សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រទេសចិន ជាប្រទេសដែលមានការអភិវឌ្ឍលើវិស័យរថយន្តអគ្គិសនីច្រើនជាងនៅលើពិភពលោក និងបានជំរុញឱ្យពលរដ្ឋរបស់ខ្លួន ក៏ដូចជាពិភពលោកងាកមកប្រើប្រាស់រថយន្តអគ្គិសនីកាន់តែច្រើន ។ ក្រឡេកមកមើលទីផ្សាររថយន្តអគ្គិសនីនៅកម្ពុជានាពេលបច្ចុប្បន្ននេះវិញ មិនខុសពីទីផ្សារថយន្តអគ្គិសនីនៅប្រទេសចិនកាលពី១០ឆ្នាំមុនទេ ដូច្នេះ ១០ឆ្នាំខាងមុខទីផ្សាររថយន្តអគ្គិសនីនៅកម្ពុជាអាចនឹងទូលាយដូចនៅប្រទេសចិននាពេលបច្ចុប្បន្ន ។
បើតាមលោក តុង ហ៊ោយគួយ អគ្គនាយកក្រុមហ៊ុន SDB ដែលជាក្រុមហ៊ុននាំចូល និងចែកចាយរថយន្តអគ្គិសនីមកកម្ពុជា បានមើលឃើញថា ទីផ្សាររថយន្តអគ្គិសនីនៅកម្ពុជានាពេលនេះ ដូចគ្នានឹងទីផ្សាររថយន្តអគ្គិសនីនៅប្រទេសចិនកាលពី១០ឆ្នាំមុន ។ កាលនោះមានការប្រើប្រាស់មានតិចតួច ហើយរដ្ឋាភិបាលបានលើកទឹកចិត្តឱ្យពលរដ្ឋងាកមកប្រើប្រាស់រថយន្តអគ្គិសនីឱ្យបានកាន់តែច្រើន ។
លោកបន្តថា សម្រាប់រាជរដ្ឋាភិបាលកម្ពុជានាបច្ចុប្បន្ននេះ ក៏បានជំរុញ និងលើកទឹកចិត្តឱ្យពលរដ្ឋប្រើប្រាស់រថយន្តអគ្គិសនីកាន់តែច្រើន ដោយរដ្ឋាភិបាលបានសហការក្នុងការដំឡើងស្ថានីយ៍សាកថាមពលនៃរថយន្តអគ្គិសនីនៅក្នុងរាជធានីភ្នំពេញ និងតាមបណ្ដាខេត្តមួយចំនួន ។
នៅក្នុងឱកាសសម្ពោធដាក់លក់ជាផ្លូវការរថយន្តអគ្គិសនីម៉ាកថ្មីមួយនៅកម្ពុជា កាលពីចុងសប្ដាហ៍កន្លងទៅនេះ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានកត់សម្គាល់អំពីសន្ទុះកើនឡើងនៃការប្រើប្រាស់ និងការអភិវឌ្ឍវិស័យយានយន្តអគ្គិសនីទាំងក្នុងតំបន់ និងសកលលោក ដែលវិស័យនេះបានផ្តល់នូវអត្ថប្រយោជន៍ជាច្រើនតាមរយៈការបង្កើតការងារសម្រាប់ពលរដ្ឋ និងផ្តល់តម្លៃបន្ថែមក្នុងសេដ្ឋកិច្ច ការការពារបរិស្ថាន និងសុខភាពប្រជាជន កាត់បន្ថយការបញ្ចេញឧស្ម័នពុលជំនួសឱ្យការប្រើប្រាស់យានយន្តប្រើប្រាស់ប្រេងឥន្ធនៈ និងការចូលរួមធានាសន្តិសុខថាមពលតាមរយៈការកាត់បន្ថយការពឹងផ្អែកលើការនាំចូលប្រេងឥន្ទនៈពីបរទេស ព្រមទាំងភាពងាយរងគ្រោះបណ្ដាលមកពីការប្រែប្រួលនៃថ្លៃប្រេងឥន្ទនៈសកល ។
ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន ក៏បានថ្លែងបញ្ជាក់ថា ក្នុងឆ្នាំ២០២៤កន្លងទៅនេះ មានរថយន្តអគ្គិសនីចុះបញ្ជីនៅក្នុងក្រសួងសាធារណការ និងដឹកជញ្ជូនចំនួន ២.២៥៣គ្រឿង ដែលមានការកើនឡើង ៦២០ភាគរយធៀបនឹងឆ្នាំ២០២៣ ។
ឯកឧត្តមបន្តថា តាមរយៈការចុះបញ្ជីរថយន្តអគ្គិសនីនៅក្នុងប្រទេសកកម្ពុជា បានបង្ហាញពីកំណើននៃការប្រើប្រាស់រថយន្តរថយន្តអគ្គិសនីកាន់តែច្រើន ហើយកំណើននេះនឹងកើនឡើងបន្តទៀតនៅពេលអនាគត ខណៈរាជរដ្ឋាភិបាលក៏បានជំរុញនិងលើកទឹកចិត្តឱ្យងាកមកប្រើប្រាស់រថយន្តអគ្គិសនីកាន់តែច្រើន ។
ឯកឧត្តមបញ្ជាក់ថា ការប្រើប្រាស់រថយន្តអគ្គិសនីទទួលបាននូវអត្ថប្រយោជន៍ច្រើន ដូចជាកាត់បន្ថយការចំណាយលើឥន្ធនៈ កាត់បន្ថយការបំភាយចំហេះ ទប់ស្កាត់ការបំពុលបរិស្ថាន តាមរយៈការបញ្ចេញឧស្ម័នផ្សែងពីរថយន្តទៅបរិយាកាស ៕
Account
Security
Favourite Content