បរទេស៖ យោងតាមប្រភពព័ត៌មានពី Global Times បានរាយការណ័ថា ចិននឹងពង្រឹងវិធានការណ៍ទប់ទល់នឹងការឡើងចុះតម្លៃក្នុងគោលនយោបាយរូបិយវត្ថុ ដើម្បីសម្រេចបាននូវគោលដៅកំណើនផលិតផលក្នុងស្រុកសរុបចំនួន ៥ ភាគរយសម្រាប់ឆ្នាំ២០២៤ និងការអភិវឌ្ឍន៍ប្រកបដោយគុណភាពខ្ពស់។

លោក Pan Gongsheng ទេសាភិបាលធនាគារកណ្តាលចិន PBOC បានលើកឡើងថា PBOC នឹងរក្សាជំហរគោលនយោបាយរូបិយវត្ថុដែលគាំទ្រ ពង្រឹង និងធ្វើឲ្យប្រសើរឡើងនូវភាពជាក់លាក់នៃបទបញ្ញត្តិគោលនយោបាយរូបិយវត្ថុដែលមានស្រាប់ប្រកបដោយប្រសិទ្ធភាព ព្រមទាំងខិតខំប្រឹងប្រែងកាន់តែខ្លាំងក្នុងការបង្កើតគោលនយោបាយបន្ថែមផងដែរ។ វាចាំបាច់ក្នុងការរក្សាសាច់ប្រាក់ងាយស្រួលក្នុងកម្រិតសមរម្យ និងសមហេតុផល និងកាត់បន្ថយការចំណាយហិរញ្ញវត្ថុសម្រាប់សហគ្រាស និងគ្រួសារ ខណៈពេលដែលបន្តប្រើប្រាស់ឧបករណ៍គោលនយោបាយរូបិយវត្ថុតាមរចនាសម្ព័ន្ធឱ្យបានត្រឹមត្រូវ ដើម្បីពង្រឹងការគាំទ្រសម្រាប់យុទ្ធសាស្រ្តសំខាន់ៗ។

លោក Pan Gongsheng បានបន្ថែមថា កិច្ចខិតខំប្រឹងប្រែងទប់ទល់នឹងការឡើងចុះតម្លៃនឹងត្រូវធ្វើឡើងដើម្បីធានាថាគោលនយោបាយរូបិយវត្ថុ និងហិរញ្ញវត្ថុបង្កើតជាការរួមបញ្ចូលគ្នាជាមួយគោលនយោបាយសារពើពន្ធ ឧស្សាហកម្ម និងការងារ។ មិនត្រឹមតែប៉ុណ្ណោះ ចិននឹងការពារប្រឆាំងយ៉ាងម៉ឺងម៉ាត់ចំពោះហានិភ័យនៃការឡើងថ្លៃនៃអត្រាប្តូរប្រាក់ ខណៈដែលរក្សាអត្រាប្តូរប្រាក់យ័នឲ្យមានស្ថិរភាព។

លើសពីនេះ ចិននឹងអនុវត្តយ៉ាងម៉ឺងម៉ាត់សម្រាប់ការចូលប្រើប្រាស់ទីផ្សារ និងត្រួតពិនិត្យក្រៅបណ្តាញសម្រាប់ស្ថាប័នហិរញ្ញវត្ថុ ដើម្បីពង្រឹងការត្រួតពិនិត្យ និងបទប្បញ្ញត្តិហិរញ្ញវត្ថុទាំងស្រុង។ ចិននឹងកែលម្អកិច្ចសហប្រតិបត្តិការរវាងការត្រួតពិនិត្យហិរញ្ញវត្ថុជាតិ និងមូលដ្ឋាន ខណៈដែលពង្រឹងការការពារសិទ្ធិ និងផលប្រយោជន៍របស់អ្នកប្រើប្រាស់ហិរញ្ញវត្ថុ និងអ្នកវិនិយោគផងដែរ។ ទន្ទឹមនឹងនេះ ចិននឹងបន្តលើកកម្ពស់សេវាកម្មហិរញ្ញវត្ថុប្រកបដោយគុណភាព និងប្រសិទ្ធភាព តាមរយៈការលើកទឹកចិត្ត ដឹកនាំស្ថាប័នហិរញ្ញវត្ថុ និងពង្រឹងការគាំទ្រផ្នែកហិរញ្ញវត្ថុសម្រាប់កម្លាំងផលិតភាពថ្មី ដើម្បីបង្កើនប្រសិទ្ធភាពរចនាសម្ព័ន្ធឥណទាន។ មិនត្រឹមតែប៉ុណ្ណោះ ចិននឹងបង្កើនកិច្ចខិតខំប្រឹងប្រែងបន្ថែមទៀតសម្រាប់ការវិនិយោគក្នុងរយៈពេលវែង និងជំរុញការអភិវឌ្ឍនៃគំនិតច្នៃប្រឌិតវិទ្យាសាស្ត្រ បច្ចេកវិទ្យា និងវិស័យបៃតងឲ្យកាន់តែប្រសើរឡើង។

បន្ថែមពីនេះ កិច្ចខិតខំប្រឹងប្រែងទប់ទល់នឹងការឡើងចុះតម្លៃនឹងត្រូវបានធ្វើឡើងដើម្បីបន្តពង្រឹងនូវកំណែទម្រង់ហិរញ្ញវត្ថុឲ្យកាន់តែស៊ីជម្រៅ និងបើកចំហរ ដោយគាំទ្រដល់ធនាគារពាណិជ្ជធំៗក្នុងការវិនិយោគដើមទុនរបស់ពួកគេ, ពង្រីកបណ្តាញសម្រាប់វិនិយោគិនបរទេសមកបណ្តាក់ទុនក្នុងទីផ្សារមូលធនរបស់ចិន, ជំរុញការប្រើប្រាស់ប្រាក់យ័នលើឆាកអន្តរជាតិ, និងជំរុញការអភិវឌ្ឍន៍របស់ហុងកុង និង សៀងហៃ ក្នុងនាមជាមជ្ឈមណ្ឌលហិរញ្ញវត្ថុអន្តរជាតិ។ លោក Pan ក៏លើកឡើងផងដែរថា កិច្ចខិតខំប្រឹងប្រែងនឹងត្រូវបានធ្វើឡើងដើម្បីការពារ និងកាត់បន្ថយហានិភ័យហិរញ្ញវត្ថុក្នុងលក្ខណៈសកម្ម និងប្រុងប្រយ័ត្ន ដើម្បីរក្សាស្ថិរភាពទាំងមូលនៃប្រព័ន្ធហិរញ្ញវត្ថុ៕