សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ ពិព័រណ៍ផលិតផលខ្មែរ និងបន្លែផ្លែឈើលើកទី១៧ ត្រូវបានរៀបចំឡើងនៅខេត្តសៀមរាប មានរយៈពេល៤ថ្ងៃ ចាប់ពីថ្ងៃទី២២ ដល់ ២៥ ខែកុម្ភៈ ឆ្នាំ២០២៤ បានប្រព្រឹត្តទៅនៅបរិវេណសួនច្បារព្រះរាជដំណាក់ ក្រុងសៀមរាប ខេត្តសៀមរាប ត្រូវបានបណ្តាម្ចាស់អាជីវកម្ម សហគ្រាស ក៏ដូចជាមហាជនទូទៅមានការចាប់អារម្មណ៍ និងគាំទ្រគួរឱ្យកត់សម្គាល់ ។
នៅក្នុងការរៀបចំពិធីតាំងពិព័រណ៍ផលិតផលក្នុងស្រុកទាំងនេះ មានការដាក់តាំងបង្ហាញ និងលក់ផលិតផលខ្មែរ បន្លែ ផ្លែឈើ វត្ថុអនុស្សាវរីយ៍ ផលិតផលរបស់សហគមន៍ និងផលិតផលភូមិ១ ផលិតផល១ មកពីរាជធានី-ខេត្តចំនួន១៦ សរុបចំនួន១១៣ ក្រុម ។ ពិព័រណ៍នេះផងដែរ ក្រសួងពាណិជ្ជកម្ម ក៏មានការរៀបចំព្រឹត្តិការណ៍ការបង្ហាញម៉ូតផលិតផលសូត្រខ្មែរ ព្រមទាំងមានការសម្តែងសិល្បៈកម្សាន្តក្នុងពេលរាត្រីផងដែរ ។
លោកជំទាវ ខេង រ៉ាស៊ី សមាជិកក្រុមប្រឹក្សាខេត្តសៀមរាប បានធ្វើសេចក្តីរាយការណ៍របស់គណៈកម្មការរៀបចំពិព័រណ៍ផលិតផលខ្មែរ និងបន្លែផ្លែឈើលើកទី១៧ ឆ្នាំ២០២៤ បានបញ្ជាក់ថា ក្នុងការតាំងពិព័រណ៌ផលិតផលខ្មែរ និងបន្លែផ្លែឈើ ដោយមានរាជធានី ខេត្ត ចំនួន១៦ និងក្រុមហ៊ុនសហគ្រាសចំនួន១១៣ក្រុម ជាមួយស្តង់ពិព័រណ៍ផលិតផលសរុបចំនួន១២៥ ស្តង់ ខណៈដែលសូត្រខ្មែរក៏មានវត្តមាននៅក្នុងពិធីពិព័រណ៍ដ៏ធំមួយនេះផងដែរ ។
ឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម បានមានប្រសាសន៍ថា នេះជាឱកាសយុទ្ធនាការទិញផលិតផលខ្មែររដូវកាលទី៩ ឆ្នាំ២០២៤ ហើយក៏ជាផ្នែកមួយដ៏សំខាន់នៃការអនុវត្តគោលនយោបាយអភិវឌ្ឍន៍វិស័យពាណិជ្ជកម្មរបស់ក្រសួងពាណិជ្ជកម្ម ។
ឯកឧត្តម ម៉ៅ ថូរ៉ា បានបញ្ជាក់ថា ៖ យុទ្ធនាការប្រើប្រាស់សូត្រកម្ពុជា ក៏ជាសំឡេងជួងដាស់ស្មារតីប្រជាជនកម្ពុជា ឱ្យងាកមកចូលរួមគាំទ្រ និងប្រើប្រាស់ផលិតផលក្នុងស្រុក ជំនួសទំនិញនាំចូលពីបរទេសជាជំហានៗ ហើយអ្វីដែលសំខាន់គឺផលិតផលសូត្ររបស់ខ្មែរ ។
ឯកឧត្តម បានបន្តថា តាមរយៈការរៀបចំយុទ្ធនាការទិញផលិតផលខ្មែរ ចំនួន៨រដូវកាលកន្លងមកនេះ បានជួយពង្រឹងខ្សែច្រវាក់ផលិតកម្មក្នុងស្រុកជាបណ្តើរៗ ហើយផលិតករកម្ពុជា ក៏មានចំណេះដឹង ចំណេះធ្វើ និងទទួលបានបទពិសោធន៍ល្អៗជាច្រើនសម្រាប់ពង្រឹង និងពង្រីកផលិតកម្ម អភិវឌ្ឍន៍ផលិតផល និងសេវារបស់ខ្លួនបម្រើឱ្យទីផ្សារ ។
ឯកឧត្តម រដ្ឋលេខាធិការក៏បានគូសបញ្ជាក់ដែរថា វិស័យពាណិជ្ជកម្ម បានដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ច និងសង្គម ហើយការអភិវឌ្ឍវិស័យពាណិជ្ជកម្ម នៅតែជាចំណុចអាទិភាពរបស់រាជរដ្ឋាភិបាលកម្ពុជានៅក្នុងអភិក្រមសេដ្ឋកិច្ចទីផ្សារសេរី ។ ស្របតាមយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ក្នុងបុព្វហេតុចូលរួមអភិវឌ្ឍសេដ្ឋកិច្ច-សង្គម ក្រសួងពាណិជ្ជកម្ម បានខិតខំធ្វើការកែទម្រង់ និងបានអនុវត្តយ៉ាងខ្ជាប់ខ្ជួន ។ ក្រៅពីនេះ រាជរដ្ឋាភិបាលកម្ពុជា ក៏បានកំណត់យកផលិតផលសូត្រជាផលិតមួយសំខាន់ក្នុងចំណោម១០ សម្រាប់ការអភិវឌ្ឍសេដ្ឋកិច្ចនៅកម្ពុជា ដោយសង្កត់ធ្ងន់លើការអភិរក្សប្រពៃណីវប្បធម៌ខ្មែរ កាត់បន្ថយភាពក្រីក្រនៅមូលដ្ឋាន ព្រមទាំងការលើកកម្ពស់វិស័យសូត្រកម្ពុជានៅលើឆាកអន្តរជាតិផង ។
ឯកឧត្តម ម៉ៅ ថូរ៉ា ក៏បានលើកទឹកចិត្តឱ្យអ្នកទាំងអស់គ្នាស្វែងយល់ពីការអត្ថប្រយោជន៍នៃការចូលរួមតាំងពិព័ណ៍ និងទទួលយកភាពស្រស់ស្អាតនៃវប្បធម៌ខ្មែរបានជំរុញដល់ផលិតករ ពាណិជ្ជករកម្ពុជា ត្រូវខិតខំបង្កើតគំនិតច្នៃប្រតិដ្ឋថ្មីៗបន្ថែមទៀត និងរៀបចំទំនិញសម្រាប់បម្រើទីផ្សារ ដោយអនុលោមតាមគោលការណ៍ «ភក្តីភាពចំពោះពាណិជ្ជកម្ម» គឺផលិតផលត្រូវតែមានគុណភាព សុវត្ថិភាពសម្រាប់អ្នកប្រើប្រាស់ អនុលោមតាមស្តង់ដារអនាម័យ និងមានតម្លៃសមរម្យ ទើបអាចចូលរួមប្រកួតប្រជែងក្នុងទីផ្សារសេរីបាន។
សូមជម្រាបថា ចំពោះការរៀបចំពិព័រណ៍ផលិតផលខ្មែរ និងបន្លែផ្លែឈើ លើកទី១៧ ឆ្នាំ២០២៤ បានទាក់ទាញអាជីវករ ផលិតករ អ្នកផ្គត់ផ្គង់ អ្នកកែច្នៃ ម្ចាស់កសិដ្ឋាន អង្គការ សមាគមអាជីវកម្ម និងសហគមន៍ផលិតបន្លែផ្លែឈើខ្មែរក្នុងខេត្តសៀមរាប និងមកពីរាជធានី-ខេត្ត ចំនួន១៦ នាំយកផលិតផល កសិផល មកចូលរួមដាក់តាំងបង្ហាញ និង ស្វែងរកដៃគូពាណិជ្ជកម្ម រួមមាន បន្លែផ្លែឈើស្រស់ ដំណាប់ ផ្លែឈើក្រៀម គ្រាប់ធញ្ញជាតិចម្រុះ អង្គរ ស្វាយចន្ទី ម្រេច ដំឡូងមីម្ហូបអាហារកែច្នៃ វត្ថុអនុស្សាវរីយ៍ និងផលិតផលធ្វើពីសូត្រជាដើម៕
Account
Security
Favourite Content