ភ្នំពេញ ៖ រាជរដ្ឋាភិបាល​បាន​ជំរុញ និងលើកទឹកចិត្ត​ឱ្យបង្កើត​តំបន់សេដ្ឋកិច្ច​នៅតាមបណ្ដា​ខេត្ត​ដែលមាន​សក្ដា​នុពល​ ជាពិសេស​​ខេត្ត​នៅជាប់ព្រំដែន​ជាមួយនឹង​ប្រទេស​ជិត​ខាង​ដូចជា​ព្រំដែន​កម្ពុជា-ថៃ, ព្រំដែនកម្ពុជា-វៀ​ត​ណាម ​ជាដើម ​ជាក់ស្ដែង​ រហូតមកដល់ពេលនេះ​កម្ពុជា​មានតំបន់សេដ្ឋកិច្ចពិសេស​ជាច្រើន​ដែលទា​ក់​ទាញ​វិនិ​យោគិន​បរទេស​ចូលមក​បណ្ដាក់ទុន​វិនិយោគ ក្នុងនោះ ខេត្ត​បន្ទាយ​មានជ័យ​មានតំបន់សេដ្ឋកិច្ច​ពិសេស​ចំនួន៤ ​និង​បានផ្ដល់​ឱកាស​ការងារ​ជិត​៦០០០នាក់ ។​

យោងតាម​ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា តំបន់សេដ្ឋកិច្ច​ពិសេស​ចំនួន៤នៅខេត្ត​បន្ទាយ​មានជ័យ​មាន​គម្រោង​ចំនួន ១៩ ដោយក្នុងនោះ​មាន ​១៣​គម្រោ​ងកំពុង​ដំណើរការ​ និងមានទុន​វិនិយោគសរុប​ចំនួន ​១២៦​លាន​ដុល្លារ​អាមេរិក ។

គួររំលឹកថា គោល​នយោបាយ​របស់រាជរដ្ឋាភិបាល​តាំងពី​អាណត្តិសម្ដេចអគ្គមហា​សេនា​បតីតេជោ ហ៊ុន សែន អតីតជា​នាយករដ្ឋមន្ត្រី ​បានជំរុញឱ្យបង្កើត​តំបន់​សេដ្ឋកិច្ច​ពិសេស​នៅតាមតំបន់ជាប់ព្រំដែន ដើម្បីងាយស្រួល​ដល់​ការ​ដឹកជញ្ជូន​សម្ភារៈ វត្ថុធាតុ​ដើម​ យកមកផលិត​ កែច្នៃ ហើយដឹក​ត្រលប់ទៅកាន់ទីផ្សារអន្តរជាតិវិញ ក្នុងនោះដែរ ខេត្ត​ជាប់ព្រំដែន​ចំនួន២​ឃើញថាមានតំបន់សេដ្ឋកិច្ច​ច្រើន​ជាង​គេ ​និងមានសកម្មភាពផុស​ផុលជាង​គេ គឺក្រុង​បាវិត ខេត្តស្វាយរៀង និ​ងខេត្ត​បន្ទាយមានជ័យ ដែលមានទីតាំងនៅក្នុង​ក្រុងប៉ោយ​ប៉ែត​ ។

បច្ចុប្បន្ននេះ រាជរដ្ឋាភិបាល កំពុងដំណើរការ​នីតិវិធី​ក្នុងកា​របង្កើត​តំបន់សេដ្ឋកិច្ចពិសេស​ថ្មីមួយ​ទៀតសម្រាប់​វិនិ​យោ​គិ​ន​​ជ​ប៉ុន ដោយគម្រោង​តំបន់សេដ្ឋកិច្ច​នេះ គឺផ្ដោត​លើវិនិយោគិន​មកពី​ប្រទេស​ជប៉ុន ផ្នែកឧស្សាហកម្ម​ ខណៈដែល​វិនិយោគិន​ជប៉ុន​ជាច្រើន​ដែលកំពុង​មានវត្ត​មានស្រាប់​ ក៏ដូចជាវិនិយោគិនជប៉ុនដែលកំពុង​ស្វែង​រកឱកាស​វិនិយោគ​នៅ​កម្ពុជាក៏ជំរុញឱ្យមានការបង្កើតតំបន់សេដ្ឋកិច្ចពិសេសជប៉ុន-កម្ពុជាឱ្យបានឆាប់រហ័ស។

ឯកឧត្តម ​ស៊ុន ចាន់​ថុល​ ឧបនាយករដ្ឋមន្ត្រី និងជា​អនុប្រធានទី១​​ក្រុមប្រឹក្សាអភិវឌ្ឍន៍​កម្ពុជា​បាន​មា​ន​ប្រ​សាសន៍ថា ទីតាំង​ឧស្សាហកម្ម​នៅខេត្ត​ពោធិ៍សាត់ បាត់ដំបង​​ និង​បន្ទាយ​មានជ័យ នៅពេល​អនាគត​ឆាប់ៗនេះ នឹងកាន់តែមានភាពងាយស្រួល​​ ស្របនឹង​ផ្លូវជាតិលេ​ខ៥​បានសាងសង់រួចរាល់ និ​ងបានដាក់​ឱ្យប្រើប្រាស់​ ហើយ​ច្រកព្រំដែនស្ទឹងបត់-បានណងអៀន ក៏​នឹង​ដាក់ឱ្យដំណើរការ​នៅពេលឆាប់ៗនេះ ដូច្នេះ​ទំនិញ​ចេញចូលកម្ពុជា-ថៃ​ នឹងលែង​មានការកក​ស្ទះ​ដូចមុនទៀតហើយ ដោយសារតែច្រក​អន្តរជាតិថ្មីៗនេះ គឺសម្រាប់តែ​ចរា​ច​រ​ណ៍​ទំ​និ​ញ​ប៉ុណ្ណោះ ​ខណៈដែល​ច្រក​អន្តរជាតិ​ប៉ោយ​ប៉ែត គឺសម្រាប់​ចរាចរណ៍ភ្ញៀវទេសចរ ។

គួរ​បញ្ជាក់ថា កាលពីពេលថ្មីៗនេះ ក្រុមហ៊ុន​ធំៗចំនួន​៣​បាន​បោះទុនវិនិយោគ​នៅក្នុងតំបន់សេដ្ឋកិច្ចពិសេស​នា​ខេត្ត​បន្ទាយមា​នជ័​យ​ ដែលមានទុនសរុបប្រមាណជិត ៣៦លានដុល្លារ រួមមាន ៖​

១. ក្រុមហ៊ុន Nidec Die-Casting (Cambodia) Co., Ltd. ជាគម្រោងវិនិយោ​គផ​លិ​ត​សម្ភារៈ​អេឡិចត្រូនិក ស្ថិតក្នុងតំបន់សេដ្ឋកិច្ចពិសេស សានកូ ប៉ោយប៉ែត ក្នុងទុនវិនិយោគចំនួន ២០,៦៣​លានដុ​ល្លារអាមេរិក បានបង្កើតការងារចំនួន ៨០៣កន្លែង។

២. ក្រុមហ៊ុន NHK Spring (Cambodia) Co., Ltd. ជាគម្រោងវិនិយោគកម្មន្ដសាលស្រោមពូកស្បែករថយន្ត ស្ថិតក្នុងតំបន់សេដ្ឋកិច្ចពិសេស សានកូ ប៉ោយប៉ែត ក្នុងទុន​វិនិយោគ​ចំ​នួ​ន​ ៨,១៥លានដុល្លារអាមេរិក បាន​បង្កើ​ត​ការងារចំនួន ២៣៩កន្លែង។

៣. ក្រុមហ៊ុន HGB Motors Assembly Co., Ltd. ជាគម្រោងវិនិយោគកម្មន្ដសាលផ្គុំ និងដំឡើងរថយន្ត ស្ថិតក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ប៉ោយប៉ែត ក្នុងទុនវិនិយោគ ៧លានដុល្លារអាមេរិក មាន​ទីផ្សា​រ​លក់នៅក្នុងស្រុក បានបង្កើតការងារចំនួន ៧៦កន្លែង ៕