់ស្វយ័ត Guangxi Zhuang របស់ប្រទេសចិន នៅថ្ងៃទី៨ ខែវិច្ឆិកា ឆ្នាំ២០២៤។

ក្រសួងកសិកម្ម បានអបអរសាទរដល់អ្នកពាក់ព័ន្ធទាំងអស់នៅក្នុងខ្សែច្រវាក់តម្លៃនៃអង្ករក្រអូបកម្ពុជា សម្រាប់លទ្ធផលដ៏គួរឱ្យរីករាយផ្ទួនៗគ្នានេះ! ដោយសង្ឃឹមថាការទទួលស្គាល់ពីពានរង្វាន់កម្រិតអន្តរជាតិដ៏ល្បីល្បាញទាំងនេះ នឹងបង្កើនកិត្តិស័ព្ទរបស់អង្ករក្រអូបកម្ពុជាកាន់តែខ្លាំង ជួយពង្រីកទីផ្សារអង្ករក្រអូបឱ្យកាន់តែទូលំទូលាយ ទទួលបានតម្លៃកាន់តែប្រសើរ ព្រមទាំងលើកទឹកចិត្តឱ្យកសិករខ្មែរឱ្យងាកមកដាំពូជយុទ្ធសាស្ត្រមួយនេះកាន់តែច្រើន។

ជាក់ស្តែងទីផ្សារ និងតម្លៃសម្រាប់ស្រូវផ្ការំដួល ដែលបានផ្តើមប្រមូលផលជាបណ្តើរៗទទួលបានតម្លៃល្អ។ នេះបើតាមការឱ្យដឹងពីឯកឧត្តម យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។

ឯកឧត្តម យ៉ង សាំងកុមារ រដ្ឋលេខាធិការ បានទៅជួបកសិករប្រើប្រាស់ពូជសុទ្ធផ្ការំដួល តាមរយៈការសម្របសម្រួលដោយមន្រ្តីកសិកម្មឃុំនៅស្រុកជើងព្រៃ ខេត្តកំពង់ចាម ដែលកំពុងច្រូតកាត់ស្រូវដោយទទួលបានផលល្អ និងមានទីផ្សារល្អដោយមានអ្នកត្រូវការទិញច្រើន និងហ៊ានឱ្យតម្លៃខ្ពស់គឺជាង១៣០០ រៀលក្នុងមួយគីឡូក្រាម តម្លៃនៅតាមវាលស្រែ ហើយតម្លៃនេះអាចនឹងកើនថែមទៀតដោយសារបរិមាណស្រូវផ្ការំដួលពូជសុទ្ធមានតិច ប៉ុន្តែតម្រូវការមានច្រើន។

ឯកឧត្តម យ៉ង សាំងកុមារ បញ្ជាក់ថា៖ «នៅទូទាំងស្រុកជើងព្រៃ ឆ្នាំនេះមានកសិករចំនួន៦១៨ គ្រួសារបានប្រើគ្រាប់ពូជសុទ្ធផ្ការំដួល ហើយចំនួននេះនឹងកើនឡើងកាន់តែច្រើនថែមទៀតនៅឆ្នាំខាងមុខ ដោយកសិករកាន់តែយល់ពីផលចំណេញពីការប្រើពូជសុទ្ធ។

ជាមួយគ្នានេះដែរ ឯកឧត្តម យ៉ង សាំងកុមារ បានឱ្យដឹងពីតម្លៃស្រូវផ្ការំដួលនៅថ្ងៃទី១២ ខែវិច្ឆិកា ឆ្នាំ២០២៤នេះគឺ តម្លៃស្រូវនៅឃុំកៀនសង្កែ ស្រុកសូទ្រនិគម ខេត្តសៀមរាប តម្លៃនៅរោងម៉ាស៊ីន- ស្រូវផ្ការំដួល ១៣០០រៀល – ស្រូវនាងអំតម្លៃ៩៤០៛ និង តម្លៃតាមវាល – ស្រូវផ្ការំដួល តម្លៃ១២៨០រៀល- ស្រូវនាងអំ ៩០០រៀល និងស្រូវនៅឃុំតាគ្រាម ស្រុកបាណន់ ខេត្តបាត់ដំបង តម្លៃឈ្មួញទិញដល់ស្រែ-ផ្ការំដួល ១២៥២៛/គ.ក-ស្រង៉ែស្រាល ១១២​៣៛​/គីឡូក្រាម។

ចំណែកនៅតាមបណ្តាខេត្តផ្សេងទៀត គិតត្រឹមថ្ងៃទី១២ ខែវិច្ឆិកា ឆ្នាំ២០២៤ រួមមាន៖ស្រូវនៅឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង – ស្រូវផ្ការំដួល ១២៥០រៀល/គីឡូក្រាម តម្លៃស្រូវនៅឃុំទ្រៀល ស្រុកតាំងគោក ខេត្តកំពង់ធំ – ស្រូវផ្ការំដួល ១៣០០រៀល/គីឡូក្រាម តម្លៃស្រូវ ឃុំស្រែចែង ស្រុកជុំគិរី ខេត្តកំពត-ស្រូវផ្ការំដួលតម្លៃទីវាល ១២៥០៛ទៅ១៣០០រៀល ។ តម្លៃស្រូវនៅឃុំព្រៃក្មេងស្រុកភ្នំស្រួច​ ខេត្តកំពង់ស្ពឺ​ តម្លៃមុខរោងម៉ាស៊ីន- ស្រូវផ្ការំដួល/ម្លិះ​ ១៣៨០រៀល តម្លៃឈ្មួញកណ្តាលទិញ- ស្រូវផ្ការំដួល/ម្លិះ​ ១៣១០រៀល។ តម្លៃស្រូវនៅឃុំពានរោង ស្រុកស្វាយអន្ទរ ខេត្តព្រៃវែង តម្លៃនៅទីវាល-ផ្ការំដួល ១១៥០៛-១២០០៛-OM​54​51: ១០២០៛​-១០​៤០រៀល។

ឯកឧត្តម យ៉ង សាំងកុមារ ក៏បានបញ្ជាក់ថា ស្រូវមានទីផ្សារ និងមានតម្លៃល្អអាស្រ័យលើកត្តាសំខាន់ៗដូចខាងក្រោមនេះ៖១- ប្រភេទពូជ ២-គុណភាពស្រូវ (កំរិតនៃភាពសុទ្ធ សំណើម និងកំរិតនៃភាពទុំ)៣- បរិមា​ណស្រូវប្រមូលបានក្នុងមួយថ្ងៃ ៤- ទីតាំង ដែលប្រមូលផ្តុំស្រូវ ៥- ពេលវេលា ដែលដឹងមុន ឬប្រាប់អំពីការមានស្រូវលក់ (បាន៥ ថ្ងៃមុនល្អ) ដែលនេះជាកត្តា និងគោលការណ័ដែលមន្រ្តីកសិកម្មឃុំ យកចិត្តទុកដាក់ក្នុងការធ្វើការជាមួយកសិករ ដើម្បីដោះស្រាយបញ្ហាទីផ្សារ និងតម្លៃស្រូវ៕